Karen Baptist Convention

        ကီၢ်တီအူပကူ ဘျၢထံလံ၁်စီဆှံကၠိ ဘၣ်တၢ်စးထီၣ်အီၤလၢ သရၣ်ဒိၣ်လဲထၣ်ဖဲ ၁၉၇၇နံၣ် လါယူၤ (၁) သီန့ၣ်လီၤ. ကၠိအတၢ်တိ၁်ထူ မ့ၢ်ဝဲ ‘‘တီတုၤအကတၢၢ်’’ န့ၣ်လီၤ.
တချုးလၢ ကီၢ်တီအူပကူဘျၢထံလံ၁်စီဆှံကၠိ အိးထီၣ်ဒံးအခါ ကီၢ်တီအူပကူတၢ်အိၣ်ဖှိၣ်သကိးတၢ်အိၣ်ဖှိၣ်ဒီး ကီၢ်တီအူသၣ်တီၣ်ဘှဲမိၤၦၤတၢ်အိၣ်ဖှိၣ်သကိးတၢ်အိၣ်ဖှိၣ်တဖၣ် ဖံးသကိးမၤသကိးတၢ်ဒီးဒုးအိၣ်ထီၣ် လံ၁်စီဆှံကၠိတဖျၢၣ် ဖဲချၢၣ်မုၢ်ဃါသဝီ န့ၣ်လီၤ. ကၠိအံၤဘၣ်တၢ်ကိးအီၤလၢ ‘‘ချၢၣ်မုၢ်ဃါ လံ၁်စီဆှံကၠိ’’ န့ၣ်လီၤ. ဘၣ်တၢ် စးထီၣ်အီၤဖဲ ၁၉၆ဝ နံၣ် ယလါယူၤ (၁)သီန့ၣ်လီၤ. ကၠိအံၤ ဘၣ်တၢ်ကိးကဒီးအမံၤလၢ ‘‘ကီၢ်တီအူခရံ၁်ဖိခိၣ်နၢ်ကၠိ’’ ဒီးလၢခံကတၢၢ် ဘၣ်တၢ်ကိးက့ၤအီၤလၢ ‘‘ကီၢ်တီအူကညီဘျၢထံခရံ၁်ဖိလံ၁်စီဆှံကၠိ’’ န့ၣ်လီၤ. လၢခံမ့ၢ်လၢ တၢ်ဂ့ၢ်အါမံၤအဃိ ကၠိအံၤဘၣ်တၢ်ဆိကတီၢ်အီၤဖဲ ၁၉၇၅ နံၣ် လါဖ့းဘြူၤအါရံၤ(၂၁)သီန့ၣ်လီၤ. ဒီးဖဲ ၁၉၇၇နံၣ် ဘၣ် တၢ်ဒုးအိၣ်ထီၣ်က့ၤ ‘‘ကီၢ်တီအူပကူဘျၢထံလံ၁်စီဆှံကၠိ’’ ကၠိအိၣ်ဒီးတၢ်အၢၣ်လီၤလၢ ကီၢ်တီအူပကူ ဒီးကီၢ်တီအူသၣ်တီၣ်ဘှဲမိၤၦၤ ကမၤသကိးတၢ်န့ၣ်လီၤ.
