Karen Baptist Convention

ၦၤကညီဘျၢထံခဝ့ၡၢၣ် သရၣ်သမါဝဲၤကျိၤ အိၣ်ဒီးသၢလါတဘျီတၢ်မၤလိ ဒီးဖဲ လါစဲပတ့ဘၢၣ်(၃)သီဟါ (၇)နၣ်ရံၣ် အိၣ်ဒီး တၢ်ဟ့ၣ်ခီဟ့ၣ်နီၤတၢ်ဘၣ်ထွဲ '' ဖိလံၤလၢ ဘၣ်လဲၤအိၣ်လၢကီၢ်ချၢတဖၣ် အတၢ်ကွၢ်ဆၢၣ်မဲာ်'' လၢဆဲးကျိးန့ၢ်တီၤန့ၣ်လီၤ. ၦၤဟ့ၣ်ခီဟ့ၣ်နီၤတၢ်မ့ၢ်ဝဲ- သရၣ်ၡံထူ ဒီး သရၣ်ကလုာ်မူ တဖၣ်န့ၣ်လီၤ. တၢ်မၤလိတဘျီအံၤ ၦၤပၢၤလီၢ်ဆ့ၣ်နီၤမ့ၢ်ဝဲ- သရၣ်ဒိၣ်စၢ်ဟ့ၣ်ဂ့ၤ (ၦၤနဲၣ်တၢ်-သရၣ်သမါဝဲၤကျိၤ) အိးထီၣ်တၢ်ရဲၣ်တၢ်ကျဲၤလၢတၢ်ထုကဖၣ်-သရၣ်မုၣ်ဒီးကထၢၣ်ဂ့ၤဂ့ၤထူ(ၦၤနဲၣ်တၢ်-တၢ်ဘၣ်ထွဲတုၤအိၣ်လိာ်သးဝဲၤကျိၤ), တၢ်ထုကဖၣ်လၢၦၤခဲလၢာ်အဂီၢ်-သရၣ်မုၣ်မၠိမၠိစၣ်(ၦၤနဲၣ်တၢ်- တၢ်ကဟုကယာ်ဒီး တၢ်ကူၣ်လိာ်တၢ်ဝဲၤကျိၤ) ဒီး တၢ်ဆိၣ်ဂ့ၤပျၢ်လၢ-သရၣ်ဒိၣ်ကွၢ်လၢ်ယိၤသးတီ (ၦၤနဲၣ်တၢ်မၤတ့ၢ်တၢ်-သရၣ်သမါဝဲၤကျိၤ) န့ၣ်လီၤ. ၦၤဟဲထီၣ်တၢ်မၤလိခဲလၢာ် (devices) အိၣ်ဝဲ (၇ဝ)ခါန့ၣ်လီၤ. တၢ်မၤလိအံၤ ဘၣ်တၢ်ပာ်ဖှိၣ်မၤသကိးတၢ်ဒီး တၢ်ကဟုကယာ်ဒီး တၢ်ကူၣ်လိာ်တၢ်ဝဲၤကျိၤန့ၣ်လီၤ.

ၦၤကညီဘျၢထံခဝ့ၡၢၣ် လံ၁်လဲၢ်ဒီးတၢ်ဆဲးတၢ်လၤဝဲၤကျိၤ အိၣ်ဒီး တၢ်မၤလိတၢ်ရဲၣ် တၢ်ရဲၣ်တၢ်ကျဲၤလၢ ခိၣ်နၢ်လၢ ကီၢ်ခၢၣ်စးတဖၣ်အဂီၢ် လၢအမ့ၢ် '' တၢ်သ့ကွဲးထါ အကလုာ်ကလုာ်'' (၃)သီ တၢ်မၤလိန့ၣ်လီၤ. တၢ်မၤလိအံၤဘၣ်တၢ်မၤအီၤဖဲ လါအီကူာ် (၂၅-၂၇)သီႇ (၂ဝ၂၆)နံၣ်ႇ လၢ ၁၂၁ (ဃ)ႇ နံၣ်တကယၤတၢ်စံးဘျုးတၢ်သူၣ်ထီၣ် န့ၣ်လီၤ. တၢ်မၤလိတဘျီအံၤ ၦၤလၢ အသိၣ်လိတၢ်တဖၣ်မ့ၢ် ဒ်လာ်အံၤအသိးန့ၣ်လီၤ.
