Karen Baptist Convention

(၂၀၂၅ - ၂၀၂၆)တၢ်မၤနံၣ်, ကီၢ်ချၢၣ်လွံၢ်ထူၣ်အိၣ်ဒီးကမျၢၢ်ခၢၣ်စးတၢ်အိၣ်ဖှိၣ် ဖဲလါမၢ်ၡး (၂၀)သီ ဒီး (၂၁)သီ, (၂၀၂၆)နံၣ် လၢရိမုၥ်ပၢၤခရံၥ်တၢ်အိၣ်ဖှိၣ်, ကဝီၤနီၣ်ဂံၢ်(၂)န့ၣ်လီၤ. ဖဲ(၂၀.၃.၂၀၂၆)နံၤ, ဟါ(၄:၀၀)တုၤ(၆:၀၀)နၣ်ရံၣ် အိၣ်ဒီး တၢ်အိးထီၣ်တၢ်အိၣ်ဖှိၣ်တၢ်ရဲၣ်တၢ်ကျဲၤ, ၦၤစံၣ်တဲၤတဲလီၤတၢ်မ့ၢ် သရၣ်ဒိၣ်စူၤမ့းအိၣ်န့ၣ်လီၤ. 
ဖဲ(၂၁.၃.၂၀၂၆)နံၤ ဂီၤ(၇:၀၀)နၣ်ရံၣ် အိၣ်ဒီးဂီၤတၢ်ဘါ, (၉:၀၀)နၣ်ရံၣ်တုၤ(၁၂:၃၀)နၣ်ရံၣ်မ့ၢ်တၢ်ဖံးတၢ်မၤကတီၢ်, တၢ် ဟ့ၣ်ကူၣ်ဟ့ၣ်ဖးဒီးတၢ်စံၣ်ညီၣ်အၢၣ်လီၤကတီၢ်န့ၣ်လီၤ. ဟါ(၁:၀၀)နၣ်ရံၣ်တုၤ(၂:၃၀)နၣ်ရံၣ်မ့ၢ် တနံၣ်တဘျီတၢ်ဘါကတီၢ်, ၦၤစံၣ် တဲၤတဲလီၤတၢ်မ့ၢ်သရၣ်ဒီးကထၢၣ်န့ၢ်လ့အီၣ်(ၦၤနဲၣ်တၢ်သဃဲၤ, တၢ်သးခုကစီၣ်ဒီးမံးၡၢၣ်ဝဲၤကျိၤ, ၦၤကညီဘျၢထံခဝ့ၡၢၣ်), ၦၤထု ကဖၣ်တၢ်မ့ၢ်သရၣ်ဒိၣ်ယွၤဒုးမူ(ၦၤကညီဘျၢထံခဝ့ၡၢၣ်နဲၣ်ရွဲၣ်)န့ၣ်လီၤ.
လၢတၢ်အိၣ်ဖှိၣ်တဘျီအံၤအိၣ်ဒီး တၢ်မၤလၤကပီၤ ခိၣ်နၢ်လၢအိၣ်ဘှံးက့ၤလၢတၢ်ဖံးတၢ်မၤမ့ၢ်ဂ့ၤ, ခိၣ်နၢ်လၢအသးအ နံၣ်လါ(၇၀)ဆူအဖီခိၣ်မ့ၢ်ဂ့ၤ, သးစၢ်လၢဖျိးစိဒီး ၦၤလၢဒိးန့ၢ်ခိၣ်ဖး လၢခဝ့ၡၢၣ်ကတီၢ်တၢ်သတြီၤကတီၢ်တဖၣ်န့ၣ်လီၤ. ကမျၢၢ်ခၢၣ် စးတၢ်အိၣ်ဖှိၣ်တဘျီအံၤ ၦၤဟဲဆဲးလီၤမံၤအိၣ်(၁၃၈)ဂၤန့ၣ်လီၤ. 
ဖဲတၢ်အိၣ်ဖှိၣ်ဝံၤ (၂၂.၃.၂၀၂၆)နံၤ, ရိမုၥ်ပၢၤတၢ်အိၣ်ဖှိၣ်အိၣ်ဒီး တၢ်ပၥ်ဂၢၢ်ပၥ်ကျၢၤ တၢ်အိၣ်ဖှိၣ်သရၣ်တံၢ်နီၢ် လၢအမ့ၢ် သရၣ်ကဲဘျုးထူအတၢ်ရဲၣ်တၢ်ကျဲၤန့ၣ်လီၤ. ကဝီၤခိၣ်နၢ်, ကီၢ်ခိၣ်ကီၢ်နၢ်, ကလူး(တမှံၤ)ဒီး တၢ်အိၣ်ဖှိၣ်ဖိသ့ၣ်တဖၣ် ဟဲသးဖှံဃုၥ် ဒီးမိၢ်တၢ်အိၣ်ဖှိၣ်လၢတၢ်ရဲၣ်တၢ်ကျဲၤတဘျီအံၤန့ၣ်လီၤ.
