Karen Baptist Convention

ၦၤကညီဘျၢထံခဝ့ၡၢၣ် တၢ်ကူၣ်ဘၣ်ကူၣ်သ့အတၢ်ရဲၣ်တၢ်ကျဲၤ အကျါလံ၁်ညိၣ်သိၣ်ဒိၣ်ကမံးတံ၁်ဒီး ကရူၢ်ဖိတဖၣ်အိၣ်ဒီး တၢ်ထံၣ်လိ၁်အိၣ်ဖှိၣ်သကိးဖဲ လါယူၤ(၆)သီႇ ၂ဝ၂၄နံၣ် (ဂီၤ ၈း၃ ဝတုၤ ဟါ၄းဝဝ)နၣ်ရံၣ် ဖဲ ၦၤကညီဘျၢထံယွၤဂ့ၢ်ပီညါ ဖၠၣ်စိမိၤႇ ဖုခၠံးမီၣ်တၢ်သူၣ်ထီၣ်ႇ တၢ်အိၣ်ဖှိၣ်ဒၢးႇ အ့စ့ၣ်န့ၣ်လီၤ. တၢ်အိးထီၣ်တၢ်ရဲၣ်တၢ်ကျဲၤကတီၢ် ၦၤပၢၤလီၢ်ဆ့ၣ်နီၤမ့ၢ်ဝဲ သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤႇ ကမံးတံ၁်ပၢဆှၢတၢ်ရ့လိ၁်မၤသကိးတၢ်သးခုကစီၣ်)ႇ သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်)ႇ ကတိၤဆၢဂ့ၤဆၢဝါတၢ်ဝံၤ တၢ်ထုကဖၣ်လၢ သရၣ်ဒိၣ်ဒီးကထၢၣ်စ့စီ န့ၣ်လီၤ. အိၣ်ဒီးတၢ်ဒုးသ့ၣ်ညါလိ၁်သးဒီး လဲၤဆူ ကရူၢ်ဖိတဖၣ်အတၢ်ဟ့ၣ်ထီၣ် န့ၣ်လီၤ. ကညီကျိ၁်ႇ Music, တၢ်မၤလိလံ၁်စီဆှံႇIT ဒီး Fine Art အကရူၢ်ခိၣ်တဖၣ် ဟ့ၣ်ထီၣ်တၢ်ဝံၤ ပိ၁်ထွဲထီၣ်အခံလၢ တၢ်သ့ကွၢ် တၢ်ဟ့ၣ်ကူၣ်တဖၣ်လၢ ကရူၢ်ဖိတဖၣ်န့ၣ်လီၤ. ၦၤပၢၤလီၢ်ဆ့ၣ်နီၤ တီခိၣ်ရိၣ်မဲလၢ တၢ်ကတိၤသကိးဒီး ဆူညါတၢ်သုးတၢ်ကျဲၤအဂီၢ်န့ၣ်လီၤ. ကရူၢ်ဖိလၢဟဲထီၣ်တၢ်ရဲၣ်တၢ်ကျဲၤအံၤ ခဲလၢ၁် အိၣ်ဝဲ(၁၇) ဂၤန့ၣ်လီၤ.

