Karen Baptist Convention

ၦၤကညီဘျၢထံခ၀့ၡၢၣ် ခိၣ်နၢ်အိၣ်မူအိၣ်ဒါတဖၣ် ဒီး၀ဲၤကျိၤၦၤနဲၣ်တၢ်တဖၣ် အိၣ်ဒီးတၢ်ခွဲးတၢ်ယာ်လၢ တၢ်ထံၣ်လိာ်သကိးသးဒီး ကီၢ်တကူၣ်ခိၣ်နၢ်အိၣ်မူအိၣ်ဒါတဖၣ်ဒီး ၀ဲၤကျိၤၦၤနဲၣ်တၢ်, ကရၢခိၣ်နၢ်တဖၣ် လၢ ကီၢ်တကူၣ် ၀ဲၤလီၢ်တၢ်အိၣ်ဖှိၣ်ဒၢး ဖဲ(၃၀.၉.၂၀၂၂) အနံၤ န့ၣ်လီၤ. တၢ်ထံၣ်လိာ်သးတဘျီအံၤ အိၣ်ဒီး တၢ်ပာ်ဖျါဒီးတၢ်တဲနၢ်ပၢၢ်လိာ်သး ဘၣ်ထွဲတၢ်ဖံးတၢ်မၤ တဖၣ် ဆူ ကီၢ် ဒီး ခ၀့ၡၢၣ်န့ၣ်လီၤ.

ၦၤကညီဘျၢထံခဝ့ရှၢၣ် ပိာ်ခွါဝဲၤကျိၤအိၣ်ဒီး ''Transforming Masculinity'' တၢ်မၤလိဖဲ ခဝ့ ရှၢၣ် နံၣ်(၁ဝဝ)တၢ်စံးဘျုးတၢ်သူၣ်ထီၣ်ႇ စးထီၣ်ဖဲလါစဲးပတ့ဘၢၣ်(၁၃)သီတုၤ(၁၅)သီန့ၣ်လီၤ. တၢ်မၤလိတဘျီအံၤ အိၣ် ဒီးတၢ်သိၣ်လိလံာ်စီဆှံလၢ-သရၣ်ဒိၣ်ကွၢ်လၢ်ယိၤသးတီ ဒီးၦၤသိၣ်လိတၢ်မ့ၢ်ဝဲ-သရၣ်ဘံၣ်လံၣ်ကၣ်မၠး(Thingaha Gender Organization)န့ၣ်လီၤ. ကီၢ်(၆)ဘ့ၣ်လၢအမ့ၢ်-ကီၢ်ထးခီႇ ကီၢ်တကူၣ်ႇ ကီၢ်ဆီထံးႇ ကီၢ်တီအူပကူႇ တီအူ ကီၢ်ကဲၤခၢၣ်ကဲၤဘါႇ ဒီးကီၢ်ကယါဖူး ခၢၣ်စးတဖၣ်ဟဲထီၣ်တၢ်မၤလိအံၤန့ၣ်လီၤ. ၦၤဟဲထီၣ်ခဲလၢအိၣ်ဝဲအဂၤ (၂ဝ) န့ၣ်လီၤ.

ၦၤကညီဘျၢထံခဝရှၢၣ် လံာ်လဲၢ်ဒီးတၢ်ဆဲးတၢ်လၤဝဲၤကျိၤ အိၣ်ဒီးတၢ်ကတိၤသီဒီးလီၤဘၢတၢ်ဒိးစဲ လၢ ခဝ့ရှၢၣ်ဝဲၤလီၤၦၤမၤသကိးတၢ်တဖၣ်အဂီၢ်ဖဲ လါအီကူာ်(၂၉)သီႇ မုၢ်ထူၣ်(၁၂)နၣ်ရံၣ် ဖဲခဝရှၢၣ်ဝဲၤလီၢ်တၢ်အိၣ်ဖှိၣ်ဒၢး န့ၣ်လီၤ. တၢ်ဒိးစဲးတဘျီအံၤ ၦၤနုာ်လီၤဒိးစဲးခဲလၢာ် အိၣ်ဝဲ(၉)ဂၤန့ၣ်လီၤ.