       သရၣ်ဒီးကထၢၣ် J စဲခ့ၣ်

ကီၢ်ပသံၣ်မၠီမၠး စှီၤဘျၢထံကညီခရံၥ်ဖိတၢ်အိၣ်ဖှိၣ်သကိးတၢ်အိၣ်ဖှိၣ် ကီၢ်တၢ်အိၣ်ဖှိၣ်ဖးဒိၣ်(၁၇၇)ဘျီတဘျီ ဘၣ်တၢ်မၤအီၤဖဲ ဖီမုၢ်သန့ တၢ်အိၣ်ဖှိၣ်, သၣ်ပိယ့ၣ်ကၠံၣ်ကဝီၤ , လါမၢ်ၡး(၁၉-၂၂)သီ, (၂၀၂၆)နံၣ်န့ၣ်လီၤ. 
ဖဲ(၁၉.၃.၂၀၂၆)နံၤ ဟါ(၅း၀၀)နၣ်ရံၣ် မ့ၢ်ဝဲတၢ်အိးထီၣ် ကီၢ်တၢ်အိၣ်ဖှိၣ်, တၢတပတီၢ် တၢ်တံၥ်တဲၥ်သတိၢ်ပျံၤ ဘၣ်တၢ်မၤအီၤလၢ တၢ်ဘါရူၢ်အမဲၥ်ညါန့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ သရၣ်ဒိၣ်ဧ့ြစၤဒီး ၦၤထုကဖၣ်မ့ၢ်ဝဲ သရၣ်ဒိၣ်ဘူၣ်ဂ့ၤ, ၦၤတံၥ်တဲၥ်သတိၢ်ပျံၤတဖၣ်မ့ၢ်ဝဲ သရၣ်ဒိၣ် အဲၣ်ဝါခၠံး(ကီၢ်ခိၣ်), သရၣ်ဒိၣ်မူလၢၢ်ဂ့ၤ(ကီၢ်နဲၣ်ရွဲၣ်)ဒီးသရၣ်ဒီးကထၢၣ်တနၢ်ထူ (ၦၤနဲၣ်တၢ်, ထုးထီၣ်ရၤလီၤ လံၥ်လဲၢ်ဝဲၤကျိၤ, ၦၤကညီဘျၢ ထံခဝ့ၡၢၣ်)န့ၣ်လီၤ. တံၥ်တဲၥ်သတိၢ်ပျံၤဝံၤ ၦၤဂီၢ်မုၢ်တဖၣ် လဲၤနုၥ်ဆူရူၢ်ပူၤန့ၣ်လီၤ.
တၢ်ရဲၣ်တၢ်ကျဲၤခံပတီၢ်တပတီၢ် ၦၤပၢၤလီၢ်ဆ့ၣ်နီၤမ့ၢ်ဝဲ သရၣ်ဒိၣ်လ့မီ(နဲၣ်ရွဲၣ်သဃဲၤ)အိၣ်ဒီးကဝီၤတၢ်တူၢ်လိၥ်တၢ်ရဲၣ်တၢ်ကျဲၤဒီး ၦၤစံၣ် တဲၤတဲလီၤတၢ်မ့ၢ်ဝဲ သရၣ်ဒိၣ်အဲၣ်ဝါခၠံး(ကီၢ်ခိၣ်)န့ၣ်လီၤ. တနံၤဘၣ်တနံၤ တၢ်ရဲၣ်တၢ်ကျဲၤတၢ်ဘါတဖၣ် ဘၣ်တၢ်သုးကျဲၤမၤအီၤ တသီဘၣ်တသီ ၦဲၤဒီးယွၤအတၢ်ဆိၣ်ဂ့ၤန့ၣ်လီၤ. (၂၂.၃.၂၀၂၆)မုၢ်နံၤဒိၣ်ဂီၤ(၁ဝး၃၀)နၣ်ရံၣ်မ့ၢ်ဝဲ တနံၣ်တဘျီတၢ်ဘူၣ်တၢ်ဘါတၢ်ရဲၣ်တၢ်ကျဲၤ, ၦၤပၢၤလီၢ်ဆ့ၣ် နီၤမ့ၢ်ဝဲ သရၣ်ဒိၣ်အဲၣ်ဝါခၠံး(ကီၢ်ခိၣ်)ဒီး ၦၤစံၣ်တဲၤတဲလီၤတၢ်မ့ၢ်ဝဲ သရၣ်ဒိၣ်ခရံၥ်စတိၣ်ဖၢၣ်ဒ့(ကၠိခိၣ်ဒိၣ်, ပ.ဘ.ယ.ဖ), လၢတၢ် ဘူၣ်တၢ်ဘါတဘျီအံၤ အိၣ်ဒီးတၢ်မၤလၤကပီၤ သရၣ်မုၣ်မၢမရ့ၣ်(အိၣ်ဘှံးလၢ ခ.တ. ၦၤနဲၣ်တၢ်), ကီၢ်တၢ်အိၣ်ဖှိၣ်တဘျီအံၤ ဘၣ်တၢ်မၤကတၢၢ်က့ၤအီၤလၢ တၢ်ပၥ်စီဆှံသး တၢ်ဘူၣ်တၢ်ဘါတၢ်ရဲၣ်တၢ်ကျဲၤန့ၣ်လီၤ.