ၦၤကညီဘျၢထံခဝ့ၡၢၣ် နံၣ်ကယၤ(၂၁) သၢပတီၢ်တပတီၢ်ႇ ကရူၢ်(၁) တၢ်ဃုထံတၢ်ရဲၣ်တၢ်ကျဲၤအိၣ်ဒီး (တၢ်ဃုထံ တၢ်မၤလိ) လၢ ကီၢ်အဘ့ၣ်(၁ဝ)အဂီၢ် တၢ်မၤလိဖဲ ခဝ့ၡၢၣ်နံၣ်(၁ဝဝ)တၢ်စံးဘျုးတၢ်သူၣ်ထီၣ် န့ၣ်လီၤ. ဘၣ်တၢ်စးထီၣ်အီၤဖဲ လါယူၤ(၁၂-၁၃)သီႇ ၂ဝ၂၄နံၣ် န့ၣ်လီၤ.အိၣ်ဒီးတၢ်အိးထီၣ်တၢ်ရဲၣ်တၢ်ကျဲၤလၢ တၢ်ဘူၣ်တၢ်ဘါန့ၣ်လီၤ. တၢ်ဘါကတီၢ်ၦၤပၢၤလီၢ်ဆ့ၣ်နီၤ-သရၣ်မုၣ်ဆၢန့ၢ်ဂ့ၤ(လံ၁်လဲၢ်ဒီးတၢ်ဆဲးတၢ်လၤဝဲၤကျိၤႇ ၦၤနဲၣ်တၢ်)ႇ တၢ်ကစီၣ်-သရၣ်မုၣ်ၡံထၣ်ဖီ(ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤႇ ၦၤနဲၣ်တၢ်)ႇ တၢ်ထုကဖၣ်-သရၣ်မုၣ်နံထၣ်(တၢ်ကဟုကယ၁်ဒီးတၢ်ကူၣ်လိ၁်တၢ်ဝဲၤကျိၤႇ ၦၤနဲၣ်တၢ်) ဒီးပိ၁်ထွဲထီၣ်အခံဒီးတၢ်ဒုးသ့ၣ်ညါလိ၁်သးလၢ ကရူၢ်ခိၣ်-သရၣ်မုၣ်ဂ့ၤဂ့ၤထူ(တၢ်ဘၣ်ထွဲတုၤအိၣ်လိ၁်သးဝဲၤကျိၤႇ ၦၤနဲၣ်တၢ်) န့ၣ်လီၤ. အိၣ်ဒီးတၢ်ပ၁်ဖျါ နံၣ်ကယၤ(၂၁) တၢ်တိ၁်ကျဲၤသၢပတီၢ်တပတီၢ် အတၢ်ပညိၣ်ကွၢ်စိႇ တၢ်ကွၢ်စိဒီး တၢ်ဃုထံတၢ်ရဲၣ်တၢ်ကျဲၤ တၢ်ပညိၣ်ကွၢ်စိဒီး တၢ်ဖံးတၢ်မၤတဖၣ်န့ၣ်လီၤ. ကီၢ်လၢဟဲထီၣ်တဖၣ်မ့ၢ်ဝဲ- ကီၢ်တကူၣ်ႇ ကီၢ်ပကိတကူၣ်ႇ ကီၢ်မၠီမၠးႇ ကီးထးခီႇ ကီၢ်ကယါဘျၢထံခရံ၁်ဖိတၢ်အိၣ်ဖှိၣ်သကိးတၢ်အိၣ်ဖှိၣ်ႇ ကီၢ်တီအူပကူႇ ကီၢ်တီအူသၣ်တီၣ်ဘှဲမိၤၦၤႇ ကီၢ်ဖၣ်အၣ်မီၣ်လမၠဲၣ်ႇ ကီၢ်ထးခီႇ ကီၢ်မၠိၣ် ဒီးခဲလၢ၁်ဟဲထီၣ်(၂ဝ)ဂၤ န့ၣ်လီၤ. တၢ်မၤလိအံၤမ့ၢ်ဝဲ(၂)သီတၢ်မၤလိန့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထဲတွုၤအိၣ်လိာ်သးဝဲၤကျိၤ အိၣ်ဒီး Basic Training of Audio Recording  တၢ်မၤလိ ဖဲ လါမ့ၤ၂ ဝတုၤ ၂၅ သီႇ ၂ဝ၂၄နံၣ်န့ၣ်လီၤ. တၢ်မၤလိအံၤ ဘၣ်တၢ်မၤအီၤဖဲ "Studio Door" ဒီး သရၣ်သိၣ်လိ တၢ်မ့ၢ်ဝဲ- သရၣ်ဒိၣ်ဒီးကထၢၣ်လၢၢ်ဝါန့ၣ်လီၤ. အိၣ်ဒီးတၢ်အိးထီၣ်တၢ်မၤလိတဘျီအံၤဖဲ လါမ့ၤ ၂ ဝသီ ဟါ န့ၣ်လီၤ.တၢ်မၤလိအံၤဘၣ်တၢ်သိၣ်လိအီၤလၢ တၢ်မၤလ့ၤအါအါန့ၣ်လီၤ. ကီၢ်ခၢၣ်စး ၦၤဟဲထီၣ်တၢ်မၤလိအိၣ်ဝဲ(၈)ဂၤလၢ ကီၢ်ပကိတကူၣ်ႇ ကီၢ်ချၢၣ်လွံၢ်ထူၣ်ႇ ကီၢ်ပၠံၣ်သၣ်ယၣ်ဝတံၣ်ႇ ကီၢ်တီအူသၣ်တီၣ်ဘှဲမိၤၦၤႇ တီအူကီၢ်ကဲၤခၢၣ်ကဲၤဘါ ဒီး ကီၢ်တီအူပကူတဖၣ်န့ၣ်လီၤ.