သရၣ်မုၣ်အမတ့ၣ်ထူ
ကၠိခိၣ်
ကီၢ်တီအူပကူဘျၢထံလံ၁်စီဆှံကၠိ

ကီၢ်တီအူပကူၦၤကညီဘျၢထံခရံာ်ဖိတၢ်အိၣ်ဖှိၣ်သကိးတၢ်အိၣ်ဖှိၣ်အိၣ်ဒီး တၢ်မၤသကိးတၢ်ဒီး ၦၤကညီဘျၢထံခဝ့ရှၢၣ်တၢ် ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ ခီဖျိဆှၢလီၤဘၣ်ၦၤမၤသကိးတၢ်လၢ တၢ်မၤလိတဖၣ် လၢအမ့ၢ်(Organizational Development)တၢ်မၤလိ ဖဲလါမ့ၤ ၉သီတုၤ၁၆သီႇ (Four Skill English)တၢ်မၤလိ ဖဲ လါယူၤလံ ၁၁သီတုၤ၁၅သီႇ ဒီး(Leadership Management)တၢ်မၤလိတဖၣ်ဖဲ လါယူၤလံ(၁၁)သီတုၤ (၁၄)သီႇ ၂ဝ၂၃နံၣ်န့ၣ်လီၤ. ဖဲ လါယူၤ(၃ဝ)သီႇ ဂီၤ(၉းဝဝ)နၣ်ရံၣ်ႇ ၂ဝ၂၃နံၣ် ဟ့ၣ်လီၤက့ၤလံာ်အုၣ်သးဆူကၠိဖိလၢ အမၤလိ Four Skill English) တၢ်မၤလိတဖၣ်ဒီး ဖဲလါယူၤလံ ၇သီႇ ဂီၤ(၉းဝဝ)နၣ်ရံၣ်တုၤ မုၢ်ထူၣ် ၁၂းဝဝနၣ်ရံၣ်ႇ ကီၢ်ခၢၣ်စး လၢလဲၤထီၣ် Organizational Development တဖၣ် ဟဲက့ၤဟ့ၣ်ခီဟ့ၣ်နီၤက့ၤ ကီၢ်ဝဲၤလီၢ်ၦၤမၤသကိးတၢ်တဖၣ်လၢ တၢ်မၤလိလၢ အဒိးန့ၢ်တဖၣ်န့ၣ်လီၤ. ဖဲလါယူၤလံ ၁၆သီႇ ဂီၤ ၇းဝဝနၣ်ရံၣ် တုၤ ဟါ ၈းဝဝနၣ်ရံၣ် သုးကျဲၤဘၣ်ဝဲ တၢ်အိၣ်ဖှိၣ်လၢအကဲ ထီၣ်သီလၢအမ့ၢ် ထံဆဲးမဲယွၤတၢ်အိၣ်ဖှိၣ်လၢ တၢ်ကဒုးအိၣ်ထီၣ်တၢ်အိၣ်ဖှိၣ် အတၢ်သိၣ်တၢ်ဘျၢအဂီၢ် န့ၣ်လီၤ.