ကီၢ်တီအူပကူ ၦၤကညီဘျၢထံခရံာ်ဖိတၢ်အိၣ်ဖှိၣ်သကိးတၢ်အိၣ်ဖှိၣ် တၢ်ဘၣ်ထွဲတုၤအိၣ်လိာ်သး၀ဲၤကျိၤ အိၣ် ဒီး တၢ်ဘၣ်ထွဲတုၤအိၣ်လိာ်သး တၢ်မၤလိ ဖဲလါစဲးပတ့ဘၢၣ်(၈)သီ, ၂၀၂၂နံၣ်န့ၣ်လီၤ. တၢ်မၤလိတဘျီအံၤ ဘၣ်တၢ်မၤ အီၤဖဲ ပကူ၀့ၢ်သီတၢ်အိၣ်ဖှိၣ်န့ၣ်လီၤ. တၢ်အိးထီၣ်တၢ်မၤလိအံၤလၢ တၢ်ဘူၣ်သကိးဘါသကိးဃွၤန့ၣ်လီၤ. လၢတၢ်ဘါ ကတီၢ် ၦၤပၢၤလီၢ်ဆ့ၣ်နီၤမ့ၢ်၀ဲသရၣ်မုၣ်ဒီးကထၢၣ်လ့မၠၣ်ခဲၣ်(၀ဲၤကျိၤၦၤပၢၤလီၢ်ဆ့ၣ်နီၤ), တၢ်ကတိၤဆၢဂ့ၤ- သရၣ်ဒိၣ် ဒီးကထၢၣ်နံၤဒိၣ်ထူ(ကီၢ်နဲၣ်ရွဲၣ်), တၢ်ကစီၣ်-သရၣ်စီလမိၣ်လး(ၦၤနဲၣ်တၢ်မၤတ့ၢ်တၢ်), တၢ်ထုကဖၣ်- သရၣ်မုၣ်လါ ခုၣ်ဖီ(လံာ်လဲၢ်ဒီးတၢ်ဆဲးတၢ်လၤ၀ဲၤကျိၤ ၦၤပၢၤလီၢ်ဆ့ၣ်နီၤ), တၢ်ဆိၣ်ဂ့ၤပျၢ်-သရၣ်ဒိၣ်ဒီးကထၢၣ်န့ၣ်ထိလ့(သရၣ် သမါ၀ဲၤကျိၤၦၤနဲၣ်တၢ်), တၢ်ကတိၤစံးဘျုးဒီးတၢ်ဘိးဘၣ်သ့ၣ်ညါ-သရၣ်မုၣ်မုာ်ဂ့ၤဒိၣ်(ၦၤနဲၣ်တၢ်)တဖၣ်န့ၣ်လီၤ. တၢ် မၤလိတဘျီအံၤ သရၣ်မုၣ်မုာ်ဂ့ၤဒိၣ် (၀ဲၤကျိၤၦၤနဲၣ်တၢ်)ပာ်ဖျါ ၀ဲၤကျိၤတၢ်ပညိၣ်ကွၢ်စိတၢ်ကွၢ်စိ, တၢ်ပာ်လုၢ်ပာ်ၦ့ၤတဖၣ်, တၢ်ဖံးတၢ်မၤအဂ့ၢ်တဖၣ်, တၢ်တဲဖျါခ၀့ၡၢၣ်တၢ်ဘၣ်ထွဲတုၤအိၣ်လိာ်သး၀ဲၤကျိၤအဂ့ၢ် လၢ သရၣ်မုၣ်ဂ့ၤဂ့ၤထူ (ခ၀့ၡၢၣ်တၢ်ဘၣ်ထွဲတုၤအိၣ်လိာ်သး၀ဲၤကျိၤ ၦၤနဲၣ်တၢ်သဃဲၤ),  ဒီးၦၤဟ့ၣ်ခီဟ့ၣ်နီၤတၢ်မ့ၢ်၀ဲ-သရၣ်ဒိၣ်မူဖျၢၣ်ထူ (ခ၀့ၡၢၣ် တၢ်ဘၣ်ထွဲတုၤအိၣ်လိာ်သး၀ဲၤကျိၤ ၦၤနဲၣ်တၢ်) တဖၣ်န့ၣ်လီၤ. ၦၤဟဲထီၣ်တၢ်မၤလိဖၣ်မ့ၢ်၀ဲ-၀ဲၤကျိၤကမံးတံာ်ခိၣ် နၢ်တဖၣ်, က၀ီၤနဲၣ်ရွဲၣ်တဖၣ် ဒီး၀ဲၤလီၢ်ခိၣ်နၢ်တဖၣ် ခဲလၢာ်အိၣ်၀ဲ(၂၁)ဂၤန့ၣ်လီၤ.

