Karen Baptist Convention

ၦၤကညီဘျၢထံခဝံၡၢၣ် တၢ်ကဟုကယာ်ဒီး တၢ်ကူၣ်လိာ်တၢ်ဝဲၤကျိၤတီခိၣ်ရိၣ်မဲဒီး သုးကျဲၤမၤ-''World Mental Health" မုၢ်နံၤဖဲ လါအီးကထိဘၢၣ်(၁ဝ)သီႇ ၂ဝ၂၅အနံၤ စးထီၣ်ဂီၤ(၉)နၣ်ရံၣ်တုၤ ဟါ(၃)နၣ်ရံၣ်န့ၣ်လီၤ. တၢ်ရဲၣ်တၢ်ကျဲၤတဘျီအံၤ ၦၤဟ့ၣ်ခီဟ့ၣ်နီၤတၢ်မ့ၢ်ဝဲ သရၣ်မုၣ်နဲးလဲၣ်ယတနၢ်စိ န့ၣ်လီၤ.ဝဲၤလီၢ်ၦၤမၤသကိးတၢ် ဟဲထီၣ်ခဲလၢာ်အိၣ်ဝဲ(၃ဝ)ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ သုးကျဲၤမၤတၢ်ကတိၤလီၤဆီ ဘၣ်ထဲဒွီး ''တၢ်သ့ၣ်ညါထံ ယွၤအတၢ်ကိး'' ဖဲ လါစဲးပတ့ဘၢၣ်(၁၅)သီႇ ဟါ(၇းဝဝ)နၣ်ရံၣ်ႇ ၂ဝ၂၅အနံၤ လၢ ဆဲးကျိးန့ၢ်တီၤန့ၣ်လီၤ. ၦၤဟ့ၣ်ခီဟ့ၣ်နီၤတၢ် မ့ၢ်ဝဲ-သရၣ်ဒိၣ်ဒီးကထၢၣ်သ့ရွှ့ၣ်(ကိၣ်သၣ်ဖၠူၣ်လံာ်စီဆှံကၠိခိၣ် မၤတ့ၢ်တၢ်)န့ၣ်လီၤ.အိၣ်ဒီးတၢ်တဲသကိး တၢ်သံကွၢ်တဖၣ်စ့ၢ်ကီးန့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ-  သရၣ်ဒိၣ်ဒီးကထၢၣ်မိစဲးသ့(ဝဲၤကျိၤ ၦၤနဲၣ်တၢ်) ၦၤဟဲထီၣ်လၢ (devices- ၅၄)ခါန့ၣ်လီၤ.

ၦၤကညီဘျၢထံခဝ့ၡၢၣ်ႇ လံ၁်လဲၢ်ဒီးတၢ်ဆဲးတၢ်လၤဝဲၤကျိၤအိၣ်ဒီး တၢ်ကတိၤလီၤဆီ ဘၣ်ထွဲဒီး ''ကီၢ်ကၠီၣ်တဲၣ်ကညီလံာ်လဲၢ် တၢ်ဆဲးတၢ်လၤ" ဖဲ လါစဲးပတ့ဘၢၣ်(၂၅)သီႇ ဟါ(၆းဝဝ)နၣ်ရံၣ် လၢဆဲးကျိးန့ၢ်တီၤန့ၣ်လီၤ. ၦၤပၢၤလီၢ်ဆ့ၣ်နီၤ-သရၣ်မုၣ်ဆၢန့ၢ်ဂ့ၤ (လံာ်လဲၢ်ဒီးတၢ်ဆဲးတၢ်လၤဝဲၤကျိၤ ၦၤနဲၣ်တၢ်), တၢ်ကတိၤဆၢဂ့ၤဆၢဝါလၢ သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်),တၢ်ကတိၤလီၤဆီ ဘၣ်တၢ်စံးကတိၤန့ၢ်လၢ သရၣ်ထိၣ်ကံၢ်ဝါ(TKBC နဲၣ်ရွဲၣ်သဃဲၤ)ဒီး တၢ်ထုကဖၣ် တဘျီဃီဆိၣ်ဂ့ၤပျၢ်တၢ်လၢ သရၣ်ဒိၣ်ဒီးကထၢၣ်စ့စီ(ဝဲၤကျိၤ ၦၤပၢၤလီၢ်ဆ့ၣ်နီၤ)န့ၣ်လီၤ. ၦၤဟဲထီၣ်သကိးခဲလၢာ်လၢ (devices) ၃၆ ခါန့ၣ်လီၤ.

