Karen Baptist Convention

ကီၢ်တီအူပကူၦၤကညီဘျၢထံတၢ်အိၣ်ဖှိၣ်သကိးတၢ်အိၣ်ဖှိၣ် အိၣ်ဒီးကမျၢၢ်ခၢၣ်စးတၢ်အိၣ်ဖှိၣ်(၁၆၉)ဘျီတဘျီႇ ဘၣ်တၢ်မၤအီၤဖဲ ကစၢၢ်ဒိၣ်ကညီဘျၢထံတၢ်အိၣ်ဖှိၣ်ႇ ပၢၤထံးကဝီၤႇ ကီၢ်တီအူပကူန့ၣ်လီၤ. တၢ်အိၣ်ဖှိၣ်အံၤဘၣ်တၢ်စးထီၣ်မၤအီၤဖဲ လါမၢ်ၡး(၂၁)သီ တုၤ(၂၃)သီႇ ၂ဝ၂၅နံၣ်န့ၣ်လီၤ. တၢ်အိၣ်ဖှိၣ်တဘျီအံၤ တၢ်တိာ်ထူမ့ၢ်ဝဲ-''စူၢ်နာ်ဂၢၢ်ကျၢၤယွၤတၢ်အၢၣ်လီၤ'' န့ၣ်လီၤ. တၢ်အိးထီၣ်တၢ်အိၣ်ဖှိၣ်အမူးဘၣ်တၢ်မၤ အီၤဖဲ(၂၁)သီဟါ(၆း၃ဝ-၇း၃ဝ)နၣ်ရံၣ်န့ၣ်လီၤ. အိၣ်ဒီးတၢ်မၤလိလံာ်စီဆှံလၢ (၂၂)သီႇ ဂီၤ(၇းဝဝ-၈းဝဝ)နၣ်ရံၣ် ဒီး ဘၣ်တၢ်ဟ့ၣ်ခီဟ့ၣ်နီၤလီၤ တၢ်လၢ သရၣ်မုၣ်ဒီးကထၢၣ်မူမုၢ်ဝါ(ၦၤကညီဘျၢထံခဝ့ၡၢၣ် ယွၤဂ့ၢ်ပီညါ¬ဝဲၤကျိၤႇ ၦၤနဲၣ်တၢ်)န့ၣ်လီၤ. တၢ်ပာ်ဂၢၢ်ပာ်ကျၢၤ ကီၢ်တၢ်စံၣ်ညီၣ်အၢၣ် လီၤတဖၣ်ႇ ကီၢ်တၢ်ဖံးတၢ်မၤန့ၣ်လီၤ. လါမၢ်ၡး(၂၃)သီႇ ဂီၤ(၇းဝဝ-၉းဝဝ)နၣ်ရံၣ် အိၣ်ဒီး ကီၢ်ပိာ်မုၣ်ဝဲၤကျိၤ(၁၂၅)နံၣ် တၢ်စံးဘျုးတၢ်ဘူၣ်တၢ် ဘါတၢ်ရဲၣ်တၢ်ကျဲၤန့ၣ်လီၤ. တၢ်စံးဘျုးတဘျီအံၤ အိၣ်ဒီးတၢ်မၤလၤကပီၤခိၣ်နၢ်စးထီၣ် နံၣ်တကယၤယူၤဘလံၤဝံၤအလီၢ်ခံတဖၣ်န့ၣ်လီၤ. လၢတၢ်ဘူၣ်တၢ်ဘါကတီၢ် ၦၤဟ့ၣ်တၢ်ကစီၣ်မ့ၢ်ဝဲ- သရၣ်မုၣ်ကၠူဖီ(ၦၤကညီဘျၢထံခဝ့ၡၢၣ်ပိာ်မုၣ်ဝဲၤကျိၤႇ ၦၤနဲၣ်တၢ်)န့ၣ်လီၤ. ဂီၤ(၁ဝးဝဝ-၁၂းဝဝ)နၣ်ရံၣ် လၢကီၢ်တၢ်ဘါဖးဒိၣ် ကတီၢ်အိၣ်ဒီး တၢ်တူၢ်လိာ်တၢ်အိၣ်ဖှိၣ်အသီတဖုလၢအမ့ၢ်-(လၢၢ်ခုၣ်နိၣ်)ႇ ဒီးကီၢ်အတၢ်အိၣ်ဖှိၣ်ခဲလၢာ် အိၣ်ဝဲ(၁၆၉)ဖှိၣ်န့ၣ်လီၤ. ပိာ်ထဲထွီၣ်အခံလၢ တၢ်မၤလၤကပီၤ သရၣ်ကၠီရိခိၣ်(ကီၢ်ၦၤစဲးစ့)လၢ အိၣ်ဘှံးက့ၤလၢတၢ်မၤန့ၣ်လီၤ. အိၣ်ဒီးတၢ်မၤလၤကပီၤ ကီၢ်ဖိလံၤလၢ အဖျိထီၣ် (Doctor of Ministry) ခံဂၤလၢအမ့ၢ် သရၣ်မုၣ်ဒီးကထၢၣ်မူမုၢ်ဝါ ဒီး သရၣ်မုၣ်ဒီးကထၢၣ်ဂ့ၤဂ့ၤထူတဖၣ်န့ၣ်လီၤ.