လၢတၢ်အိၣ်ဖှိၣ်တဘျီအံၤအိၣ်ဒီး တၢ်စံၣ်ညီၣ်အၢၣ်လီၤလၢ သရၣ်မုၣ်ဒီးကထၢၣ်ပထြံၡၣ် ကမ့ၢ်ဝဲ ခ.တ ၦၤနဲၣ်တၢ် စးထီၣ်(၂၀၂၆)နံၣ် ဒီးသရၣ်ဒိၣ်ဟ့ၣ်မၤ ကမ့ၢ်ဝဲ နံၣ်ကယၤ(၂၁)မူဒါခိၣ်, (၂၀၂၇)နံၣ် ကဝီၤလၢ ကတူၢ်လိၥ်ကီၢ်တၢ်အိၣ်ဖှိၣ်မ့ၢ်ဝဲ သီၣ်တွဲကဝီၤဒီးကီၢ်ခိၣ်ကမ့ၢ်ဝဲ သရၣ်ဒိၣ်စ့ဟဲ (သၣ်ယၣ်ကိတၢ်အိၣ်ဖှိၣ်)န့ၣ်လီၤ. တၢ်အိၣ်ဖှိၣ်တဘျီအံၤ ၦၤကညီဘျၢထံခဝ့ၡၢၣ်ခၢၣ်စး သရၣ်မုၣ်ဒီးကထၢၣ်မူမုၢ်ဝါ(ၦၤနဲၣ်တၢ်, ယွၤဂ့ၢ်ပီညါဝဲၤကျိၤ) ဒီး သရၣ်ဒီးကထၢၣ်တနၢ်ထူ(ၦၤနဲၣ်တၢ်, ထုးထီၣ်ရၤလီၤလံၥ်လဲၢ်ဝဲၤကျိၤ)တဖၣ် ဟဲအိၣ်သကိးဘၣ်ဝဲဒၣ်န့ၣ်လီၤ.

ကီၢ်ပၠံၣ်-သၣ်ယၣ်ဝတံၣ် ၦၤကညီဘျၢထံခရံာ်ဖိတၢ်အိၣ်ဖှိၣ်သကိးတၢ်အိၣ်ဖှိၣ် အိၣ်ဒီးကမျၢၢ်ခၢၣ်စးတၢ်အိၣ်ဖှိၣ်  ဘၣ်တၢ်မၤအီၤဖဲ စံဖၠူၣ်ယိတၢ်အိၣ်ဖှိၣ်ႇ သၣ်ယၣ်ဝတံၣ်ကဝီၤဖဲ ၂၇-၂၈.၃.၂ဝ၂၆အနံၤန့ၣ်လီၤ. တၢ်အိၣ်ဖှိၣ်အံၤတုၤဖှိၣ် ဒီး တၢ်အိးထီၣ်တၢ်ရဲၣ်တၢ်ကျဲၤ ဘၣ်တၢ်မၤအီၤဖဲ ၂၆.၃.၂ဝ၂၆အနံၤ ဟါ ၆:၃ဝနၣ်ရံၣ်န့ၣ်လီၤ. အိၣ်ဒီး တၢ်တိာ်ထူလၢ အမ့ၢ် ''ကီခဲဒၣ်ဝဲ အိၣ်ဂၢၢ်ကျၢၤ စၢ်ခရံာ်မ့ၢ်ပတၢ်မၤနၢၤ '' (ယိၤဟၣ် ၁၆:၃၃, ၁ယိၤဟၣ် ၅:၄, ၂ကရံၣ်သူး ၄:၈ န့ၣ်လီၤ. တၢ်အိၣ်ဖှိၣ်တဘျီအံၤ ၦၤဟဲဆဲးလီၤမံၤအိၣ်ဝဲ (၁၄၂)ဂၤ ဒီးတၢ်ပျၢ်က့ၤတၢ်ရဲၣ်တၢ်ကျဲၤဖဲ ၂၈.၃.၂ဝ၂၆အနံၤ ဟါ(၅)နၣ်ရံၣ်န့ၣ်လီၤ.ၦၤကညီဘျၢထံခဝ့ၡၢၣ်ခၢၣ်စး သရၣ်မုၣ်မၠိမၠိစၣ် (တၢ်ကဟုကယာ်ဒီး တၢ်ကူၣ်လိာ်တၢ်ဝဲၤကျိၤ ၦၤနဲၣ်တၢ်) လဲၤဆူတၢ်အိၣ်ဖှိၣ်တဘျီအံၤန့ၣ်လီၤ.