 ကီၢ်တီအူပကူ ၦၤကညီဘျၢထံခရံၥ်ဖိတၢ်အိၣ်ဖှိၣ်သကိးတၢ်အိၣ်ဖှိၣ် တနံၣ်တဘျီ တၢ်ဘူၣ်တၢ်ဘါအမူးဖးဒိၣ် (၁၆၇)ဘျီတဘျီ ဘၣ်တၢ်မၤအီၤဖဲ ဂံၢ်ဂီၤပၢၤကညီဘျၢထံတၢ်အိၣ်ဖှိၣ်ႇ ကစၢၢ်ချၢက၀ီၤ စးထီၣ်လါမၢ်ၡး (၂၃)သီႇ ဟါ တုၤ (၂၆)သီႇ ဟါ န့ၣ်လီၤ. တၢ်အိၣ်ဖှိၣ်တၢ်တိၥ်ထူမ့ၢ်၀ဲ - ကိးထီၣ်ယွၤ ၀ံလိၥ်သကိးပတၢ်၀ံဃၢ (ကလၤတံ ၆း၂, ယံး ၃၃း၃)န့ၣ်လီၤ. လါမၢ်ရှး (၂၃)သီႇ ဟါ(၆း၃၀-၇း၃၀)နၣ်ရံၣ်မ့ၢ်၀ဲ တၢ်အိးထီၣ်တၢ်အိၣ်ဖှိၣ်အမူး (၁၆၇) ဘျီတဘျီ အတၢ်ရဲၣ်တၢ်ကျဲၤ၀ံၤ အိၣ်ဒီး ဒူသ၀ီဖိတၢ်တူၢ်လိၥ်တၢ်ရဲၣ်တၢ်ကျဲၤ၀ံၤအလီၢ်ခံ တၢ်ပြၢကရူၢ်တၢ်သး၀ံၣ် ဘၣ်တၢ်သုးကျဲၤ
အီၤလၢ၀ဲၤကျိၤလၢသးစၢ်တၢ်မၤအဂီၢ်န့ၣ်လီၤ. ဒ်တၢ်ရဲၣ်တၢ်ကျဲၤအိၣ်၀ဲအသိး စးထီၣ်လၢလါမၢ်ၡး (၂၄)သီႇ ဘၣ်တၢ်စးထီၣ်အီၤလၢ ဂီၤထၢၣ်သၢတၢ်ထုကဖၣ်တၢ်ဘါ ဒီးဘၣ်တၢ်ဟံးန့ၢ်မူဒါလၢကစၢၢ်ပူၤပိၥ်မုၣ်ကရၢန့ၣ်လီၤ. (၂၅)သီႇ လါမၢ်ၡး (၂၅)သီႇ ဂီၤ(၁၀း၀၀-၁၂း၀၀)နၣ်ရံၣ် မ့ၢ်၀ဲဒၣ် ကီၢ်သရၣ်သမါ၀ဲၤကျိၤ(၄၀)နံၣ်တၢ်စံးဘျုးစံးဖှိၣ်တၢ်ဘူၣ်တၢ်ဘါတၢ်ရဲၣ်တၢ်ကျဲၤန့ၣ်လီၤ. လၢတၢ်ဘူၣ်တၢ်ဘါတဘျီအံၤၦၤဟ့ၣ်တၢ်ကစီၣ်မ့ၢ်၀ဲ သရၣ်ဒီးကထၢၣ်တနၢ်ထူ (ထုးထီၣ်ရၤလီၤလံၥ်လဲၢ်၀ဲၤကျိၤႇ ၦၤနဲၣ်တၢ်) ဒီးတၢ်ထုကဖၣ်အလၢအၦဲၤမ့ၢ်၀ဲ သရၣ်ဒိၣ်ယွၤဒုးမူ (ခ၀့ရှၢၣ်နဲၣ်ရွဲၣ်)န့ၣ်လီၤ. လါမၢ်ၡး (၂၆)သီႇ ဂီၤ (၇း၀၀-၈း၀၀)နၣ်ရံၣ်မ့ၢ်၀ဲကီၢ်တၢ်သးခုကစီၣ်၀ဲၤကျိၤတၢ်ဘူၣ်တၢ်ဘါအိၣ်ဃုၥ်ဒီးတၢ်ဟ့ၣ်လီၤလံၥ်အုၣ်သးတၢ်ရဲၣ်တၢ်ကျဲၤန့ၣ်လီၤ. ဂီၤ(၁၀း၀၀-၁၂း၀၀)နၣ်ရံၣ်မ့ၢ်၀ဲတနံၣ်တဘျီကီၢ်တၢ်စံၣ်တဲၤတဲလီၤတၢ်ဘါဖးဒိၣ်တၢ်ရဲၣ်တၢ်ကျဲၤန့ၣ်လီၤ.