စံးဘျုးကစၢ်ယွၤလၢဟ့ၣ်ၦၤတၢ်ခွဲးတၢ်ယ၁်လၢတၢ်လဲၤဟ့ၣ်ခီဟ့ၣ်နီဘၣ်ထွဲတၢ်သ့ပၢဆှၢကျိၣ်စ့အဂ့ၢ်အကျိၤတဖၣ်အဂီၢ်/တၢ်သိၣ်လိအံၤဘၣ်တၢ်မၤအီၤ ဖဲ ၉ -၁ဝႇ လါမ့ၤ ႇ၂ဝ၂၄နံၣ် (၂)သီ တၢ်မၤလိ/တၢ်မၤလိတဘျီအံၤဘၣ် တၢ်ဟံးစုနဲၣ်ကျဲသိၣ်လိဘၣ်ထွဲ တၢ်ဂ့ၢ်တဖၣ် မ့ၢ်ဒ်လ၁်အံၤ အသိး/
                    တၢ်မၤလိတဘျီအံၤအိၣ်ဒီး တၢ်သိၣ်လိလၢအမ့ၢ်-
၁.  ၦၤကညီဘျၢထံခဝ့ၡၢၣ်ကျိၣ်စ့ဒီးတၢ်စုလီၢ်ခီၣ်ခိၣ်လံ၁်နဲၣ်ကျဲအဂ့ၢ်
၂.  တၢ်သ့ပၢဆှၢကျိၣ်စ့အဂ့ၢ်အကျိၤတဖၣ် (ဘၣ်ထွဲလံ၁်စီဆှံအဂ့ၢ်အကျိၤ       ဒီးတၢ်ဖံးတၢ်မၤ)
၃. တၢ်ဖီၣ်စ့စရီပတီၢ်အဂ့ၢ်အကျိၤတဖၣ်
၄. တၢ်ထုးထီၣ်စ့စရီခိၣ်တီတဖၣ်လၢ တၢ်ကရၢက၇ရိအဂီၢ်န့ၣ်လီၤ.         
 တၢ်မၤလိတဘျီအံၤမ့ၢ်ကီၢ်ခိၣ်နၢ်အိၣ် မူအိၣ်ဒါတဖၣ်ဒီးၦၤဟဲထီၣ်ခဲလၢ၁်အိၣ် ဝဲ(၁၂)ဂၤန့ၣ်လီၤ. ၦၤသိၣ်လိတၢ်မ့ၢ်ဝဲ သရၣ်မုၣ်ၡံထၣ်ဖီ(ခဝၡၢၣ် -ၦၤပၢၤစ့) ဒီးသရၣ်မုၣ်ကၠူဒ့းမ့(ခဝၡၢၣ်-ၦၤဖီၣ်စ့စရီ) .န့ၣ်လီၤ.

ၦၤကညီဘျၢထံခဝ့ၡၢၣ် အိၣ်ဒီးနံၤတဝာ်တၢ်ဒုၣ်တၢ်အီၣ်ထုကဖၣ်ဖဲ လါမ့ၤ(၁)သီႇ ၂ဝ၂၄နံၣ် ဖဲ ခိလ်ကညီဘျၢထံတၢ်ဘါယွၤသရိာ်စးထီၣ် ဂီၤ(၆)နၣ်ရံၣ်တုၤမုၢ်ထူၣ်(၁၂)နၣ်ရံၣ်န့ၣ်လီၤ. အိၣ်ဒီးတၢ်တဲဖျါတၢ်ရဲၣ်တၢ်ကျဲၤအံၤ အတၢ်ပညိၣ်ကွၢ်စိလၢ သရၣ်ဒိၣ်ယွၤဒုးမူ(နဲၣ်ရွဲၣ်)န့ၣ်လီၤ. ပိာ်ထဲထွီၣ်အခံလၢ တၢ်ထုကဖၣ်ဃ့ပျၢ်တၢ်ကမၣ်ႇ တၢ်သးဝံၣ်စံးထီၣ်ပတြၢၤယွၤဒီး တၢ်သိၣ်လိလံာ်စီဆှံလၢ-သရၣ်မုၣ်ၡံထၣ်ဖီ(ၦၤပၢၤစ့)န့ၣ်လီၤ.