ကီၢ်တကူၣ် ၦၤကညီဘျၢထံခရံာ်ဖိထံလီၢ်ကီၢ်ပူၤ တၢ်အိၣ်ဖှိၣ်သကိးတၢ်အိၣ်ဖှိၣ်အိၣ်ဒီး တနံၣ်တဘျီ(သွ့ကီလါ) တၢ်အိၣ်ဖှိၣ်ဖးဒိၣ်(၁၇၂)ဘျီတဘျီ, ဘၣ်တၢ်မၤအီၤဖဲ လါမၢ်ၡး(၁၁-၁၅)သီႇ ၂ဝ၂၆နံၣ်ႇ ဖဲ ဖြဲးဘျီၣ်ရိဖှိၣ်န့ၣ်လီၤ .တၢ်တူၢ်လိာ်ဟါတၢ်ရဲၣ်တၢ်ကျဲၤ ဘၣ်တၢ်မၤအီၤဖဲ လါမၢ်ၡး(၁၁)သီဟါႇ (၂)နၣ်ရံၣ်န့ၣ်လီၤ.ပိာ်ထွဲထီၣ်အခံဒီး ကဝီၤတၢ်တူၢ်လိာ်ႇ တၢ်ဟ့ၣ်လီၤလံာ်အုၣ်သးဆူ ၦၤလၢအမၤလိဖျိထီၣ် ၦၤကညီဘျၢထံခဝ့ၡၢၣ်တၢ်မၤလိ လံာ်စီဆှံခီဖျိတၢ်ကဲွး(၈)ဂၤအတၢ်ရဲၣ်တၢ်ကျဲၤႇ ဒီး ဟါ(၆)နၣ်ရံၣ်ကတီၢ် အိၣ်ဒီး ကီၢ်ကျဲးစၢးကရၢဃံာ်လွံၢ်တၢ်သးဝံၣ် သတြီၤန့ၣ်လီၤ.အိၣ်ဒီးနဲၣ်ရွဲၣ်ႇ ဝဲၤကျိၤ(၈)ကျိၤႇ ကရၢ(၄)ခါ ဒီး ကမံးတံာ်(၁၁)ဖုတဖၣ် အတၢ်ပာ်ဖျါႇ တၢ်စံၣ်ညီၣ် အၢၣ်လီၤႇ တၢ်ဂ့ၢ်ဆှၢထီၣ်တဖၣ်န့ၣ်လီၤ. ကိးနံၤဒဲး ဟါ(၆)အဆၢကတီၢ်စ့ၢ်ကီး အိၣ်ဒီးတၢ်ရဲၣ်တၢ်ကျဲၤလီၤဆီတဖၣ်ႇ တၢ်သတြီၤတဖၣ်န့ၣ်လီၤ.တၢ်အိၣ်ဖှိၣ်တဘျီအံၤအိၣ်ဒီး တၢ်မၤလၤကပီၤ သရၣ်အဲၣ်ဒမၢၣ်ထိသါ (ကီၢ်တကူၣ် ၦၤကညီဘျၢထံခရံာ်ဖိ သူၣ်စၢ်သးဘီၣ်ကျဲးစၢးကရၢႇ နဲၣ်ရွဲၣ်)လၢ အိၣ်ဘှံးလၢ တၢ်မၤန့ၣ်လီၤ.တနံၣ်တဘျီသွ့ကီလါ တၢ်အိၣ်ဖှိၣ် တၢ်ပာ်ဖှိၣ်ဘါသကိးယွၤ ဖဲလါမၢ်ၡး(၁၅)သီ မုၢ်ဆါ(၁ဝ)နၣ်ရံၣ်အဆၢကတီၢ်န့ၣ်လီၤ. တၢ်ကစီၣ်ဘၣ်တၢ်ဟ့ၣ်ခီဟ့ၣ်နီၤအီၤလၢ သရၣ်ဒိၣ်ဒီးကထၢၣ်အဲၣ်မူဒါ(ကီၢ်ဟီကတး), တၢ်ထုကဖၣ်လၢ- သရၣ်ဒိၣ်အဲးဒဝၢး(ခဝ့ၡၢၣ်ခၢၣ်စး) ဒီး တၢ်ထုကဖၣ်ကျၢၢ်တံၢ်လၢ-သရၣ်မုၣ်ဒီးကထၢၣ်ဂ့ၤဂ့ၤထူ(ခဝ့ၡၢၣ်ခၢၣ်စး) န့ၣ်လီၤ. တၢ်အိၣ်ဖိှၣ်တဘျီအံၤ အိၣ်ဒီးတၢ်တူၢ်လိာ် ဖီတၤဆှူၣ်တၢ်အိၣ်ဖှိၣ်(တဲးကၠဲသၣ်ယၣ်ဝတံၣ်ကဝီၤ), ကွဲအ့တၢ်အိၣ်ဖှိၣ် (ကီၢ်ဖှိၣ်နီကဝီၤ), ဒ်ကီၢ်အတၢ်အိၣ်ဖှိၣ် တံၢ်နီၣ်အသိးန့ၣ်လီၤ.