Karen Baptist Convention

ၦၤကညီဘျၢထံခဝ့ၡၢၣ် နံၣ်ကယၤ (၂၁)မံးၡၢၣ်တၢ်တိာ်ကျဲၤ သၢပတီၢ်တပတီၢ် ကရူၢ်(၄) တၢ်ဃုထံၣ်ကျိၣ်စ့တၢ်ရဲၣ်တၢ်ကျဲၤ အိၣ်ဒီးတၢ်အိၣ်ဖှိၣ်တၢၣ်ပီၣ်သကိး ဘၣ်ထဲဒွီး တၢ်ကမၤသကိး တၢ်ဆါတၢ်ၦ့ၤလၢ တၢ်ဃုထံၣ်န့ၢ်ကျိၣ်စ့လၢ ၂ဝ၂၅နံၣ်အဂီၢ် ဖဲ လါအီကူာ်(၇)သီႇ ဟါ(၁)နၣ်ရံၣ် ဖဲ(၃၉၆) ဝဲၤလီၢ် တၢ်အိၣ်ဖှိၣ်ဒၢးန့ၣ်လီၤ. ကရူၢ်အံၤ ၦၤပၢၤလီၢ်ဆ့ၣ်နီၤမ့ၢ်ဝဲ- သရၣ်မုၣ်ၡံထၣ်ဖီ(ၦၤပၢၤစ့) ဒီး ကမံးတံာ်ဖိတဖၣ် မ့ၢ်ဝဲ ဝဲၤကျိၤတဖၣ်အၦၤနဲၣ်တၢ်တဖၣ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်သးခုကစီၣ်ဒီးမံးၡၢၣ်ဝဲၤကျိၤ အိၣ်ဒီးတၢ်မၢဖိတၢ်မၤလိ(၆)ဘျီတဘျီ လါအီကူာ်(၄)သီ တုၤ (၂၂)သီႇ ၂ဝ၂၅နံၣ်ဖဲ  ကီၢ်တကူၣ်ကျဲးစၢးကရၢတၢ်သူၣ်ထီၣ်န့ၣ်လီၤ. တၢ်မၤလိတဘျီအံၤ တၢ်သိၣ်လိလၢ ဘၣ်တၢ်ဟ့ၣ်ခီဟ့ၣ်နီၤအီၤတဖၣ်မ့ၢ်ဝဲ- တၢ်မၤလိလံာ်စီဆှံ-သရၣ်မုၣ်ရံနၣ်ဖီႇ သရၣ်ဒီးကထၢၣ်န့ၢ်လ့အီၣ်ႇ သရၣ်မုၣ်သီအဲၣ်ႇ ''တၢ်အုၣ်က့ၤခီၣ်က့ၤ'' လၢ သရၣ်ဒိၣ်ဖိထူႇ ''CCMP'' လၢ သရၣ်ဒိၣ်လးဖ့ၣ်ႇ  ''တၢ်သးခုကစီၣ်အကျဲကူၣ်နၢၤ'' လၢ သရၣ်ဒိၣ်မ့အီၣ်ထိႇ ''မုၢ်နံၤခံကတၢၢ်တၢ်ကမၤအသးတဖၣ်''လၢ သရၣ်ဒိၣ်တ့ၣ်စီႇ ''နံၣ်ကယၤ(၂၁)တၢ်တၤဒီး တၢ်မၤတၢ်သးခုကစီၣ်တၢ်မၤ'' လၢ သရၣ်မုၣ်ဒီးကထၢၣ်တ့ၣ်စံၣ်မိႇ ''နီၢ်တဂၤတၢ်မၤတၢ်သးခုကစီၣ်'' လၢ သရၣ်လွါမိထဲးအီၣ်ႇ ''Praise and Worship'' လၢသရၣ်သးဂ့ၤကိလ်တဖၣ်န့ၣ်လီၤ. ကီၢ်(၁၁)ဘ့ၣ်ခၢၣ်စး ၦၤဟဲထီၣ်အိၣ်ဝဲ(၁၅)ဂၤန့ၣ်လီၤ.