တၢ်ထုကဖၣ်လၢကီၢ်အဘ့ၣ်(၂ဝ), လံာ်စီဆှံကၠိႇ ထံလီၢ်ကီၢ်ပူၤႇ ထံဂုၤကီၢ်ဂၤ တၢ်သးခုကစီၣ်တၢ်မၤတဖၣ်အဂီၢ် ဝံၤ ခံဂၤ(မ့)သၢဂၤပာ်ဖှိၣ်ထုကဖၣ်န့ၣ်လီၤ. အိၣ်ဒီးတၢ်ပာ်စီဆှံသးတၢ်ဘါ ကတီၢ် ၦၤဟ့ၣ်တၢ်ကစီၣ်မ့ၢ်ဝဲ-သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤႇ တၢ်ရ့လိာ်မၤသကိးတၢ်ဂုၤထီၣ်ပသီထီၣ်)န့ၣ်လီၤ. တၢ်ရဲၣ်တၢ်ကျဲၤဒီတကတီၤ ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်မုၣ်မူမုၣ်ဝါ(ၦၤနဲၣ်တၢ်ႇ ယွၤဂ့ၢ်ပီညါဝဲၤကျိၤ)န့ၣ်လီၤ. ၦၤဟဲပာ်ဖှိၣ်ဘါသကိးယွၤခဲလၢာ်အိၣ်ဝဲ(၄၇)ဂၤန့ၣ်လီၤ.

ကစၢ်ယွၤအဘျုးအဖှိၣ်အဃိလၢ တၢ်ကစူးကတ့ၤအပူၤ တီအူကီၢ်ကဲၤခၢၣ်ကဲၤဘါ သးစၢ်ဝဲၤကျိၤသုးကျဲၤမၤဘၣ် တနံၣ်တဘျီသးစၢ်တၢ်မၤလိ ဖဲလါအ့ဖြ့ၣ် ၃သီ တုၤ ၄သီ ၂ဝ၂၄နံၣ် ခံသီတၢ်မၤလိဒီး တၢ်ရဲၣ်တၢ်ကျဲၤတဘျီအံၤ ဘၣ်တၢ်တူၢ်လိ၁်န့ၢ်ၦၤလၢ ဖဲဘိဒၢကညီဘျၢထံခရံ၁်တၢ်အိၣ်ဖှိၣ်(ကဝီၤ-၁)ခၢၣ်စးန့ၣ်လီၤ.တၢ်တိ၁်ထူမ့ၢ်ဝဲ - သ့ၣ်ညါမူဒါလဲၤလၢယွၤဂံၢ်ဘါ (စံး ၇၁း၁၆ႇ လူၤ ၁၂း၄၇ႇ ကလၤ ၆း၄-၅ႇ ယဃ့း ၃၃း၆) သရၣ်/သရၣ်မုၣ်လၢအသိၣ်လိတၢ်တဖၣ်မ့ၢ်ဝဲ - လံ၁်စီဆှံဘၣ်ထွဲဒီးတၢ်တိ၁်ထူမ့ၢ် သရၣ်ဝ့ဘ့ၣ်(ခဝ့ၡၢၣ်ႇ ပိ၁်ခွါဝဲၤကျိၤၦၤနဲၣ်တၢ်)? ယံုကြည်ခြင်းနှင့်ခရစ်ယာန်အသက်တာမ့ၢ် သရၣ်မုၣ်ခရံ၁်စၢ်ဖီလွ့ၣ်(ကီၢ်တီအူပကူ-လံ၁်စီဆှံကၠိ) လူငယ်နှင့်ခရစ်ယာန်အိမ် ‌ေထာင်မ့ၢ် သရၣ်ဒိၣ်ဘဲကၠမဲအါနံၣ်(တီအူကီၢ်ကဲၤခၢၣ်ကဲၤဘါႇ နဲၣ်ရွဲၣ်သဃဲၤ) န့ၣ်လီၤ. တၢ်မၤလိတဘျီအံၤၦၤသးစၢ်လၢအဟဲထီၣ်မၤလိတၢ်အိၣ်ဝဲ-မုၣ်(၁၆၁)ဂၤႇ ခွါ(၁၅၃)ဂၤ ခဲလၢ၁် (၃၁၄)ဂၤန့ၣ်လီၤ.