မ့ၢ်လၢတၢ်အိၣ်ဖှိၣ်အါထီၣ်(၂)ဖှိၣ်အဃိ ကီၢ်အတၢ်အိၣ်ဖှိၣ်ခဲလၢာ် အိၣ်ဝဲ(၃၅၄)ဖှိၣ် န့ၣ်လီၤ.ကီၢ်အံၤအိၣ်ဒီး ကဝီၤ(၁၅)ကဝီၤ ဒီးတကရူၢ်လၢတၢ်ပာ်ဖှိၣ်မၤသကိးတၢ်န့ၣ်လီၤ.ကီၢ်တူၢ်လိာ်တၢ်မ့ၢ်ဝဲ ကီၢ်ဖှိၣ်နီကဝီၤ န့ၣ်လီၤ. နံၣ်လၢကဟဲ ကီၢ်လၢကတူၢ်လိာ် ကီၢ်တၢ်အိၣ်ဖှိၣ်မ့ၢ်ဝဲ- ပကိကလံၤစိးကဝီၤန့ၣ်လီၤ. တၢ်အိၣ်ဖှိၣ်တဘျီအံၤ ခၢၣ်စးလၢဟဲထီၣ် ခဲလၢာ်အိၣ်ဝဲ(၄၃ဝ)ဂၤန့ၣ်လီၤ.

မ့ၢ်လၢကစၢ်ယွၤအဘျုးအဖှိၣ်အတၢ်ဆိၣ်ဂ့ၤအဃိ တနံၣ်အံၤဒိးန့ၢ်ဘၣ်တၢ်ခွဲးတၢ်ယာ်လၢ လဲၤတုၤအိၣ်သကိး ဒီးမၤသကိးဘၣ်တၢ်လၢကီၢ်ကယါဘျၢထံလံာ်စီဆှံကၠိႇတၢ်ပျၢ်ကၠိတၢ်ရဲၣ်တၢ်ကျဲၤန့ၣ်လီၤ. တၢ်ရဲၣ်တၢ်ကျဲၤအံၤဘၣ်တၢ်မၤအီၤဖဲ ကွဲၢ်သီဒီတၢ်ဘါယွၤသ ရိာ် ဒီးတၢ်ဆၢကတီၢ်မ့ၢ်ဝဲ၈.၁.၂ဝ၂၆နံၣ် ဂီၤ၉:ဝဝနၣ်ရံၣ်
န့ၣ်လီၤ. ၂ဝ၂၅-၂ဝ၂၆တၢ်မၤလိနံၣ်အဂီၢ်ၦၤဖျိထီၣ်L.Th ၅ဂၤ Special ၈ဂၤ  BTs ၉ဂၤ ခဲလၢာ်ပာ်ဖှိၣ်၂၂ဂၤန့ၣ်လီၤ. လၢတၢ်ပျၢ်ကၠိတၢ်ရဲၣ်တၢ်ကျဲၤအပူၤအိၣ်ဃု၁်ဒီး တၢ်မၤလၤကပီၤ သရၣ်ဆၢန့ၢ်အ့ (သရၣ်သိၣ်လိတၢ်လၢာ်ဆၢလၢာ်ကတီၢ်) လၢအမၤသကိးတၢ်ဒီးကၠိအံၤ ၦဲၤထီၣ်(၂ဝ)နံၣ်အဃိန့ၣ်လီၤ.တၢ်ဆၢကတီၢ်ႇ တၢ်အိၣ်သးတၢ်ကီတၢ်ခဲ တၢ်ဘၣ်ယိၣ်အလီၢ်
အိၣ်ဝဲသနာ်က့ တၢ်ပျၢ်ကၠိတၢ်ရဲၣ်တၢ်ကျဲၤဘၣ်တၢ်မၤဝံၤအီၤ ဃံဃံလၤလၤ ခီဖျိယွၤအဘျုးအတၢ်ဆိၣ်ဂ့ၤအဃိန့ၣ်လီၤ.