တချုးလၢတၢ်ဘါစးထီအခါအိၣ်ဒီးတၢ်တူၢ်လိၥ်တၢ်အိၣ်ဖှိၣ်အသီခံဖုလၢအမ့ၢ်၀ဲ ထံဆဲးမဲးယွၤ ကညီဘျၢထံတၢ်အိၣ်ဖှိၣ်ဒီး ဘုတလ့ၣ် ကညီဘျၢထံတၢ်အိၣ်ဖှိၣ် ဒီးၦၤလၢ တူၢ်လိၥ်ဟံးစုကွၢ်မဲၥ်တၢ်အိၣ်ဖှိၣ်အသီခံဖုလၢကီၢ်နဲၣ်ရွဲၣ်န့ၣ်လီၤ. တနံၣ်တဘျီ တၢ်စံၣ်တဲၤတဲလီၤတၢ်ဘူၣ်တၢ်ဘါ ၦၤဟ့ၣ်တၢ်ကစီၣ်မ့ၢ်၀ဲ သရၣ်ဒိၣ်ယွၤဒုးမူ(ခ၀့ရှၢၣ် နဲၣ်ရွဲၣ်)န့ၣ်လီၤ. ဟါ(၂း၀၀-၄း၀၀)နၣ်ရံၣ်အဆၢကတီၢ်မ့ၢ်၀ဲ တၢ်ဒိးပၥ်စု ဂံၢ်ဂီၤပၢၤတၢ်အိၣ်ဖှိၣ်သရၣ်, သရၣ်န့ၢ်ထူတၢ်ဘူၣ်တၢ်ဘါအတၢ်ရဲၣ်လီၤကျဲၤလီၤန့ၣ်လီၤ.ကီၢ်တၢ်ဘူၣ်တၢ်ဘါတၢ်ရဲၣ်တၢ်ကျဲၤတဖၣ်ဘၣ်တၢ်မၤအီၤဂ့ၤဂ့ၤဘၣ်ဘၣ်အိၣ်ဒီးတၢ်ပၥ်စီဆှံသးတၢ်ဘါန့ၣ်လီၤ.

ကီၢ်တီအူပကူ ၦၤကညီဘျၢထံခရံာ်ဖိတၢ်အိၣ်ဖှိၣ်သကိးတၢ်အိၣ်ဖှိၣ် တၢ်ဘၣ်ထွဲတုၤအိၣ်လိာ်သး၀ဲၤကျိၤ အိၣ် ဒီး တၢ်ဘၣ်ထွဲတုၤအိၣ်လိာ်သး တၢ်မၤလိ ဖဲလါစဲးပတ့ဘၢၣ်(၈)သီ, ၂၀၂၂နံၣ်န့ၣ်လီၤ. တၢ်မၤလိတဘျီအံၤ ဘၣ်တၢ်မၤ အီၤဖဲ ပကူ၀့ၢ်သီတၢ်အိၣ်ဖှိၣ်န့ၣ်လီၤ. တၢ်အိးထီၣ်တၢ်မၤလိအံၤလၢ တၢ်ဘူၣ်သကိးဘါသကိးဃွၤန့ၣ်လီၤ. လၢတၢ်ဘါ ကတီၢ် ၦၤပၢၤလီၢ်ဆ့ၣ်နီၤမ့ၢ်၀ဲသရၣ်မုၣ်ဒီးကထၢၣ်လ့မၠၣ်ခဲၣ်(၀ဲၤကျိၤၦၤပၢၤလီၢ်ဆ့ၣ်နီၤ), တၢ်ကတိၤဆၢဂ့ၤ- သရၣ်ဒိၣ် ဒီးကထၢၣ်နံၤဒိၣ်ထူ(ကီၢ်နဲၣ်ရွဲၣ်), တၢ်ကစီၣ်-သရၣ်စီလမိၣ်လး(ၦၤနဲၣ်တၢ်မၤတ့ၢ်တၢ်), တၢ်ထုကဖၣ်- သရၣ်မုၣ်လါ ခုၣ်ဖီ(လံာ်လဲၢ်ဒီးတၢ်ဆဲးတၢ်လၤ၀ဲၤကျိၤ ၦၤပၢၤလီၢ်ဆ့ၣ်နီၤ), တၢ်ဆိၣ်ဂ့ၤပျၢ်-သရၣ်ဒိၣ်ဒီးကထၢၣ်န့ၣ်ထိလ့(သရၣ် သမါ၀ဲၤကျိၤၦၤနဲၣ်တၢ်), တၢ်ကတိၤစံးဘျုးဒီးတၢ်ဘိးဘၣ်သ့ၣ်ညါ-သရၣ်မုၣ်မုာ်ဂ့ၤဒိၣ်(ၦၤနဲၣ်တၢ်)တဖၣ်န့ၣ်လီၤ. တၢ် မၤလိတဘျီအံၤ သရၣ်မုၣ်မုာ်ဂ့ၤဒိၣ် (၀ဲၤကျိၤၦၤနဲၣ်တၢ်)ပာ်ဖျါ ၀ဲၤကျိၤတၢ်ပညိၣ်ကွၢ်စိတၢ်ကွၢ်စိ, တၢ်ပာ်လုၢ်ပာ်ၦ့ၤတဖၣ်, တၢ်ဖံးတၢ်မၤအဂ့ၢ်တဖၣ်, တၢ်တဲဖျါခ၀့ၡၢၣ်တၢ်ဘၣ်ထွဲတုၤအိၣ်လိာ်သး၀ဲၤကျိၤအဂ့ၢ် လၢ သရၣ်မုၣ်ဂ့ၤဂ့ၤထူ (ခ၀့ၡၢၣ်တၢ်ဘၣ်ထွဲတုၤအိၣ်လိာ်သး၀ဲၤကျိၤ ၦၤနဲၣ်တၢ်သဃဲၤ),  ဒီးၦၤဟ့ၣ်ခီဟ့ၣ်နီၤတၢ်မ့ၢ်၀ဲ-သရၣ်ဒိၣ်မူဖျၢၣ်ထူ (ခ၀့ၡၢၣ် တၢ်ဘၣ်ထွဲတုၤအိၣ်လိာ်သး၀ဲၤကျိၤ ၦၤနဲၣ်တၢ်) တဖၣ်န့ၣ်လီၤ. ၦၤဟဲထီၣ်တၢ်မၤလိဖၣ်မ့ၢ်၀ဲ-၀ဲၤကျိၤကမံးတံာ်ခိၣ် နၢ်တဖၣ်, က၀ီၤနဲၣ်ရွဲၣ်တဖၣ် ဒီး၀ဲၤလီၢ်ခိၣ်နၢ်တဖၣ် ခဲလၢာ်အိၣ်၀ဲ(၂၁)ဂၤန့ၣ်လီၤ.

ကီၢ်တီအူပကူအတၢ်ကစီၣ်
ယွၤတၢ်ဆိၣ်ဂ့ၤအါကလီၤဘၣ်လၢ ယွၤအၦၤဂီၢ်မုၢ်လိၤထူးထူးတီၤတီၤတက့ၢ်. ၂ဝ၂၂နံၣ်ႇ ကီၢ်တီအူပကူတၢ်အိၣ် ဖှိၣ်ခဲလၢာ်အနီၣ်ဂံၢ်မ့ၢ်ဝဲ(၁၇၁)ဖှိၣ်ႇ ကဝီၤ(၄)ကဝီၤႇ ဝဲၤကျိၤအိၣ်ဝဲ(၁ဝ)ကျိၤန့ၣ်လီၤ. မ့မ့ၢ်ပိာ်ခွါႇ တၢ်ဒုးဒိၣ်ထီၣ်ခိၣ်နၢ်ဒီးတၢ် ကဟုကယာ်ဒီးတၢ်ကူၣ်လိာ်တၢ်န့ၣ်အိၣ် ဒီးခၢၣ်စးတဖၣ်လၢကမၤသကိးတၢ်န့ၣ်လီၤ. ခၢၣ်စးဆူၦၤကညီဘျၢထံခဝ့ၡၢၣ်တဖၣ် မ့ၢ်ဝဲ-သရၣ်ဒိၣ်ဒီးကထၢၣ်န့ၢ်ထိလ့ႇ တၢ်ဒုးဒိၣ်ထီၣ်ခိၣ်နၢ်-သရၣ်မုၣ်ကၠူနံထၣ် ဒီးတၢ်ကဟုကယာ်ဒီးတၢ်ကူၣ်လိၣ်တၢ်- သရၣ်ဒိၣ်စၢဒ့တဖၣ်န့ၣ်လီၤ.