ဖဲလါစဲးပတ့ဘၢၣ် (၂-၅)သီႇ ၂ဝ၂၅ နံၣ်န့ၣ် ၦၤကညီဘျၢထံခဝ့ၡၢၣ်ႇ လံ၁်လဲၢ်ဒီးတၢ်ဆဲးတၢ်လၤဝဲၤကျိၤအိၣ်ဒီး ''တၢ်သ့ကွဲးလံ၁် တၢ်မၤလိ'' ဖဲ ခဝ့ၡၢၣ်နံၣ်(၁ဝဝ) တၢ်စံးဘျုးစံးဖှိၣ်တၢ်သူၣ်ထီၣ်ႇ အလူၣ်ႇ ဝ့ၢ်တကူၣ်န့ၣ်လီၤ. (၂.၉.၂ဝ၂၅) ဂီၤ (၇းဝဝ) န့ၣ် တၢ်စးထီၣ်တၢ်ဘူၣ်တၢ်ဘါ တၢ်ရဲၣ်တၢ်ကျဲၤဒီး တၢ်သ့ၣ်ညါလိ၁်သးန့ၣ်လီၤ. တၢ်မၤလိအံၤကီၢ်(၁၁)ကီၢ် ဟဲထီၣ်ဝဲလီၤ. တၢ်မၤလိကၠိဖိနီၣ်ဂံၢ်အိၣ်ဝဲ (၁၈)ဂၤန့ၣ်လီၤ. န့ၣ်လီၤ. သရၣ်လၢအသိၣ်လိလံ၁်စီဆှံမ့ၢ်ဝဲ သရၣ်ဒိၣ်ဒီးကထၢၣ်ၡမူၤအ့လးတီ ဒီး သရၣ်ဒိၣ်ဒီးကထၢၣ်စ့စီလီၤ. လၢတၢ်ကတိၤလီၤဆီတခီန့ၣ်မ့ၢ်ဝဲ သရၣ်မုၣ်ဒီးကထၢၣ်ခၠံၣ်ဖိဒီး သရၣ်မုၣ်ၡါရိၣ်ဖီလီၤ. သရၣ်မုၣ်ဒိၣ်တ့ၣ်မ့ၣ်ဖၠူၣ်သိၣ်လိဝဲ ''တၢ်သ့ကွဲး ဖှိၣ်ရၤဒီး တၢ်သ့ကွဲးတၢ်ကစီၣ်'' အဂ့ၢ်လီၤ. ဒီး သရၣ်ဒိၣ်ဒီးကထၢၣ်သီကၠံၣ်သိၣ်လိဝဲ How to be a good writer အဂ့ၢ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤ လၢတၢ်မၤသကိးတၢ်ဒီး ကရူၢ်(၃) ''တၢ်ဒုးဆူၣ်ထီၣ် တၢ်အိၣ်ဖှိၣ်တၢ်ရဲၣ်တၢ်ကျဲၤ'' ဒီးတီခိၣ်ရိၣ်မဲသုးကျဲၤမၤ ဘၣ်  ''ဘျၢထံခရံာ်ဖိတၢ်စူၢ်တၢ်နာ်အဂံၢ်ထံး" တၢ်သးဝံၣ်ပြၢ လၢကီၢ်အဘ့ၣ်(၂ဝ)ဝဲၤလီၢ်တဖၣ်န့ၣ်လီၤ. ကီၢ်နုာ်လီၤသတြီၤတၢ်အိၣ်ဝဲ(၁၆)ဘ့ၣ်န့ၣ်လီၤ. စံၣ်ညီၣ်ကီၢ်တဖၣ်လၢအမ့ၢ်-သရၣ်ဒိၣ်တီသးဖှံႇ သရၣ်ရ့ဘိႇ သရၣ်ဒီးကထၢၣ်န့ၢ်လ့အီၣ်တဖၣ် ထံၣ်လိာ်သး ဖဲလါစဲးပတ့ဘၢၣ်(၉)သီႇ မုၢ်ဆါ(၁)နၣ်ရံၣ်လၢ ဝဲၤကျိၤအဒၢးန့ၣ်လီၤ. တၢ်ဒုးသ့ၣ်ညါ ၦၤန့ၢ်ခိၣ်ဖး ဒီးတၢ်ဟ့ၣ်လီၤခိၣ်ဖးကမ့ၢ်ဝဲဖဲ လါနိၣ်ဝ့ဘၢၣ်(၁၉)သီႇ၂ဝ၂၅ ဟါပၢဆှၢတၢ်ကမံးတံာ် တၢ်အိၣ်ဖှိၣ်ဝံၤအဆၢကတီၢ်န့ၣ်လီၤ.