ကီၢ်တၢ်ဘါဖးဒိၣ်ကတီၢ် ၦၤဟ့ၣ်တၢ်ကစီၣ်မ့ၢ်ဝဲ-သရၣ်မုၣ်ဒိၣ်ဒီးကထၢၣ်လ့ထူ(ၦၤကညီဘျၢထံခဝ့ၡၢၣ်ႇ နဲၣ်ရွဲၣ်သဃဲၤ (တၢ်ပၢတၢ်ဆှၢ))န့ၣ်လီၤ. ဟါ(၃းဝဝ)နၣ်ရံၣ်ကတီၢ် အိၣ်ဒီးတၢ်အီၣ်ဘူၣ်သ့ၣ်နီၣ်တၢ်ဘူၣ်တၢ်ဘါ တၢ်ရဲၣ်တၢ်ကျဲၤန့ၣ်လီၤ. ဟါ(၆းဝဝ-၇းဝဝ)နၣ်ရံၣ် တၢ်မၤဝံၤက့ၤတၢ်ဖံးတၢ်မၤကတီၢ် အိၣ်ဒီးတၢ်ကတိၤစံးဘျုးတမှံၤသရၣ်တဖၣ်လၢ -သရၣ်ဒိၣ်ကၠီရံၣ်ဟဲႇ တၢ်ကတိၤစံးဘျုးသဝီ ဖိတဖၣ်လၢ သရၣ်မုၣ်ဟ့ၣ်မါလယၣ်န့ၣ်လီၤ.  တၢ်အိၣ်ဖှိၣ်တဘျီအံၤ အိၣ်ဒီး တၢ်ပာ်ဂၢၢ်ပာ်ကျၢၤခိၣ်နၢ်အသီ ဒီး တၢ်ဟ့ၣ်ခီဟ့ၣ်နီၤလီၤ က့ၤတၢ်ဖံးတၢ်မၤတၢ်ရဲၣ်တၢ်ကျဲၤတဖၣ်န့ၣ်လီၤ. ကီၢ်နဲၣ်ရွဲၣ် သရၣ်ဒိၣ်ဒီးကထၢၣ်နံၤဒိၣ်ထူ ဆူ နဲၣ်ရွဲၣ်အသီ သရၣ်ဒိၣ်ဒီးကထၢၣ်န့ၢ်ထိလ့ႇ ပိာ်မုၣ်ဝဲၤကျိၤ သရၣ်မုၣ်မုၢ်နၤဖီ ဆူ ၦၤနဲၣ်တၢ်အသီ-သရၣ်မုၣ်အဲၣ်ဘျုးဖီႇ ဝဲၤကျိၤလၢသးစၢ်တၢ်မၤအဂီၢ်ၦၤနဲၣ်တၢ် သရၣ်အဲၣ်ဒိၣ်စိ ဆူ ၦၤနဲၣ်တၢ်အသီ သရၣ်ဝါဒိၣ်ႇ သရၣ်သမါဝဲၤကျိၤၦၤနဲၣ်တၢ် သရၣ်ဒိၣ်ဒီးကထၢၣ်န့ၢ်ထိလ့ ဆူ ၦၤနဲၣ်တၢ်အသီ သရၣ်သဲးနီၣ်ထိႇ ခရံာ်ဖိလီၢ် ခၢၣ်သး သရၣ်ဟဲထူ ဆူ ၦၤနဲၣ်တၢ်အသီ သရၣ်အံၣ်စရ့လးထူႇ ကီၢ်ၦၤပၢၤလီၢ်ဆ့ၣ်နီၤ သရၣ်ဒိၣ်နံးမရိး ဆူ  သရၣ်ဒိၣ်ကၠီရံၣ်ဟဲတဖၣ်န့ၣ်လီၤ. တၢ်ပာ်စီဆှံခိၣ်နၢ်အသီတဖၣ်အဂီၢ် ဘၣ်တၢ်ထုကဖၣ် ပာ်စီဆှံလၢ သရၣ်မုၣ်ဒိၣ်ဒီးကထၢၣ်လ့ထူန့ၣ်လီၤ. ပိာ်ထဲထွီၣ်အခံလၢ တၢ်ပာ်စီဆှံအသးတၢ်ဘါန့ၣ်လီၤ. တၢ်ပာ်စီဆှံတၢ်ကစီၣ် ဘၣ်တၢ်ဟ့ၣ်ခီဟ့ၣ်နီၤလီၤလၢ သရၣ်မုၣ်ဒီးကထၢၣ်ဂ့ၤဂ့ၤထူ(ၦၤကညီဘျၢထံခဝ့ၡၢၣ်ႇ တၢ်ဘၣ်ထွဲ တုၤအိၣ်လိာ်သးဝဲၤကျိၤ)န့ၣ်လီၤ. ခၢၣ်စးလၢဟဲထီၣ်တၢ်အိၣ်ဖှိၣ်ခဲလၢာ်အိၣ်ဝဲ (၃ဝဝ)ဂၤန့ၣ်လီၤ.