တနံၣ်အံၤပဝဲကီၢ်တီအူသၣ်တီၣ်ဘှဲမိၤၦၤတၢ်အိၣ်ဖှိၣ်သကိးတၢ်အိၣ်ဖှိၣ် ပသုးကျဲၤမၤဘၣ်ကမျၢၢ်ခၢၣ်စးတၢ်အိၣ်ဖှိၣ် အခီၣ်ထံးတဘျီဖဲ ၂ဝ၂၄နံၣ် လါမၢ်ၡး ၂၁သီ တုၤ ၂၄သီ ဒီးတၢ်လီၢ်မ့ၢ်ဝဲကသွံဒံၦဲၤဟံၣ်ခိၣ်တၢ်အိၣ်ဖှိၣ်န့ၣ်လီၤ. ကမျၢၢ်ခၢၣ်စးခဲလၢ၁်အိၣ်ဝဲ (၁၅၆)ဂၤ န့ၣ်လီၤ. လၢတၢ်အိၣ်ဖှိၣ်ကတီၢ် ပမၤလၤကပီၤဘၣ်သရၣ်မုၣ်မူမုၢ်ဝါလၢ အဒိးန့ၢ်ဘၣ်Doctor of Ministry ဒီးဖှိၣ်စၢၤလၢအမၤသကိးတၢ်ဒီးအတၢ်အိၣ်ဖှိၣ် ၦဲၤထီၣ်အနံၣ်(၁ဝ)ဆူအဖီခိၣ်အိၣ်ဝဲ (၈၄)ဂၤန့ၣ်လီၤ.သးခုစံးဘျုးဘၣ်ကစၢ်ယွၤလၢ အအိၣ်ဒီးၦၤလၢ ပတၢ်အိၣ်ဖှိၣ်တဘျီအံၤဝံၤဝဲဒီး ပခိၣ်ပနၢ်လၢအဟ့ၣ်ကူၣ်ဟ့ၣ်ဖး ဟ့ၣ်ဂံၢ်ဟ့ၣ်ဘါၦၤလၢကျဲကိးကပၤဒဲးန့ၣ်လီၤ.

ကီၢ်ထးခီၦၤကညီဘျၢထံခရံာ်ဖိတၢ်အိၣ်ဖှိၣ်သကိးတၢ်အိၣ်ဖှိၣ်အိၣ်ဒီး ကမျၢၢ်ခၢၣ်စးတၢ်အိၣ်ဖှိၣ် ဘၣ်တၢ်မၤအီၤဖဲ လါအ့ဖြ့ၣ်(၂-၄)သီႇ ၂ဝ၂၄နံၣ်ဖဲ ပၠ့ၣ်အူလွ့ၣ်ၦၤကညီဘျၢထံတၢ်အိၣ်ဖှိၣ်န့ၣ်လီၤ. အိၣ်ဒီးတၢ်တိာ်ထူလၢအမ့ၢ်-တိဖျိကီခဲယွၤဂံၢ်ဘါႇ စံးဘျုးယွၤဒီးလဲၤဆူညါ  (စံး၆၆း၁၂ႇ ၂မိၤၡ့ ၁၄း၁၅)န့ၣ်လီၤ. တၢ်အိၣ်ဖှိၣ်တဘျီအံၤ အိၣ်ဒီးဝဲၤကျိၤကမံးတံာ်တဖၣ်အတၢ်အိၣ်ဖှိၣ်ႇ ကီၢ်ကမံးတံာ်တၢ်အိၣ်ဖှိၣ်ႇ ကီၢ်ပၢဆှၢတၢ်ကမံးတံာ်ႇ နံၣ်ကယၤ (၂၁)တၢ်ဘူၣ်တၢ်ဘါအတၢ်ရဲၣ်တၢ်ကျဲၤႇ ကီၢ်တနံၣ်တဘျီတၢ်စံၣ်တဲၤတဲလီၤတၢ်ဘူၣ်တၢ်ဘါဒီး တၢ်ဒိးပာ်စုသရၣ်မုၣ်ဒီးကထၢထၣ်လ့ထူႇ တၢ်မၤလၤကပီၤအတၢ်ရဲၣ်တၢ်ကျဲၤႇ တၢ်အီၣ်ဘူၣ်သ့ၣ်နီၣ်အတၢ်ရဲၣ်တၢ်ကျဲၤဒီး တၢ်ပာ်စီဆှံသးတၢ်ဘူၣ်တၢ်ဘါစ့ၢ်ကီးန့ၣ်လီၤ. လၢတၢ်အိၣ်ဖှိၣ်တဘျီအံၤ တမှံၤလီၤဆီလၢဘၣ်တၢ်ကွဲအီၤတဖၣ်မ့ၢ်ဝဲ-သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်)ဒီး သရၣ်ဒိၣ်မူလၢၢ်ဂ့ၤ(ကီၢ်ပသံၣ်မၠီမၠး နဲၣ်ရွဲၣ်)န့ၣ်လီၤ.  တၢ်အိၣ်ဖှိၣ်ကတီၢ်အိၣ်စ့ၢ်ကီးဒီး တၢ်ဟ့ၣ်လီၤလံ၁်အုၣ်သးဆူ ၦၤဖျိထီၣ်တၢ်မၤလိလံ၁်စီဆှံခီဖျိတကွဲးအိၣ်ဝဲ(၄)ဂၤန့ၣ်လီၤ. ၦၤဟဲဆဲးလီၤမံၤလၢ တၢ်အိၣ်ဖှိၣ် တဘျီအံၤအိၣ်ဝဲ(၁၄၃)ဂၤန့ၣ်လီၤ.