ၦၤကညီဘျၢထံခဝ့ၡၢၣ် ခရံာ်ဖိတၢ်ကူၣ်ဘၣ်ကူၣ်သ့ဝဲၤကျိၤ အိၣ်ဒီးတၢ်လဲၤဟ့ၣ်တၢ်သိၣ်လိလၢ ဘၣ်ထွဲတၢ်သ့သိၣ်လိအိၣ်ဘှံးနံၤတၢ်မၤလိ ဖဲကျီမီၤစိတၢ်အိၣ်ဖှိၣ် ကီၢ်ဒဝဲၣ်ဘျံးန့ၣ်လီၤ. ဝဲၤကျိၤၦၤနဲၣ်တၢ်-သရၣ်မုၣ်အဲၣ်သီထူ ဒီး ၦၤနဲၣ်တၢ်သဃဲၤ-သရၣ်မုၣ်စ့ဘှ့ၣ်ဖီတဖၣ်လဲၤဒီး ဟ့ၣ်ခီဟ့ၣ်နီၤတၢ် ဖဲလါမ့ၤ(၂၆-၂၈)ႇ ၂ဝ၂၅အနံၤန့ၣ်လီၤ. အိၣ်ဒီး Using Learning passport training for ECCD teachers ဖဲလါယူၤ (၂၅-၂၇)သီႇ လၢဆဲးကျိးန့ၢ်တီၤန့ၣ်လီၤ. သရၣ်မုၣ်စ့ဘှ့ၣ်ဖီ(ၦၤနဲၣ်တၢ်သဃဲၤ) လဲၤဘၣ်ဆူ သညီၣ်ဆံၣ်တၢ်အိၣ်ဖှိၣ်ႇ တၢ်လုၢ်ဒိၣ်ထီၣ်ဖိဆံး လၢကျဲကိးကပၤ ဒဲးကၠိ(၂၅)နံၣ် ယူဘလံၤႇ ကီၢ်ဒဝဲၣ်ဘျံး ဖဲလါယူၤ (၆)သီႇ ၂ဝ၂၅ အနံၤန့ၣ်လီၤ. အိၣ်ဒီးတၢ်ကတိၤလီၤဆီ လၢ သးစၢ်(၁၃-၁၆)နံၣ်တဖၣ်အဂီၢ် လၢဆဲးကျိးန့ၢ်တီၤဖဲ လါယူၤလံ ၂ဝ၂၅အနံၤန့ၣ်လီၤ. သရၣ်မုၣ်စၢ်ဘျုးဝါဒီး သရၣ်စၤလမိၤတဖၣ် ဟ့ၣ်ခီဟ့ၣ်နီၤတၢ်န့ၣ်လီၤ. အိၣ်စ့ၢ်ကီးဒီး Mental Health Psycho social Support For ECCD Teachers)) ဖဲ လါယူၤလံ(၂၉-၃၁)သီန့ၣ်လီၤ. ဒ်န့ၣ်အသိး ဝဲၤကျိၤၦၤမၤသကိးတၢ်တဖၣ်အဂီၢ် သုးကျဲၤမၤဘၣ် Organization Development အဖဲလါယူၤလံ(၁၆-၁၈)ႇ ၂ဝ၂၅အနံၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲၤကတီၤဒုးဒိၣ်ထီၣ်ထီထီၣ်ခိၣ်နၢ်ဝဲကျိၤ သုးကျဲၤမၤဝဲတၢ်မၤလိလၢ ခဝ့ၡၢၣ်ဝဲၤလီၢ် ၦၤမၤတၢ်ဖိ တဖၣ်အဂီၢ် တၢ်မၤလိလၢအမ့ၢ်''Indesign"(၃) လါတၢ်မၤလိ စးထီၣ်လၢ လါယူၤ (၄) သီ တုၤ လါအီကူ၁် (၂၉)သီန့ၣ်လီၤ. ခဝ့ၡၢၣ်ဝဲၤလီၢ်ၦၤမၤတၢ်ဖိလၢ ဟဲထီၣ်တၢ်မၤလိခဲလၢ၁်မ့ၢ်ဝဲ (၁၈)ဂၤန့ၣ်လီၤ. သရၣ်လၢ အဟ့ၣ်တၢ်သိၣ် လိမ့ၢ်ဝဲ သရၣ်Zadok န့ၣ်လီၤ. တၢ်ပျၢ်တၢ်မၤလိကဘၣ်တၢ်မၤအီၤဖဲ လါစဲးပတ့ဘၢၣ် (၅)သီ န့ၣ်လီၤ. တၢ်မၤလိတၢ် ကွၢ်စိမ့ၢ်ဒ်သိး ခဝ့ၡၢၣ်ၦၤမၤတၢ်ဖိတဖၣ် ကဒိးန့ၢ်အါထီၣ်တၢ်သ့တၢ်ဘၣ်ဒီးကကဲဘျုးလၢ ဝဲၤကျိၤတၢ်ဖံး တၢ်မၤတဖၣ်အဂီၢ် န့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤအိၣ်ဒီး