(၁) သရၣ်မုၣ်နီၢ်တကီၤဖီ (တၢ်သ့ကွဲးထါအကလု၁်ကလု၁်)
(၂) သရၣ်ဒိၣ်ဒီးကထၢၣ်စီၤၡမူၤအ့လးတီ (တၢ်မၤလိလံ၁်စီဆှံ)
(၃) သရၣ်ဒိၣ်ဒီးကထၢၣ်စီၤစ့စီ (တၢ်မၤလိလံ၁်စီဆှံ)
(၄) သရၣ်မုၣ်နီၢ်ကလုၢ်မုာ်စိ (Bloom)
(၅) သရၣ်စီၤဆၣ်ထူကီၢ် (Canva)
(၆) သရၣ်မုၣ်နီၢ်ခုၣ်ၡံ (တၢ်ကတိၤလီၤဆီ)
(၇) သရၣ်မုၣ်နီၢ်ဆၢန့ၢ်ဂ့ၤ (Transfer Primer)

တၢ်ကွၢ်စိ 
၁. ဒ်သိးၦၤမၤလိတၢ်ဖိတဖၣ် ကသ့ၣ်ညါလီၤတံၢ် တၢ်သ့ကွဲးထါအကလု၁်ကလု၁် အဂီၢ်
၂.ဒ်သိးၦၤမၤလိတၢ်ဖိတဖၣ် ကသ့ၣ်ညါက့ၤ တၢ်သ့ကွဲးထါ အတၢ်ကဲဘျုး ဒီး ပာ်လုၢ်ပာ်ၦ့ၤ  ဟံးဃ၁်မၤလ့ၤအီၤအဂီၢ်
၃. ဒ်သိးၦၤမၤလိတၢ်ဖိတဖၣ် ကဒိးန့ၢ် တၢ်န၁်န့ၢ်လီၤသးလၢလၢၦဲၤၦဲၤ လၢတၢ်ကွဲး ထါအဂီၢ်
ၦၤဟဲထီၣ်တၢ်မၤလိတဖၣ်မ့ၢ်ဝဲ ကီၢ်(၁၂)ဘ့ၣ် ခၢၣ်စးတဖၣ်အိၣ်ဝဲ (၁၉)ဂၤ ဃု၁်ဒီး ဝဲၤကျိၤၦၤမၤသကိးတၢ် (၄)ဂၤႇ သရၣ်မုၣ်သိၣ်လိတၢ် (၃)ဂၤ ခဲလၢာ် (၂၆)ဂၤ န့ၣ်လီၤ.

ၦၤကညီဘျၢထံခဝ့ၡၢၣ် ယွၤဂ့ၢ်ပီညါဝဲၤကျိၤ အိၣ်ဒီးတၢ်ကွဲးသီထီၣ်က့ၤ လံ၁်ညိၣ်သိၣ်ဒိၣ် လၢလံ၁်စီဆှံကၠိတဖၣ် တၢ်သိၣ်လိ အဂီၢ်လီၤ.လၢတၢ်ရဲၣ်တၢ်ကျဲၤတဘျီအံၤ ကွဲမု၁်ဘၣ်ပကီၢ်အဘ့ၣ်၂ဝလံ၁်စီဆှံကၠိတဖၣ် အကၠိ(Academic Deans)လၢတၢ်မၤ သကိးတၢ်အဂီၢ်လီၤ. Workshop တဘျီအံၤ လံ၁်စီဆှံကၠိတဖၣ် Academic Deans ဟဲထီၣ် ဝဲ(၁၈)ဂၤဒီး သရၣ်မုၣ်လၢ တီခိၣ်ရိၣ်မဲဒီးဟ့ၣ်ခီဟ့ၣ်နီၤတၢ်မ့ၢ်ဝဲ သရၣ်မုၣ်ဒိၣ်ဒီးကထၢၣ် ဟ့ၣ်တၢ်မု၁်(ပ.ဘ.ယ.ဖ) န့ၣ် လီၤ. တၢ်ရဲၣ်တၢ်ကျဲၤအံၤ မ့ၢ်ဝဲ (၂)သီတၢ်ရဲၣ်တၢ်ကျဲၤဒီး ဘၣ်တၢ်မၤအီၤဖဲ လါအီကူ၁် ၁၉သီ-၂ဝသီႇ၂ဝ၂၆နံၣ်ႇ တၢ်လီၢ် တၢ်ကျဲမ့ၢ်ဝဲ ခဝ့ၡၢၣ်နံၣ် တကယၤတၢ်စံးဘျုးတၢ်သူၣ်ထီၣ်ႇ ၁၂၁(ဃ)အလူၢ်ႇ ကညီကရၢၢ်ႇ ဝ့ၢ်တကူၣ်န့ၣ်လီၤ. တၢ်အိးထီၣ် တၢ်ရဲၣ်တၢ်ကျဲၤ ကတီၢ်ဒီးတၢ်ပျၢ်တၢ်ရဲၣ်တၢ်ကျဲၤကတီၢ် အိၣ်ဒီးတၢ်ဘူၣ်သကိးဘါသကိးယွၤဒီး ခဝ့ၡၢၣ်ခိၣ်နၢ်အိၣ်မူအိၣ်ဒါ တဖၣ်စ့ၢ်ကီး ဟဲမၤသကိးတၢ်လၢတၢ်ဘူၣ်တၢ်ဘါတၢ် ရဲၣ်တၢ်ကျဲၤတဖၣ်န့ၣ်လီၤ.