အဆိပစံးဘျုးယွၤလၢ အဆိၣ်ဂ့ၤၦၤလၢ ဆၢကတီၢ်အကီအခဲဒ်သိးအံၤန့ၣ်လီၤ. ပကီၢ်အမၤသကိး ကမျၢၢ်အတၢ်အိၣ်ဖှိၣ် ဒ်သိးလၢညါမ့ၢ်တန့ၢ်ဒံးဘၣ်ဆၣ် ပမၤဘၣ် ကမျၢၢ်ခၢၣ်စး တၢ်အိၣ်ဖှိၣ်ထံၣ်မဲ၁်ထံၣ်နါဖဲ လါမၢ်ၡး ၁၄-၁၇ သီႇ ၂ဝ၂၄နံၣ် လွံၢ်သီအတီၢ်ပူၤလီၤ.ပမၤသကိး အီၤဖဲ ကိၣ်သၣ်ဖၠူၣ်သရိ၁် ဒ်အမ့ၢ်ကီၢ်အလီၢ်ခၢၣ်သးတတီၤအံၤန့ၣ်လီၤ. ခၢၣ်စးဟဲဆဲးလီၤမံၤ အိၣ်ဝဲ ၃ဝ၆ (သၢကယၤဃုဂၤ) န့ၣ်လီၤ. ကီၢ်ပသံၣ်မၠီမၠး ကဝီၤအိၣ်ဃိးကဝီၤ အကျါ တနံၣ်အံၤ ကၠီကိကၠူၣ်ပၠီၣ်အ့းမဲကဝီၤ တူၢ်လိ၁်တၢ်န့ၣ်လီၤ.
တၢ်ရဲၣ်တၢ်ကျဲၤဘၣ်တၢ်စးထီၣ်အီၤဒီး ဟါတၢ်ဘါဖဲ ၁၄.၃.၂ဝ၂၄ မုၢ်လွံၢ်နံၤဟါ ၆းဝဝနၣ်ရံၣ် ၦၤဟ့ၣ်တၢ်ကစီၣ်မ့ၢ်ဝဲ သရၣ်ဒိၣ်ကွဲၤခုၣ် ဒီးၦၤမၤသကိးတၢ်မ့ၢ်ဝဲ ကၠီကိကၠူၣ်ပၠီၣ်အ့းမဲ ကဝီၤသရၣ်သမါသ့ၣ်တဖၣ်န့ၣ်လီၤ. 
၁၅.၃.၂ဝ၂၄ ဂီၤ ၇းဝဝနၣ်ရံၣ် တၢ်သိၣ်လိလံ၁်စီဆှံလၢ သရၣ်ဒိၣ်ဒီးကထၢၣ်ဖျါစိ ပိ၁်ထွဲထီၣ်အခံဒီး ၁ဝးဝဝနၣ်ရံၣ် တၢ်သိၣ်လိလၢ သရၣ်ဒိၣ်ဒီးကထၢၣ်အီနၢၣ်ညိၣ် ဟါ ၂းဝဝနၣ်ရံၣ် တၢ်သိၣ်လိလၢ သရၣ်ဒိၣ်ဘြ့နၢၣ် ဒီးဟါ ၆းဝဝနၣ်ရံၣ်တၢ်မၤလၤကပီၤကီၢ်ဖိကီၢ်လံၤလၢ မၤလိတၢ် တီၤဒိၣ်တု၁်သ့ၣ်တဖၣ်ဒီး ၦၤလၢသတြီၤတၢ်လၢ ခဝ့ၡၢၣ်သ့ၣ်တဖၣ်န့ၣ်လီၤ.ပိ၁်ထွဲထီၣ်အခံဒီး တၢ်ဘါၦၤဆှၢတၢ်ဘါမ့ၢ်ဝဲ သရၣ်အဲၣ်မူ (ၦၤဆှၢထီၣ်တၢ်တိ၁်ထူ) န့ၣ်လီၤ.