ၦၤကညီဘျၢထံခရံာ်ဖိ တၢ်အိၣ်ဖှိၣ်သကိးတၢ်အိၣ်ဖှိၣ် ကီၢ်ချၢၣ်လွံၢ်ထူၣ် ဖဲ၁၆.၁ဝ.၂ဝ၂၅နံၣ်ဂီၤ (၉းဝဝ)နၣ်ရံၣ်အိၣ်ဒီး တၢ်ဒိးပာ်စုကီၢ်နဲၣ်ရွဲၣ် သရၣ်အဲၣ်ဝါအတၢ်ရဲၣ်တၢ်ကျဲၤန့ၣ်လီၤ. တၢ်ရဲၣ်တၢ်ကျဲၤတဘျီအံၤ ဘၣ်တၢ်မၤအီၤဖဲ တီလိၤလိာ်ကညီဘျၢထံ ခရံာ်တၢ်အိၣ်ဖှိၣ်ကဝီၤ နီၣ်ဂံၢ်(၁)ႇ တၢ်ဘါယွၤသရိာ်န့ၣ်လီၤ. ၦၤဟ့ၣ်တၢ်ကစီၣ်မ့ၢ်ဝဲ-သရၣ်ဒိၣ်ဒီးကထၢၣ်ရTၣ်ကၠါ(ကၠိခိၣ်စၢၤႇ ပ.ဘ.ယ.ဖ)ႇ ၦၤဟ့ၣ်ဂံၢ်ဟ့ၣ်ဘါသရၣ်မ့ၢ်ဝဲ- သရၣ်ဒိၣ်တီသးဖှံ(ကီၢ်ပသံၣ်မၠီမၠး)ႇ တၢ်ကတိၤဟ့ၣ်ဂံၢ်ဟ့ၣ်ဘါထံဖိကီၢ်ဖိ-သရၣ်ဒိၣ်ထြူဒၢၣ်ဝ့(ကဝီၤနီၣ်ဂံၢ်ခံ ကဝီၤခိၣ်)ႇ ၦၤလၢဘါထုကဖၣ်တၢ်မ့ၢ်ဝဲ-သရၣ်ဒိၣ်ယွၤဒုးမူ(နဲၣ်ရွဲၣ်ႇ ၦၤကညီဘျၢထံခဝ့ၡၢၣ်)ဒီးတၢ်ထုကဖၣ် ကျၢၤတံၢ်လၢ မိသရၣ်မုၣ်အဲလံစဘဲး ဒီးတၢ်ကတိၤစံးဘျုးလၢ သရၣ်မုၣ်စံၣ်စံၣ်ဖီသ့ၣ်တဖၣ်န့ၣ်လီၤ.သရၣ်ဒိၣ်လၢပာ်ထီၣ်အစုလၢ သရၣ်အလိၤတဖၣ်-(၁)သရၣ်ဒိၣ်စူၤမ့းအိၣ် (၂)သရၣ်ဒိၣ်ဒ့နၣ်ထွါ(၃) သရၣ်ဒိၣ်အိၣ်ခုၣ်(ကညီမၤဒၣ်တၢ်)ႇ(၄)သရၣ်ဒိၣ်ထြူမဲ(ကီၢ်ဖၣ်အၣ်မီၣ်လမၠဲၣ်)ႇ(၅)သရၣ်ဒိၣ်ဘ့လ့ၣ်ဘဲွႇ (၆)သရၣ်ဒိၣ်ဆဲးဖး(ပ.ဘ.ယ.ဖ) (၇)သရၣ်ဒိၣ်ထူၦဲၤဖီတဖၣ်န့ၣ်လီၤ.

ဖဲလါအီကူ၁် (၂၈)သီႇ ၂ဝ၂၅နံၣ် ကီၢ်ပကိတကူၣ်ႇ ဝဲၤလီၢ်ၦၤမၤသကိးတၢ်အဂီၢ်အိၣ်ဒီး တၢ်မၤလိအဘၣ်ထွဲဒီး Data Security န့ၣ်လီၤ. ၦၤဟဲထီၣ်တၢ်မၤလိသ့ၣ်တဖၣ်အိၣ်ဝဲ (၁၃)ဂၤန့ၣ်လီၤ. ခီဖျိ ကီၢ်ပကိတကူၣ် တၢ်ဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤဒီးတၢ်ဘၣ်ထွဲတုၤအိၣ်လိ၁်သးဝဲကျိၤ သ့ၣ်တဖၣ်မၤသကိးတၢ်ဒီး ကွဲမု၁် သရၣ်ကၠဲးစၢၣ်ကၠါ(ခဝ့ၡၢၣ်တၢ်ဘၣ်ထွဲတုၤအိၣ်လိ၁်သးဝဲၤကျိၤႇ ၦၤနဲၣ်တၢ်သဃဲၤ) န့ၣ်လီၤ. စိၤဆၢကတီၢ်ခဲအံၤ တၢ်လၢကမၤလီၤပှီၢ်ကွံ၁်ၦၤကျဲတဘိလၢအမ့ၢ် တၢ်ဟုၣ်န့ၢ်ပတၢ်လၢ Online နတကပၤန့ၣ် အိၣ်ဝဲဒၣ်အါမးအဃိ ပနီၢ်ကစၢ်မ့ၢ်ဂ့ၤႇ ပတၢ်ကရၢကရိအဂီၢ်မ့ၢ်ဂ့ၤန့ၣ် ပဘၣ်အိၣ်ဒီးတၢ်ပလီၢ်ပဒီပသးလၢ တၢ်သူတၢ် ပီးတၢ်လီသ့ၣ်တဖၣ်အဖီခိၣ်န့ၣ် မ့ၢ်တၢ်ဟ့ၣ်ဒုးပလီၢ်အကျိၤအကျဲသ့ၣ်တဖၣ် လၢၦၤဟံးန့ၢ်ပတၢ်န့ၢ်သါကသ့ဒ်လဲၣ် သ့ၣ်တဖၣ်န့ၣ်လီၤ. ၦၤထီၣ်တၢ်မၤလိသ့ၣ်တဖၣ်အိၣ်ဒီး တၢ်ဟ့ၣ်ခီဟ့ၣ်နီၤလိ၁်သးတၢ်လဲၤခီဖျိသ့ၣ်တဖၣ်စ့ၢ်ကီး န့ၣ်လီၤ.

ကီၢ်ပသံၣ်မၠီမၠး ခိၣ်နၢ်ဒီး ၦၤကညီဘျၢထံခဝ့ၡၢၣ်ခိၣ်နၢ်တနီၤ ထံၣ်လိာ်တၢၣ်ပီၣ်တၢၣ်ပီ အိၣ်ဖှိၣ်သကိးလၢ တၢ်ကတူၢ်လိာ်ခဝ့ၡၢၣ်ကမျၢၢ်ခၢၣ်စး တၢ်အိၣ်ဖှိၣ်အဂီၢ် ဖဲ လါအီကူာ်(၁၂)သီ ဂီၤ(၁၁)နၣ်ရံၣ် ဖဲ ကီၢ်ပသံၣ်မၠီမၠး ကီၢ်ဝဲၤလီၢ်တၢ်အိၣ်ဖှိၣ်ဒၢးန့ၣ်လီၤ. တၢ်ထံၣ်လိာ်အိၣ်ဖှိၣ်သကိး တဘျီအံၤ သရၣ်ဒိၣ်ယွၤဒုးမူ (ခဝ့ၡၢၣ်နဲၣ်ရွဲၣ်) ဒီး သရၣ်ဒိၣ်မူလၢၢ်ဂ့ၤ(ကီၢ်ပသံၣ်မၠီမၠး နဲၣ်ရွဲၣ်)တဖၣ် တီခိၣ်ရိၣ်မဲ ဒီး ကီၢ်ဝဲၤလီၢ် ၦၤဘၣ်မူဘၣ်ဒါတဖၣ်ႇ ကီၢ်နဲၣ်ရွဲၣ်သဃဲၤႇ ကီၢ်ၦၤပၢၤစ့ႇ ကီၢ်ဝဲၤဒၢးခိၣ်ႇ ဝဲၤကျိၤၦၤနဲၣ်တၢ်ႇ ဒီး ခဝ့ၡၢၣ်နဲၣ်ရွဲၣ်သဃဲၤႇ ၦၤနဲၣ်တၢ်တနီၤစံး ကတိၤတၢၣ်ပီၣ် သကိးဝဲဒၣ်န့ၣ်လီၤ. တၢ်တူၢ်လိာ် ခဝ့ၡၢၣ်ကမျၢၢ်ခၢၣ်စး တၢ်အိၣ်ဖှိၣ် တယးပာ်တၢ်ဆၢကတီၢ်ကမ့ၢ်ဝဲဖဲ- လါဒံၢ်စ့ဘၢၣ်(၃၁) သီႇ ၂ဝ၂၅အနံၣ် တုၤလါ ယနူၤအါရံၤ (၄)သီႇ ၂ဝ၂၆အနံၣ်န့ၣ်လီၤ.