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ် သုးကျဲၤမၤဝဲ တလါတဘျီတၢ်ရ့လိာ်မုာ်လိာ်ဒီး တၢ်မၤလိလံာ်စီဆှံ ဖဲ လါစဲးပတ့ပဘၢၣ်(၁၃)သီႇ ၂ဝ၂၅အနံၤႇ ဟါ(၇းဝဝ)နၣ်ရံၣ်  လၢ ဆဲးကျိးန့ၢ်တီၤန့ၣ်လီၤ. ၦၤဟ့ၣ်ခီဟ့ၣ်နီၤ တၢ်မ့ၢ်ဝဲ-သရၣ်မုၣ်အဲမၣ်ထူ လၢကီၢ်တကူၣ်လံာ်စီဆှံကၠိန့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ -သရၣ်ဒူတီ(တၢ်ရဲၣ်တၢ်ကျဲၤမူဒါခိၣ်)ႇ သရၣ်မုၣ်စၢ်ဘျုးဝါ(ၦၤနဲၣ်တၢ်) ကတိၤဆၢဂ့ၤဆၢဝါတၢ်ႇ သရၣ်တီလိၤမူ(ၦၤနဲၣ်တၢ်သဃဲၤ) ထုကဖၣ်လၢ ၦၤခဲလၢာ်အဂီၢ်န့ၣ်လီၤ. နၢ်ဟူဘၣ် တၢ်သးဝံၣ်လၢ ကီၢ်ဒဝဲၣ်ဘျံးကျဲးစၢကရၢ ဒီးသးစၢ်ဟဲထီၣ်ခဲလၢာ်အိၣ်ဝဲ(၇ဝ)ဘျဲၣ် လၢ (devices)(၄၅)ခါန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကဟုကယာ်ဒီးတၢ်ကူၣ်လိာ်တၢ်ဝဲၤကျိၤအိၣ်ဒီး တၢ်ကတိၤလီၤဆီ ဘၣ်ထဲဒွီး ''ၦၤဟးဖံးဟးမၤ တၢ်လၢ ထံဂုၤကီၢ်ဂၤအဂီၢ်တၢ်လၢ ကြၢးသ့ၣ်ညါတဖၣ်ဒီး တၢ်လဲၤခီဖျိတဖၣ်'' လၢ သရၣ်ဒိၣ်ၡမူၤအ့လး(မလ့ၡါ)န့ၣ်လီၤ. တၢ်ရဲၣ်တၢ်ကျဲၤအံၤ ဘၣ်တၢ်မၤအီၤလၢ ဆဲးကျိးန့ၢ်တီၤဖဲ လါအီကူာ်(၁၄)သီႇ ဟါ(၆)နၣ်ရံၣ်ႇ ၂ဝ၂၅အနံၤန့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်မုၣ်မၠိမၠိစၣ်ႇ တၢ်ထုကဖၣ်လၢ သရၣ်မုၣ်ဒိၣ်ဒီးကထၢၣ်ဖီဂီၤန့ၣ်လီၤ. တၢ်ကတိၤလီၤဆီဝံၤ ပိာ်ထဲထွီၣ်အခံလၢ တၢ်သံကွၢ်စံးဆၢတဖၣ်န့ၣ်လီၤ. ၦၤဟဲထီၣ်တၢ်ကတိၤလီၤဆီအံၤ လၢ(devices) (၄၉)ခါ ဒီး ၦၤကညီနီၣ်ဂံၢ်ကအိၣ်ဝဲအဂၤ(၅ဝ)ဘျဲၣ်ဘျဲၣ်န့ၣ်လီၤ.