၁၆.၃.၂ဝ၂၄ ဂီၤ ၇းဝဝနၣ်ရံၣ် တၢ်ဘါၦၤဟ့ၣ်တၢ်ကစီၣ်မ့ၢ်ဝဲ ဒီးကထၢၣ်န့ၣ်လ့အီၣ်(ုဃြ တၢ်သးခုကစီၣ်ဒီးမံးၡၢၣ်ဝဲၤကျိၤၦၤနဲၣ်တၢ်သဃဲၤ) န့ၣ်လီၤ.တၢ်ဘါအဆၢကတီၢ်အိၣ်ဒီး တၢ်ဟ့ၣ်လီၤလံ၁်အုၣ်သးဆူ ၦၤလၢမၤလိလံ၁်စီဆှံခီဖျိတၢ်ကွဲး ၦၤဖျိထီၣ်အိၣ်ဝဲ ၁၇ဂၤန့ၣ်လီၤ. ဂီၤ ၁ဝးဝဝနၣ်ရံၣ် ကီၢ်အတၢ်ပ၁်ဖျါ ဒီး ဟါ ၂းဝဝနၣ်ရံၣ် တၢ်စံၣ်ညီၣ်အၢၣ်လီၤ အဆၢကတီၢ် တၢ်စံၣ်ညီၣ်အၢၣ်လီၤအိၣ်ဝဲ ၇ ဝ(နွံဆံဘီ) န့ၣ်လီၤ.
၁၇.၃.၂ဝ၂၄ (အိၣ်ဘှံးနံၤ) ဂီၤ ၇းဝဝနၣ်ရံၣ် တၢ်ဘါပိ၁်မုၣ်ကရၢမၤသကိးတၢ်န့ၣ်လီၤ. ၦၤဟ့ၣ်တၢ်ကစီၣ်မ့ၢ်ဝဲ သရၣ်မုၣ်ဖလ့ဘံၢ်ယၢၣ်(ုဃြ)န့ၣ်လီၤ. ဂီၤ ၁ဝး၃ဝနၣ်ရံၣ် ကီၢ်တၢ်အိၣ်ဖှိၣ်ဖးဒိၣ်တၢ်ဘါ ၦၤဟ့ၣ်တၢ်ကစီၣ်မ့ၢ်ဝဲ သရၣ်ဒိၣ်ဒီးကထၢၣ်အဲၣ်မူဒါ (ကီၢ်ဟီကတးနဲၣ်ရွဲၣ်)န့ၣ်လီၤ. မုၢ်ဃ့ၢ်လီၤ ၂းဝဝနၣ်ရံၣ်တၢ်ပ၁်စီဆှံသးတၢ်ဘါ ကိၣ်သၣ်ဖၠူၣ်ယွၤဂ့ၢ် ပီညါစ့ၤမ့ၤနရံ သရၣ်/မုၣ် တဖၣ်ဟံးန့ၢ်မူဒါလီၤ.