ၦၤကညီဘျၢထံခဝ့ၡၢၣ်ႇ တၢ်ကတဲာ်ကတီၤဒုးဒိၣ်ထီထီၣ်ခိၣ်နၢ်ဝဲၤကျိၤအိၣ်ဒီးတၢ်မၤလိတၢ်ရဲၣ်တၢ်ကျဲၤလၢအမ့ၢ် Administrative Proficiency Training : Office Management (၃) သီတၢ်မၤလိလၢ ခဝ့ၡၢၣ်ဝဲၤလီၢ်ၦၤမၤတၢ်ဖိတဖၣ်အဂီၢ်န့ၣ်လီၤ. တၢ်မၤလိအံၤ ဘၣ်တၢ်မၤအီၤဖဲ လါအီကူာ်(၄-၆)သီႇ ၂ဝ၂၆နံၣ်ႇ လၢ (၃၉၆) ခဝ့ၡၢၣ်တၢ်အိၣ်ဖှိၣ်ဒၢး ဒီးဘၣ်တၢ်သိၣ်လိအီၤလၢ သရၣ်မုၣ်ဒိၣ်ဒီးကထၢၣ်လ့ထူ (ခဝ့ၡၢၣ်နဲၣ်ရွဲၣ်သဃဲၤ) န့ၣ်လီၤ. ၦၤလၢအဟဲထီၣ်တၢ် မၤလိအိၣ်ဝဲ (၂၈)ဂၤ လၢ အမ့ၢ် ဝဲၤလီၤၦၤမၤတၢ်ဖိတဖၣ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်သးခုကစီၣ်ဒီးမံးၡၢၣ်ဝဲၤကျိၤအိၣ်ဒီး တၢ်သဂၢၢ်ဖုသၣ်ဖၠူၣ်နံၣ်(၂ဝဝ)တၢ်သးခုကစီၣ်တၢ်ဟူးတၢ်ဂဲၤ ခီဖျိ ကီၢ်သၢဘ့ၣ် တၢ်ထုကဖၣ်ၦၤဒူၦၤဃိၤတဖၣ်တၢ်ထံၣ်လိာ်သး ဘၣ်တၢ်မၤအီၤလၢ ကီၢ်ဟီကတး ဖဲလါအီကူာ်(၄) တုၤ (၇)သီႇ ၂ဝ၂၆နံၣ် န့ၣ်လီၤ. ကီၢ်သၢဘ့ၣ်လၢမၤသကိးတၢ်မ့ၢ်ဝဲ- ကီၢ်ဟီကတးႇ ကီၢ်မၠီမၠးႇ ကီၢ်ပသံၣ်မၠီမၠး တဖၣ်န့ၣ်လီၤ. တၢ်သိၣ်လိလံာ်စီဆှံလၢ သရၣ်မုၣ်ဒီးကထၢၣ်ဂ့ၤဒိၣ်ႇ ယွၤဘီမုၢ်တၢ်မၤဒီး သူၣ်ဂ့ၢ်သးကျိၤအတၢ်အိၣ်မူလၢ-သရၣ်ဒိၣ်ဒီးကထၢၣ်အဲၣ်မူဒါႇ တၢ်ဒုၣ်တၢ်အီၣ်ဒီးထုကဖၣ်လၢ-သရၣ်မုၣ်ပထြံၡၣ်ဝါႇ တနံၤဘၣ်တနံၤဃုာ်ဒီးခရံာ်-သရၣ်ဒီးကထၢၣ်အဲၣ်ဆံးန့ၣ်လီၤ. အိၣ်ဒီး(၁)သီတၢ်ဒုၣ်တၢ်အီၣ်ထုကဖၣ် စးထီၣ်လါအီကူာ်(၆)သီ ဟါ(၆)နၣ်ရံၣ်ႇ တုၤလါအီကူာ်(၇)သီႇ ဟါ(၆)နၣ်ရံၣ်န့ၣ်လီၤ.