တၢ်ကတိၤလီၤဆီဘၣ်ထဲဒွီး ''Spiritual Leadership" တၢ်ရဲၣ်တၢ်ကျဲၤဖဲ လါယူၤလံ(၂၁), ၂ဝ၂၅အနံၤ ဟါ(၇)နၣ်ရံၣ်လၢဆဲးကျိးန့ၢ်တီၤန့ၣ်လီၤ. ၦၤဟ့ၣ်ခီဟ့ၣ်နီၤတၢ်မ့ၢ်ဝဲ သရၣ်ဒိၣ်ဒီးကထၢၣ်အီနၢၣ်ညိၣ်(ခဝ့ၡၢၣ်နဲၣ်ရွဲၣ် မၤတ့ၢ်တၢ်)န့ၣ်လီၤ. တၢ်ဟ့ၣ်ထီၣ်ဝံၤ ပိာ်ထဲထွီၣ်အခံလၢ တၢ်သံကွၢ်စံးဆၢတဖၣ်န့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤအံၤလၢ (devices) ခဲလၢာ်အိၣ်ဝဲ(၄၇)ခါန့ၣ်လီၤ.

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ်အိၣ်ဒီး တၢ်ဟ့ၣ်ကူၣ်နဲၣ်ကျဲလၢ သးစၢ်တဖၣ်အဂီၢ်ဘၣ်ထွဲဒီး ထံလီၢ်ကီၢ်ပူၤဒီး ထံဂုၤကီၢ်ဂၤ တၢ်မၤလိမၤဒိးအခွဲးအယာ်တဖၣ်ဃုာ်ဒီး တၢ်ဃုထံၣ်န့ၢ် (Scholarship) အခဲွးအယာ် တဖၣ်(တသီတၢ်ရဲၣ်တၢ်ကျဲၤ) လၢဆဲးကျိးန့ၢ်တီၤ ဖဲလါအီကူာ်(၁)သီႇ ၂ဝ၂၅အနံၤန့ၣ်လီၤ. တၢ်ပညိၣ်ကွၢ်စိလၢ တၢ်ရဲၣ်တၢ်ကျဲၤတဖၣ်အဂီၢ်မ့ၢ်ဝဲ- (၁) မ့ၢ်ဒ်သိးကဟ့ၣ်ကူၣ်နဲၣ်ကျဲသးစၢ်တဖၣ် ဘၣ်ထဲဒွီးခါဆူညါတၢ်မၤလိမၤဒိးတဖၣ် အဂီၢ်ႇ (၂) မ့ၢ်ဒ်သိးသူၣ်စၢ်သးဘီၣ်တဖၣ် ကထံၣ်သ့ၣ်ညါဘၣ်ထဲဒွီးထံလီၢ်ကီၢ်ပူၤႇ ထံဂုၤကီၢ်ဂၤတၢ်မၤလိမၤဒိးအခဲွး အယာ်တဖၣ်အဂီၢ်ႇ (၃) မ့ၢ်ဒ်သိးသူၣ်စၢ်သးဘီၣ်တဖၣ် ကထံၣ်သ့ၣ်ညါ ဘၣ်ထဲဒွီးထံလီၢ်ကီၢ်ပူၤႇ ထံဂုၤကီၢ်ဂၤ (Scholarship)အခွဲးအယာ်တဖၣ်အဂီၢ် ဒီး(၄) မ့ၢ်ဒ်သိးသူၣ်စၢ်သးဘီၣ် ကဒဲကဒဲ ကဟ့ၣ်ခီဟ့ၣ်နီၤလိာ်သးအတၢ် လဲၤခီဖျိဘၣ်ထဲဒွီး တၢ်မၤလိမၤဒိးတဖၣ်အဂီၢ်န့ၣ်လီၤ. ထံလီၢ်ကီၢ်ပူၤႇ ဒီးထံဂုၤကီၢ်ဂၤ တၢ်မၤလိမၤဒိးအခဲွးအယာ်တဖၣ် ဒီး (Scholarship)အခွဲးအယာ်တဖၣ်အဂီၢ် ၦၤဟ့ၣ်တၢ်ကတိၤလီၤဆီလၢ သရၣ်မုၣ်ဆွ့ၣ်နွဲၣ်လးႇ သရၣ်မုၣ်ခ့ၣ်စီထွ့ ဒီး သရၣ်ဇီၣ်ထဲးကိၣ်ကိၣ်တဖၣ်န့ၣ်လီၤ.  ဘၣ်ထဲဒွီး (Judson University)တၢ်မၤလိမၤဒိးအဂ့ၢ်လၢ ပကြၢးသ့ၣ်ညါတဖၣ်လၢ သရၣ်မုၣ်လါဖီႇ တၢ်ဟ့ၣ်ခီဟ့ၣ်နီၤ ထံဂုၤကီၢ်ဂၤတၢ်မၤလိအတၢ်လဲၤခီဖျိလၢ စီၤဆၣ်ကပီၤဒူ တဖၣ်န့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤ (devices)အိၣ်ဝဲ (၁ဝဝ)ခါန့ၣ်လီၤ.