ကီၢ်ပကိတကူၣ် ကညီဘျၢထံခရံ၁်ဖိတၢ်အိၣ်ဖှိၣ်သကိးတၢ်အိၣ်ဖှိၣ်
ကီၢ်ကမျၢၢ်ခၢၣ်စးတၢ်အိၣ်ဖှိၣ် (၃) ဘျီတဘျီ
တၢ်တိ၁်ထူမ့ၢ်ဝဲ - ဟံးဃ၁်ဂၢၢ်ကျၢၤတၢ်မၤဘျၢထံခရံ၁်ဖိမံးၡၢၣ်
(မးသဲ ၂၈း၁၈ႇ မၢ်ကူး ၁၆း၁၅ႇ မၤတၢ် ၁း၈ႇ ၁၃း၄၇ႇ စံး ၉၆း၃ႇ ၁ကွဲး ၁၆း၂၃)
ကီၢ်ပကိတကူၣ် ကညီဘျၢထံခရံ၁်ဖိတၢ်အိၣ်ဖှိၣ်သကိးတၢ်အိၣ်ဖှိၣ် ကီၢ်ကမျၢၢ်ခၢၣ်စးတၢ်အိၣ်ဖှိၣ် (၃) ဘျီတဘျီ ဘၣ်တၢ်မၤအီၤဖဲကီၢ်ဟီၣ်ခိၣ်လီၢ် ဖဲလါမၢ်ၡး (၂၁)သီ တုၤ (၂၃)သီႇ ၂ဝ၂၄နံၣ်န့ၣ်လီၤ. လၢၦၤကညီဘျၢထံခဝ့ၡၢၣ်အခၢၣ်စး သရၣ်မုၣ်နံထၣ် (ၦၤနဲၣ်တၢ်ႇ တၢ်ကဟုကယ၁်ဒီးတၢ်ကူၣ်လိ၁်တၢ်ဝဲၤကျိၤ) လဲၤဝဲဒၣ်န့ၣ်လီၤ.
တၢ်အိၣ်ဖှိၣ်တဘျီအံၤ ဘၣ်တၢ်အိးထီၣ်အီၤဖဲ (၂၁.၄.၂ဝ၂၄)အနံၤဟါ (၄)နၣ်ရံၣ်အိၣ်ဒီးတၢ်ဘူၣ်တၢ်ဘါန့ၣ်လီၤ. တချုး ကမျၢၢ်ခၢၣ်စးတၢ်အိၣ်ဖှိၣ်စးထီၣ်ဖဲဂီၤ (၁ဝ)နၣ်ရံၣ်ကတီၢ် ကီၢ်အိၣ်ဒီးတၢ်ပ၁်စီဆှံ တၢ်သ့ၣ်နီၣ်သရၣ်ဒိၣ်ထီလ့ၣ် တၢ်သူၣ်ထီၣ်န့ၣ်လီၤ. ဖဲတၢ်ပ၁်စီဆှံတၢ်သူၣ်ထီၣ်အဆၢကတီၢ် သရၣ်ဒိၣ်ယွၤဒုးမူ (ခဝ့ၡၢၣ်နဲၣ်ရွဲၣ်) ဟ့ၣ်တၢ်ကစီၣ်န့ၣ်လီၤ. တၢ်သူၣ်ထီၣ်အံၤကဘၣ်တၢ်စူးကါအီၤဒ်ကီၢ်ဝဲၤလီၢ်အသိးလီၤ. လၢကီၢ်ကမျၢၢ်ခၢၣ်စးတၢ်အိၣ်ဖှိၣ် (၃) ဘျီတဘျီအံၤ ဘၣ် တၢ်တူၢ်လိ၁်တၢ်အိၣ်ဖှိၣ်အသီ (၂)ဖှိၣ်လၢအမ့ၢ် အဲဖါတၢ်အိၣ်ဖှိၣ်ဒီးရွှ့ၣ်ဘိၣ်သၣ်တၢ်အိၣ်ဖှိၣ်န့ၣ်လီၤ. တၢ်အိၣ်ဖှိၣ်တဘျီအံၤ အိၣ်စ့ၢ်ကီးဒီး တၢ်မၤလၤကပီၤအတၢ်ရဲၣ်တၢ်ကျဲၤတဖၣ်လၢဝဲၤကျိၤတနီၤအၦၤမၤသကိးတၢ်တဖၣ်အိၣ် ဘှံးလၢမူဒါ န့ၣ်လီၤ.သးစၢ်ဝဲၤကျိၤ အိၣ်ဝဲဒၣ်ဒီး တၢ်သတြီၤလံ၁်စီဆှံဒီးတၢ်သးဝံၣ်ဃံ၁်ခံခီဖျိဆဲးကျိးန့ၢ်တီၤန့ၣ်လီၤ. ကီၢ်အဂံၢ်အဘါ မ့ၢ်ဝဲ တၢ်အိၣ်ဖှိၣ် (၂၆) ဖှိၣ်ဒီး တၢ်မၢလီၢ် (၉) တီၤန့ၣ်လီၤ. ကီၢ်ကမျၢၢ်ခၢၣ်စးတၢ်အိၣ်ဖှိၣ်တဘျီအံၤ ၦၤဟဲဆဲးလီၤမံၤ အိၣ်ဝဲ (၁ဝဝ)ဂၤန့ၣ်လီၤ.