ၦၤကညီဘျၢထံခဝ့ၡၢၣ် အိၣ်ဒီး တၢ်ကုၢ်ဃိစီမ့ၣ်ဒီးတၢ်ခူၣ်လီၤၦၤသံ တၢ်ကတိၤခီလဲတၢ်ရဲၣ်တၢ်ကျဲၤ ဘၣ်တၢ်မၤအီၤဖဲ လါအီကူာ်(၁၄)သီႇ ၂ဝ၂၅ အနံၤ လၢ ဆဲးကျိးန့ၢ်တီၤန့ၣ်လီၤ. တၢ်ရဲၣ်တၢ်ကျဲၤအံၤ အိၣ်ဒီးတၢ်ပညိၣ်တၢ်ကွၢ်စိလၢအမ့ၢ် - မ့ၢ်ဒ်သိးပကနၢ်ပၢၢ်အါထီၣ်ထူဂ့ၢ်ယွၤကျိၤ ဘၣ်ထွဲဒီးတၢ်ခူၣ်လီၤၦၤသံအဂ့ၢ် - မ့ၢ်ဒ်သိးပကနၢ်ပၢၢ်အါထီၣ် တၢ်ကုၢ်ဃိစီမ့ၣ်ခူၣ်လီၤၦၤသံဒီး ထူဂ့ၢ်ယွၤကျိၤအတၢ်ဘၣ်ထွဲအဂ့ၢ် - မ့ၢ်ဒ်သိးၦၤကညီဘျၢထံခဝ့ၡၢၣ်ဖိလံၤတဖၣ် ကအိၣ်ဒီး တၢ်နၢ်ပၢၢ်လိ၁်သး ဘၣ်ထွဲတၢ်ခူၣ်လီၤ ဘျၢလီၤက့ၤ ၦၤသံအဂ့ၢ်န့ၣ်လီၤ. တၢ်ရဲၣ်တၢ်ကျဲၤအံၤ စးထီၣ်ဖဲ ဂီၢ်(၉းဝဝ)နၣ်ရံၣ်တုၤ ဟါ(၃းဝဝ)နၣ်ရံၣ်န့ၣ်လီၤ. ၦၤပၢၤလီၢ်ဆ့ၣ်နီၤ - သရၣ်ဒိၣ်စၢ်ဟ့ၣ်ဂ့ၤဒီး ၦၤကွဲးနီၣ်တၢ် မ့ၢ်ဝဲ သရၣ်မုၣ်ဒိၣ်ဒီးကထၢၣ်လ့ထူ (ခဝ့ၡၢၣ်နဲၣ်ရွဲၣ်သဃဲၤ တၢ်ပၢတၢ်ဆှၢ)န့ၣ်လီၤ. တၢ်ပာ်ဖျါ တၢ်ဂ့ၢ်တၢ်ကျိၤလၢတၢ်ကတိၤခီလဲ အံၤလၢ သရၣ်ဒိၣ်ယွၤဒုးမူ (ခဝ့ၡၢၣ် နဲၣ်ရွဲၣ်) ဒီး တၢ်ကတိၤနီၣ်ဝံၤခံလၢ သရၣ်ဒိၣ်ဒီးကထၢၣ်စဲမစၢၣ်(ကရၢခိၣ်)န့ၣ်လီၤ. တၢ်ဟ့ၣ်ထီၣ်ဘၣ်ထဲွ တၢ်ကုၢ်ဃိစီဒီး တၢ်ခူၣ်လီၤၦၤသံ လၢသရၣ်ဒိၣ်ခရံာ်စတိၣ်ဖၢၣ်ဒ့ (ၦၤကညီဘျၢထံ ယွၤဂ့ၢ်ပီညါဖၠၣ်စိမိၤ ကၠိခိၣ်)န့ၣ်လီၤ. အိၣ်ဒီးတၢ်နီၤဖး ကရူၢ်(၃)ကရူၢ်လၢ တၢ်ကတိၤသကိးအဂီၢ်န့ၣ်လီၤ. ကရူၢ်(၁) ကီၢ်သရၣ်သမါ နၣ်ရွဲၣ်/ၦၤနဲၣ်တၢ်တဖၣ်ႇ ကရူၢ်(၂) ကမံးတံာ်မၤတၢ်တဖၣ် ဒီး ကရူၢ်(၃)လၢအမ့ၢ် လံာ်စီဆှံကၠိသရၣ်သမါတဖၣ်န့ၣ်လီၤ. တၢ်ကတိၤခီလဲတၢ်ထၢဖှိၣ်က့ၤတၢ်ဂ့ၢ် ဘၣ်တၢ်တီခိၣ်ရိၣ်မဲလၢ သရၣ်မုၣ်ဒိၣ်မၠီမၠးဖီ(ခဝ့ၡၢၣ်နဲၣ်ရွဲၣ်သဃဲၤ -တၢ်ရ့လိာ်မၤသကိးဒီး တၢ်ဂုၤထီၣ်ပသီထီၣ်)န့ၣ်လီၤ. တၢ်ကတိၤစံးဘျုးက့ၤလၢ ခဝ့ၡၢၣ်နဲၣ်ရွဲၣ် ဝံၤ ပျၢ်က့ၤတၢ်ကတိၤခီလဲ တၢ်ရဲၣ်တၢ်ကျဲၤအံၤန့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤအံၤ လၢ(Devices) ၈၃(ခါ)န့ၣ်လီၤ.