ၦၤပညီဘျၢထံခဝ့ၡၢၣ် ပိာ်ခွါဝဲၤကျိၤ အိၣ်ဒီးတၢ်စူၤခါၦၤပတီၢ်မုၢ်တၢ်မၤလိ တနံၣ်တဘျီ ဖဲလါယူၤအပူၤ လၢမုၢ်ဃုနံၤကိးနွံဒဲးန့ၣ်လီၤ. နၢမူလူၢ် ကညီဘျၢထံခရံာ်တၢ်အိၣ်ဖှိၣ်ႇ ကီၢ်တကူၣ်အိၣ်ဒီးတၢ်မၤသကိးတၢ်ခီဖျိ တူၢ်လိာ်တၢ်မၤလိတၢ်ရဲၣ်တၢ်ကျဲၤဒီးဟ့ၣ်တၢ်လီၢ်တၢ်ကျဲန့ၣ်လီၤ.တနံၣ်အံၤ(၂ဝ၂၆)နံၣ်လါယူၤဒီတလါမုၢ်ဃုနံၤ ကိးနွံဒဲးန့ၣ် ပမၤဘၣ်စ့ၢ်ကီး တၢ်စူၤခါၦၤပတီၢ်မုၢ်တၢ်မၤလိစ့ၢ်ကီးန့ၣ်လီၤ.စးထီၣ်လၢဂီၢ်(၈းဝဝ) တုၤမုၢ်ဆါ(၁၂းဝဝ)နၣ်ရံၣ်ႇ အိၣ်ဒီးတၢ် ဘူၣ်တၢ်ဘါႇ တၢ်သိၣ်လိလံာ်စီဆှံဒီး တၢ်ဟ့ၣ်ခီဟ့ၣ်နီၤတဖၣ်န့ၣ်လီၤ.
သရၣ်ႇ သရၣ်မုၣ်လၢဟ့ၣ်ခီဟ့ၣ်နီၤသိၣ်လိတၢ်တဖၣ်မ့ၢ်ဝဲ-သရၣ်ဒီးကထၢၣ်ဃနိာ်ႇ သရၣ်ဒိၣ်ဒီးကထၢၣ်ဘျုးမူတီႇ သရၣ်ဒိၣ်ဒီးကထၢၣ်ယွၤဘျုးထူ ဒီးသရၣ်မုၣ်ဒိၣ်ဒီးကထၢၣ်ဟ့ၣ်တၢ်မုာ်န့ၣ်လီၤ.ၦၤဟဲထီၣ်တၢ်မၤလိလၢတၢ်အိၣ်ဖှိၣ်(၂ဝ)ဖှိၣ် ပိာ်ခွါတဖၣ်ခၢၣ်စးအိၣ်(၆ဝ)ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ အိၣ်ဒီး တၢ်မၤလိတၢ်ရဲၣ်တၢ်ကျဲၤလၢ ခိၣ်နၢ်လၢကီၢ်သ့ၣ်တဖၣ်အဂီၢ် လၢအမ့ၢ် Advance Leadership Training (၃)သီ တၢ်မၤလိန့ၣ်လီၤ. တၢ်မၤလိအံၤ ဘၣ်တၢ်မၤအီၤဖဲ လါယူၤလံ (၂၈-၃ဝ)သီႇ (၂ဝ၂၆)နံၣ်ႇ ဖဲ ၁၂၁ (ဃ), နံၣ်တကယၤတၢ်စံးဘျုးတၢ်သူၣ်ထီၣ်ႇ တၢ်အိၣ်ဖှိၣ်ဒၢးႇ အလူၣ်ႇ ဝ့ၢ်တကူၣ်န့ၣ်လီၤ. ဖဲ လါယူၤလံ (၂၈) ဂီၤ (၈းဝဝ)နၣ်ရံၣ်ကတီၢ် အိၣ်ဒီး တၢ်အိးထီၣ်တၢ်ဘူၣ်တၢ်ဘါ တၢ်ရဲၣ်တၢ်ကျဲၤႇ ၦၤပၢၤလီၤဆ့ၣ်နီၤမ့ၢ် သရၣ်မုၣ်နီၢ်လ့လ့မၠ့းႇ ၦၤဟ့ၣ်တၢ်ကစီၣ်  ဒီးကထၢၣ်ယိၤအ့လးႇ ၦၤထုကဖၣ်တၢ်ဒီးဆိၣ်ဂ့ၤပျၢ်တၢ်မ့ၢ် သရၣ်ဒိၣ်ယွၤဒုးမူန့ၣ်လီၤ. တၢ်သိၣ်လိတဘျီအံၤ ၦၤသိၣ်လိတၢ်မ့ၢ် Dr.Ivan,Thara S.Nain Than န့ၣ်လီၤ. ၦၤဟဲထီၣ်တၢ်မၤလိတဖၣ်မ့ၢ်ဝဲ ကီၢ်(၁၂)ဘ့ၣ် ခၢၣ်စးတဖၣ် အိၣ်ဝဲ (၁၈)ဂၤ ဃု၁်ဒီးဝဲၤကျိၤၦၤမၤသကိးတၢ် (၄)ဂၤႇ ခဲလၢ၁် (၂၂) ဂၤန့ၣ်လီၤ. တၢ်သိၣ်လိဝံၤဒီး ဖဲလါယူၤလံ (၃ဝ) ဟါ(၄းဝဝ)နၣ်ရံၣ် အိၣ်ဒီးတၢ်မၤလၤကပီၤဒီး တၢ်ဘူၣ်တၢ်ဘါ
တၢ်ရဲၣ်တၢ်ကျဲၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ အိၣ်ဒီး တၢ်မၤလိတၢ်ရဲၣ်တၢ်ကျဲၤလၢ ခိၣ်နၢ်လၢကီၢ်သ့ၣ်တဖၣ်အဂီၢ် လၢအမ့ၢ် ''Coaching and Strategic Human Resource Management Training"(၃)သီ တၢ်မၤလိန့ၣ်လီၤ. တၢ်မၤလိအံၤ ဘၣ်တၢ်မၤအီၤဖဲ လါယူၤလံ (၁-၃)သီႇ ၂ဝ၂၆နံၣ်ႇ လၢ (၁၂၁ီ) တၢ်အိၣ်ဖှိၣ်ဒၢးန့ၣ်လီၤ. ဘၣ်တၢ်သိၣ်လိၦၤလၢ သရၣ်ႇ သရၣ်မုၣ် (၂) ဂၤ ဒီး (၁)တုၤ(၂)သီ ဘၣ်တၢ်သိၣ်လိၦၤလၢ သရၣ် David တၢ်ဂ့ၢ်မ့ၢ်ဝဲ ''Coaching and Strategic Human Resource Management Training" မ့မ့ၢ် (၃.၇.၂၆) သီႇ ဘၣ်တၢ်သိၣ်လိၦၤလၢ သရၣ်မုၣ်စုစုအီၣ်ႇ တၢ်ဂ့ၢ်မ့ၢ်ဝဲ ''Strategic Human Resource Management'' န့ၣ်လီၤ. ၦၤဟဲထီၣ်တၢ်မၤလိတဖၣ်မ့ၢ်ဝဲ ကီၢ်(၁၂)ဘ့ၣ် ခၢၣ်စးတဖၣ် အိၣ်ဝဲ (၂၅)ဂၤ ဃု၁်ဒီးဝဲၤကျိၤၦၤမၤသကိးတၢ် (၃)ဂၤႇ ခဲလၢ၁် (၂၈) ဂၤန့ၣ်လီၤ. ဒီး ကီၢ်လၢဟဲတတုၤသ့ၣ်တဖၣ် ပသုးကျဲၤဝဲဒၣ်လၢ ဆဲးကျိးန့ၢ်တီၤ (zoom) န့ၣ်လီၤ. တချုးပစးထီၣ်ပတၢ်မၤလိ(၃)သီန့ၣ် ဖဲ (၃ဝ.၆.၂၆) သီ ဟါ (၁) နၣ်ရံၣ် တုၤ (၄) နၣ်ရံၣ် အိၣ်ဒီး တၢ်ကတဲ၁်ဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ ၦၤနဲၣ်တၢ်တဖၣ်အိၣ်ဒီး တၢ်ထံၣ် လီၤသးႇ ဒီး တၢ်ကတိၤသကိးတၢ်ဖံးတၢ်မၤအဂ့ၢ်န့ၣ်လီၤ.