ၦၤကညီဘျၢထံခဝ့ၡၢၣ် လံာ်လဲၢ်ဒီးတၢ်ဆဲးတၢ်လၤဝဲၤကျိၤ အိၣ်ဒီး ''တၢ်သတြီၤ ထါတၢ်ရဲၣ်တၢ်ကျဲၤခီဖျိ မုၢ်နံၤလီၤဆီတဖၣ်အဂ့ၢ်''န့ၣ်လီၤ. တၢ်ရဲၣ်တၢ်ကျဲၤအံၤ ဘၣ်တၢ်မၤအီၤဖဲ လါယူၤလံ(၃၁)သီႇ ဟါ(၆)နၣ်ရံၣ်လၢ ဆဲးကျိးန့ၢ်တီၤန့ၣ်လီၤ. ကီၢ်(၁၂)ဘ့ၣ်ခၢၣ်စးႇ ၦၤနုာ်လီၤသတြီၤတၢ်အိၣ်ဝဲ(၁၈)ဂၤန့ၣ်လီၤ. စံၣ်ညီၣ်ကီၢ်တဖၣ်မ့ၢ်ဝဲ- သရၣ်မုၣ်ဒီးကထၢၣ်လါမ့ၤဖီႇ သရၣ်ဒိၣ်ဒီးကထၢၣ်စ့စီ ဒီးသရၣ်မုၣ်ဆၣ်စ့လွဲၤတဖၣ်န့ၣ်လီၤ. ၦၤလၢအဒိးန့ၢ် ခိၣ်ဖးတၢ-နီၢ်အဲၣ်မူဝါ(ကီၢ်ချၢၣ်လွံၢ်ထူၣ်ကီၢ်ခၢၣ်စး), ခိၣ်ဖးခံ- ဘှ့ၣ်ခုၣ်(ကီၢ်ပသံၣ်မၠီမၠးကီၢ်ခၢၣ်စး), ခိၣ်ဖးသၢ-စီၤကုးလၤ(ကိး)စီၤယၤကိာ်(ကီၢ်ဖၣ်အၣ်မီၣ်လမၠဲၣ်ကီၢ်ခၢၣ်စး)တဖၣ်န့ၣ်လီၤ. ၦၤဟဲထီၣ်ဒိကနၣ်တၢ်လၢ (devices)(၆၈)ခါန့ၣ်လီၤ.