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ် အိၣ်ဒီးတလါတဘျီတၢ်မၤလိလံာ်စီဆှံ ဖဲ လါအီကူာ်(၉)သီႇ ဟါ(၇)နၣ်ရံၣ်ႇ ၂ဝ၂၅အနံၤ လၢ ဆဲးကျိးန့ၢ်တီၤန့ၣ်လီၤ. တၢ်ဂ့ၢ်အခိၣ်တီလၢဘၣ်တၢ်ဟ့ၣ်ခီဟ့ၣ်နီၤ မ့ၢ်ဝဲ-''သးစၢ်ဒီး တၢ်ရ့လိာ်ဘၣ်ထွဲ"န့ၣ်လီၤ. သရၣ်ဒိၣ်ဒီးကထၢၣ်အီးထ့ဘယၢးစ်အ့(ကီၢ်တကူၣ်လံာ်စီဆှံကၠိ-ကၠိခိၣ်) ဟၣ်ခီဟ့ၣ်နီၤတၢ်န့ၣ်လီၤ. သးစၢ်လၢဟဲထီၣ်တၢ်သိၣ်လိအိၣ်ဝဲ (၁ဝဝ)ဃၣ်ဃၣ်လၢ (devices) (၇၂)ခါန့ၣ်လီၤ.

ၦၤကညီဘျၢထံခဝ့ၡၢၣ် တၢ်သးခုကစီၣ်ဒီးမံးၡၢၣ်ဝဲၤကျိၤ အိၣ်ဒီးတၢ်မၢဖိတၢ်မၤလိ(၆)ဘျီတဘျီ လါအီကူာ်(၄)သီ တုၤ (၂၂)သီႇ ၂ဝ၂၅နံၣ်ဖဲ  ကီၢ်တကူၣ်ကျဲးစၢးကရၢတၢ်သူၣ်ထီၣ်န့ၣ်လီၤ. တၢ်မၤလိတဘျီအံၤ တၢ်သိၣ်လိလၢ ဘၣ်တၢ်ဟ့ၣ်ခီဟ့ၣ်နီၤအီၤတဖၣ်မ့ၢ်ဝဲ- တၢ်မၤလိလံာ်စီဆှံ-သရၣ်မုၣ်ရံနၣ်ဖီႇ သရၣ်ဒီးကထၢၣ်န့ၢ်လ့အီၣ်ႇ သရၣ်မုၣ်သီအဲၣ်ႇ ''တၢ်အုၣ်က့ၤခီၣ်က့ၤ'' လၢ သရၣ်ဒိၣ်ဖိထူႇ ''CCMP'' လၢ သရၣ်ဒိၣ်လးဖ့ၣ်ႇ  ''တၢ်သးခုကစီၣ်အကျဲကူၣ်နၢၤ'' လၢ သရၣ်ဒိၣ်မ့အီၣ်ထိႇ ''မုၢ်နံၤခံကတၢၢ်တၢ်ကမၤအသးတဖၣ်''လၢ သရၣ်ဒိၣ်တ့ၣ်စီႇ ''နံၣ်ကယၤ(၂၁)တၢ်တၤဒီး တၢ်မၤတၢ်သးခုကစီၣ်တၢ်မၤ'' လၢ သရၣ်မုၣ်ဒီးကထၢၣ်တ့ၣ်စံၣ်မိႇ ''နီၢ်တဂၤတၢ်မၤတၢ်သးခုကစီၣ်'' လၢ သရၣ်လွါမိထဲးအီၣ်ႇ ''Praise and Worship'' လၢသရၣ်သးဂ့ၤကိလ်တဖၣ်န့ၣ်လီၤ. ကီၢ်(၁၁)ဘ့ၣ်ခၢၣ်စး ၦၤဟဲထီၣ်အိၣ်ဝဲ(၁၅)ဂၤန့ၣ်လီၤ.