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ် အိၣ်ဒီး တၢ်ကတိၤလီၤဆီဘၣ်ထဲဒွီး တၢ်တြီဆၢဒီသဒၢ ကသံၣ်မူၤဘှီး ဒီး တၢ်ပာ်ဖျါထီၣ်တၢ်သးဝံၣ်သတြီၤတဖၣ်အစၢ အတၢ်ရဲၣ်တၢ်ကျဲၤန့ၣ်လီၤ. တၢ်ရဲၣ်တၢ်ကျဲၤအံၤဘၣ်တၢ်မၤအီၤဖဲ လါယူၤ(၂၅)သီႇ ၂ဝ၂၆နံၣ်ႇ ဟါ(၇)နၣ်ရံၣ် လၢဆဲးကျိးန့ၢ်တီၤန့ၣ်လီၤ. တၢ်ရဲၣ်တၢ်ကျဲၤတဘျီအံၤ ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်ဒူတီ(တၢ်ရဲၣ်တၢ်ကျဲၤမူဒါခိၣ်), ၦၤဟ့ၣ်ခီဟ့ၣ်နီၤတၢ်-သရၣ်ဟဲရံၣ်နူန့ၣ်လီၤ.တၢ်ကတိၤလီၤဆီဝံၤ ပိာ်ထွဲထီၣ်အခံလၢ တၢ်တဲဖျါ အတၢ်သးဝံၣ် သတြီၤအစၢ ဒီး ၦၤမၤန့ၢ် ခိၣ်ဖးတၢ- ကီၢ်ပသံၣ်မၠီမၠးႇ ခိၣ်ဖးခံ-ကီၢ်တီအူပကူႇ ခိၣ်ဖးသၢ- တီအူကီၢ်ကဲၤခၢၣ်ကဲၤဘါ တဖၣ်န့ၣ်လီၤ. စံၣ်ညီၣ်ကွီၢ်တဖၣ်မ့ၢ်ဝဲ-သရၣ်မုၣ်ဖီသီသီႇ သရၣ်န့ၢ်ကညီ ဒီး သရၣ်လုၢ်ၦ့ၤဒိၣ်တဖၣ်န့ၣ်လီၤ. ပျၢ်က့ၤတၢ်ရဲၣ်တၢ်ကျဲၤတဘျီအံၤလၢ သရၣ်တီလိၤမူ (ၦၤနဲၣ်တၢ်) အတၢ်ထုကဖၣ်န့ၣ်လီၤ. ၦၤဟဲထီၣ် (devices)ခဲလၢာ်အိၣ်ဝဲ (၆၇)ခါန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကဟုကယာ်ဒီးတၢ်ကူၣ်လိာ်တၢ်ဝဲၤကျိၤအိၣ်ဒီး တၢ်ကတိၤလီၤဆီ ဘၣ်ထွဲၦၤလၢလဲၤဟးဖံးဟးမၤတၢ်လၢ ကီၢ်စ့ကဖိတဖၣ်ဒီး ၦၤလၢအိၣ်ကတဲာ်ကတီၤအသးလၢ ကလဲၤတဖၣ်အဂီၢ်တၢ်လၢ ကြၢးသ့ၣ်ညါတဖၣ်ဒီးတၢ်လဲၤခီဖျိတဖၣ်န့ၣ်လီၤ. တၢ်ကတိၤလီၤဆီအံၤ ဘၣ်တၢ်မၤအီၤဖဲ လါယူၤ(၂၅)သီႇ ၂ဝ၂၆အနံၤ ဟါ(၆)နၣ်ရံၣ်လၢ ဆဲးကျိးန့ၢ်တီၤန့ၣ်လီၤ.သရၣ်ႇ သရၣ်မုၣ်လၢ ဟ့ၣ်ခီဟ့ၣ်နီၤတၢ်တဖၣ်မ့ၢ်ဝဲ-သရၣ်ဖံထၢၣ် ဒီးသရၣ်မုၣ်ဒိၣ်ဒီးကထၢၣ်လ့ဒံၢ်ယၢၣ်ဖိတဖၣ်န့ၣ်လီၤ. ၦၤဟဲထီၣ်ခဲလၢာ် devices (၃၇) ခါန့ၣ်လီၤ.