ၦၤကညီဘျၢထံခဝ့ၡၢၣ် ယွၤဂ့ၢ်ပီညါဟ့ၣ်ဂံၢ်ဟ့ၣ်ဘါဟံးစုနဲၣ်ကျဲ ကရူၢ်အတၢ်လဲၤတုၤအိၣ်သကိးဆူ ကီၢ်ဟီကတးလံာ်စီဆှံကၠိဒီး ဖုစီၤဘူးလံာ်စီဆှံကၠိဖဲ လါယူၤလံ(၂၁-၂၂)သီႇန့ၣ်လီၤ. သရၣ်ႇ သရၣ်မုၣ်လၢ လဲၤသကိးတၢ်တဖၣ်မ့ၢ်ဝဲ- သရၣ်မုၣ်ဒိၣ်ဒီးကထၢၣ်စ့လဲွၣ်ဝါႇ သရၣ်ဒိၣ်ဒီးကထၢၣ်စါရၢးစ့ၣ်ႇ သရၣ်ဒိၣ်ဟူဆၢႇ သရၣ်စီၤထ့လၢၢ်ႇ သရၣ်မုၣ်ဒီးကထၢၣ်မူမုၢ်ဝါႇ သရၣ်န့ၢ်ဘျုးဒီး သရၣ်အဲၣ်ဘျုးတဖၣ်န့ၣ်လီၤ. တၢ်လဲၤတဘျီအံၤ အိၣ်ဒီးတၢ်ထံၣ်လိာ်အိၣ်သကိးဒီး ကီၢ်လံာ်စီဆှံကၠိခိၣ်ဒီး ကၠိသရၣ်ႇ သရၣ်မုၣ်တဖၣ်တကတီၢ်ဝံၤႇ ထံၣ်လိာ်သကိးသးဒီး လံာ်စီဆှံကၠိဖိတဖၣ်န့ၣ်လီၤ. တၢ်လဲၤအံၤအတၢ်ပညိၣ်ကွၢ်စိမ့ၢ်ဝဲ ဒ်သိးကထံၣ်လိာ်သးလၢ တၢ်ဟ့ၣ်ဂံၢ်ဟ့ၣ်ဘါလိာ်သး အဂီၢ်ႇ တၢ်ဟ့ၣ်ကူၣ်နဲၣ်ကျဲလိာ်သးအဂီၢ်န့ၣ်လီၤ. တၢ်ထံၣ်လိာ်သးအံၤကဲၤဘျုးကဲဖှိၣ်အါမးလၢကၠိအဂီၢ်မ့ၢ်ဂ့ၤဒီး လၢဝဲၤကျိၤအဂီၢ်စ့ၢ်ကီးန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤအိၣ်ဒီး တၢ်ကတိၤလီၤဆီတၢ်ရဲၣ်တၢ်ကျဲၤ ဘၣ်တၢ်မၤအီ လၢဆဲးကျိးန့ၢ်တီၤ ဖဲလါယူၤလံ(၂၁)သီ ဟါ(၇)နၣ်ရံၣ်ႇ ၂ဝ၂၅အနံၤန့ၣ်လီၤ. ၦၤဟ့ၣ်ခီဟ့ၣ်နီၤတၢ်မ့ၢ်ဝဲ-သရၣ်ဒိၣ်ဒီးကထၢၣ်အီနၢၣ်ညိၣ်န့ၣ်လီၤ.တၢ်ဂ့ၢ်ခိၣ်တီမ့ၢ်ဝဲ- '' Spiritual Leadership" န့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤလၢ (devices) အိၣ်ဝဲ (၅၁)ခါန့ၣ်လီၤ.

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ်အိၣ်ဒီး တလါတဘျီသးစၢ်တၢ်ရ့လိာ်မုာ်လိာ်ဒီး တၢ်မၤလိလံာ်စီဆှံ လၢဆဲးကျိးန့ၢ်တီၤ ဖဲလါယူၤလံ(၁၉)သီ ဟါ(၇)နၣ်ရံၣ်ႇ ၂ဝ၂၅အနံၤန့ၣ်လီၤ. သရၣ်သိၣ်လိတၢ်မ့ၢ်ဝဲ-သရၣ်စၤလမိၣ်(ကၠိခိၣ်စၢၤ- ကီၢ်တကူၣ်လံာ်စီဆှံကၠိ)န့ၣ်လီၤ.တၢ်သိၣ်လိအခိၣ်တီမ့ၢ်ဝဲ- ''သးစၢ်ဒီးတၢ်သ့ၣ်ညါယွၤဒီး ကဲထီၣ်ယွၤအၦၤကညီ'' န့ၣ်လီၤ. သူၣ်စၢ်သးဘီၣ် ဒီး ၦၤဟဲထီၣ်တၢ်သိၣ်လိတဘျီအံၤ နီၣ်ဂံၢ် ခဲလၢာ်အိၣ်ဝဲ (၁ဝဝ)ဘျဲၣ် လၢ (devices) (၆၈)ခါန့ၣ်လီၤ.