ကီၢ်တီအူ-သၣ်တီၣ်ဘှဲမိၤၦၤတၢ်ကစီၣ် န့ဆၢၣ်တၢ်ကွၢ်ဆၢၣ်မဲ၁်ခီဖျိ ဟီၣ်ခိၣ်လီၤပှီၢ် ကီၢ်တီအူ-သၣ်တီၣ်ဘှဲမိၤၦၤဖိလံၤတနီၤဘၣ်ကွၢ်ဆၢၣ်မဲ၁်ဒီး ဟီၣ်ခိၣ်လ၁်လီၤႇ ခၠီၣ်ႇ ဟံၣ်သ့ၣ်တဖၣ်ဘၣ်ဒိဘၣ်ထံးဟးဂူ၁်ဟးဂီၤႇ ၦၤကညီဘၣ်သံဘၣ်ၦၢ်ႇ လီၤမူၢ်လီၤမၣ်ဒီး ဘၣ်တၢ်ဃုထံၣ်န့ၢ်က့ၤအီၤတနီၤႇ တနီၤဃုဒံးအဖၢမုၢ်န့ၣ်လီၤ. ကီၢ်အိၣ်ဒီး ''တၢ်ဂ့ၢ်အိၣ်ထီၣ်သတုၢ်ကလ၁်ကမံးတံ၁်'' (အ‌ေရးပေါ်တုန့်ပြန်ရေးကော်မတီ) တဖုဒီး ပသုးကျဲၤသကိးလၢ တၢ်မၤဂ့ၤမၤစၢၤအဂီၢ်န့ၣ်လီၤ. အိၣ်စ့ၢ်ကီးဒီး  Volunteer တဖုလၢဖံးသကိးမၤသကိးတၢ်န့ၣ်လီၤ. တၢ်အိၣ်ဖှိၣ်ဒူသဝီဘၣ်ဒိဘၣ်ထံးအိၣ်ဝဲ (၁၄)ဖှိၣ်န့ၣ်လီၤ. လီၤဆီဒၣ်တၢ် ခီဖျိတိ၁်ဖးဒိၣ်ခံဘိလၢ ဒ့လိ၁်ကျိ (သောက်ရေခပ်‌ေချာင်း) ကၢ်ကွံ၁်ဝဲအဃိ တၢ်အိၣ်ဖှိၣ်(၁၆)ဖှိၣ်လၢ အအိၣ်ဖဲဒ့လိ၁်မုၢ်ထီၣ်ကဝီၤဖိသ့ၣ်တဖၣ် လဲၤက့ၤတၢ်တသ့လၢၤဘၣ်. လၢတဆံသၢမံးလ၁်ဝ့ၢ်ပူၤစ့ၢ်ကီးတိၤကၢ်ကွံ၁်ခံဘိန့ၣ်လီၤ. တၢ်ကွၢ်ဆၢၣ်မဲ၁်သတုၢ်ကလ၁်အကတီၢ်အံၤ လၢတၢ်မၤသကိးတၢ်အဂီၢ်န့ၣ် ကီၢ်သုးကျဲၤလီၤတၢ်ပီးတၢ်လီလၢအလိၣ်တဖၣ်ႇ ကသံၣ်ကသီတဖၣ်ႇ တၢ်အီၣ်တၢ်အီ (မိုးကာအကျီ၊ ဦးထုပ်၊ လက်အိတ်၊ ‌‌‌‌ေဂါ်ပြား၊ ပေါက်တူး၊ ချိန်းဇော၊ လေမှုတ်စက်၊ မီးစက်၊ သောက်သုံးရေ၊ ဆေး၀ါး၊ ခြေခံအစားအစာများ၊.......) ဒ်အသ့အသိး ဘၣ်ဆၣ်တမ့ၢ်တၢ်လၢတၢ်ၦဲၤဘၣ်. ပလိၣ်ဘၣ်နီၢ်နီၢ် တၢ်ဆီၣ်ထွဲမၤစၢၤလၢ ကျဲကိးကပၤဒဲးန့ၣ်လီၤ. ပဆၢလၢသုကသ့ၣ်နီၣ်ဆီၣ်ထွဲၦၤႇ အဒိၣ်ကတၢၢ်လၢ သုတၢ်ထုကဖၣ်န့ၣ်လီၤ.

 ကီၢ်ထးခီတၢ်ကစီၣ်
 Disaster Management  အတၢ်မၤလိ
     KBCERRT NETWORK ပမၤဘၣ်တၢ်မၤလိလၢအမ့ၢ်Disaster Management, Practical Emergency Response and Rescue Training ဖဲလါယူၤလံ ၂၁ တုၤ ၂၃သီႇ ၂ဝ၂၅နံၣ်ႇ ဖဲဝ့ၢ်ပၠ့ၣ်အူလွ့ၣ် န့ၣ်လီၤ. ပမၤသကိးဘၣ်တၢ်ဒီး Carbon-h, KBC Woman Department အန့ၣ်လီၤ. သရၣ်သရၣ်မုၣ်လၢဟဲ ဟ့ၣ်ခီဟ့ၣ်နီၤတၢ်သိၣ်လိအိၣ်ဝဲ (ရ)ဂၤန့ၣ်လီၤ. ၦၤလၢအဟဲထီၣ်တၢ်မၤလိတဘျီအံၤ ခဲလၢ၁်အိၣ်ဝဲဒၣ် (၉၄)ဂၤ န့ၣ်လီၤ.