တနံၣ်တဘျီကမျၢၢ်တၢ်အိၣ်ဖှိၣ် ဘၣ်တၢ်သုးကျဲၤမၤက့ၤအီၤဒ် ကမျၢၢ်ခၢၣ်စးတၢ်အိၣ်ဖှိၣ်ဖဲ(၂ဝ၂၂)နံၣ်ႇ လါမၢ်ၡး(၁၂ သီတုၤ ၁၃သီ)ႇ ကစၢၢ်ပူၤကဝီၤႇ ပဲၤကီၢ်ဒၢတၢ်အိၣ်ဖှိၣ်န့ၣ်လီၤ. မ့မ့ၢ်တနံၣ်တဘျီ သရၣ်သမါတၢ်မၤလိဘၣ် တၢ်သုးကျဲၤမၤက့ၤအီၤဖဲ အကဝီၤဒၣ်ဝဲစုာ်စုာ်န့ၣ်လီၤ.
တနံၣ်အံၤကစၢၢ်ချၢကဝီၤတၢ်အိၣ်ဖှိၣ်(၅)ဖှိၣ် ဒီးတၢ်မၢလီၢ်(၁)တီၤ ဘၣ်ကွၢ်ဆၢၣ်မဲာ်ဒီး တၢ်သုးလီၢ်သုးကျဲန့ၣ်လီၤ. လၢသးဒီဖျၢၣ်စံးဘျုးဘၣ်က့ၤ ၦၤသူၣ်အိၣ်သးအိၣ်တၢ်ကိးဂၤလၢ ပာ်ဖျါထီၣ်တၢ်အဲၣ်ဒီးဆီၣ်ထွဲမၤစၢၤၦၤလၢ တၢ်ဘၣ်ကွၢ်ဆၢၣ် မဲာ်တၢ်ကီတၢ်ခဲအဆၢကတီၢ်န့ၣ်လီၤ. ဆၢဂ့ၤဘၣ်က့ၤၦၤသူၣ်အိၣ်သးအိၣ်တၢ်ကိးဂၤလၢ ကမ့ၢ်ၦၤသ့ၣ်တဖၣ်လၢအဘၣ်ဘျုး အါလၢယွၤအမဲာ်ညါန့ၣ်လီၤ. သ့ၣ်နီၣ်စ့ၢ်ကီးၦၤလၢတၢ်ထုကဖၣ်န့ၣ်တက့ၢ်.
 ၦၤကညီဘျၢထံခဝ့ၡၢၣ်အိၣ်ဒီး တၢ်ထံၣ်လိာ်အိၣ်ဖှိၣ်သကိးလၢ ကျဲကူၣ်နၢၤလၢ ၦၤကညီဘျၢထံ ခဝ့ၡၢၣ်တၢ်ဖံး တၢ်မၤတၢ်ဒိၣ်ထီၣ်ထီထီၣ်အဂီၢ် ဖဲလါယူၤ(၃ဝ)သီႇ ၂ဝ၂၂နံၣ် ဂီၤ(၉းဝဝ)နၣ်ရံၣ်တုၤ ဟါ(၃းဝဝ)နၣ်ရံၣ် ဖဲ ၃၉၆ႇ ဘိၣ်ခၠူးကျဲ ခဝ့ၡၢၣ်တၢ်အိၣ်ဖှိၣ်ဒၢးန့ၣ်လီၤ. တၢ်အိၣ်ဖှိၣ်တဘျီအံၤ ၦၤဟဲထီၣ်တဖၣ်မ့ၢ်ဝဲ-ၦၤနဲၣ်တၢ်ႇ ၦၤနဲၣ်တၢ်သဃဲၤတဖၣ်န့ၣ်လီၤ.