ၦၤကညီဘျၢထံခ၀့ၡၢၣ် တၢ်သးခုကစီၣ်ဒီးမံးၡၢၣ်၀ဲၤကျိၤ
ၦၤကညီဘျၢထံခ၀့ၡၢၣ် တၢ်သးခုကစီၣ်ဒီးမံးၡၢၣ်၀ဲၤကျိၤအိၣ်ဒီး " Empowering Spiritual Leadership''တၢ်မၤလိဖဲ ခ၀့ၡၢၣ်နံၣ်တကယၤတၢ်စံးဘျုး တၢ်သူၣ်ထီၣ်ဖဲ လါအီကူာ်(၃၀)သီ တုၤ လါစဲးပတ့ဘၢၣ်(၁)သီယ ၂၀၂၂နံၣ်, တၢ်မၤလိတဘျီအံၤ သရၣ်သိၣ်လိတၢ်တဖၣ်မ့ၢ်၀ဲ ''တၢ်သိၣ်လိလံာ်စီဆှံ" – သရၣ်မုၣ်ကၠဟိၡံဘၤထိ, "Theological Foundation for Leaders" သရၣ်ဒီးကထၢၣ်အီးထ့ဘံၣ်ယးစ်အ့, "Leadership In Crisis"-သရၣ်မုၣ်အဲမၣ်ထူ, "Holy Spirit Leads Leadership" - သရၣ်ဒိၣ်ဒီးကထၢၣ်အဲၣ်သီတဖၣ်, ကီၢ်ခၢၣ်စးလၢ ဟဲထီၣ်တၢ်သိၣ်လိတဖၣ်မ့ၢ်၀ဲ- ကီၢ်တၢ်သးခုကစီၣ်ၦၤနဲၣ်တၢ်တဖၣ်ယ ၦၤနဲၣ်တၢ်သဃဲၤတဖၣ်ယ တၢ်မၢဖိတဖၣ် ဒီးတၢ်အိၣ် ဖှိၣ်သရၣ်တဖၣ် ဒီး ၀ဲၤလီၢ်ၦၤမၤတၢ်ဖိတဖၣ် န့ၣ်လီၤ.ကီၢ်(၁၁)ဘ့ၣ်ခၢၣ်စး ၦၤဟဲထီၣ်တၢ်မၤလိအိၣ်၀ဲ(၂၈)ဂၤန့ၣ်လီၤ.

ၦၤကညီဘျၢထံခ၀့ၡၢၣ် ဟီၣ်ခိၣ်လီၢ်တၢ်ထံၣ်စိ
ၦၤကညီဘျၢထံခ၀့ၡၢၣ် ကျိၣ်စ့ဒီးတၢ်စုလီၢ်ခီၣ်ခိၣ်၀ဲၤကျိၤ အိၣ်ဒီးခံသီတၢ်ရဲၣ်တၢ်ကျဲၤလၢအမ့ၢ် တၢ်ကတိၤသကိးဘၣ်ထွဲ"ဟီၣ်ခိၣ်လီၢ်တၢ်ထံၣ်စိ'' တၢ်ဖံးတၢ်မၤဆူညါအဂီၢ် ဖဲ လါအီကူာ်(၂၃-၂၄)သီ,၂၀၂၂နံၣ် ဖဲမ့ယဲကၠီၣ်စွၣ်ကျဲ, အလူၣ်၀့ၢ်ဆၣ်,၀့ၢ်တကူၣ်န့ၣ်လီၤ.ၦၤဟဲထီၣ်တၢ်ရဲၣ်တၢ်ကျဲၤတဖၣ်မ့ၢ်၀ဲ ခ၀့ၡၢၣ်ခိၣ်နၢ်အိၣ်မူအိၣ်ဒါ, ၀ဲၤကျိၤခိၣ်နၢ်တဖၣ် ဒီး ဟီၣ်ခိၣ်လီၢ်တၢ်ထံၣ်စိ ကမံးတံာ်ဖိတဖၣ်န့ၣ်လီၤ.

ကီၢ်မၠီမၠး အိၣ်ဒီးခိၣ်နၢ်အတၢ်ဆီတလဲ၀ံၤ ခိၣ်နၢ်လၢ ဘၣ်တၢ်ဃုထၢထီၣ်အီၤအသီတဖၣ် ဖဲ(၁၉.၄.၂၀၂၂)အနံၤန့ၣ် လီၤ. တၢ်ရဲၣ်တၢ်ကျဲၤတဘျီအံၤ အိၣ်ဒီးတၢ်ဟ့ၣ်လီၤက့ၤမူဒါဒီး တၢ်ဖံးတၢ်မၤဆူခိၣ်နၢ်အသီတဖၣ်အစုပူၤန့ၣ်လီၤ. အဆိအိၣ်ဒီး တၢ်ဘူၣ်သကိးဘါသကိးတၢ်န့ၣ်လီၤ. ၦၤပၢၤလီၢ်ဆ့ၣ်နီၤ မ့ၢ်၀ဲသရၣ်ဒိၣ်ဘၤနါဘၤဆၢ, တၢ်ကစီၣ်-သရၣ်ဒိၣ် ဆၣ်အဲၣ်ဆိန့ၣ်လီၤ. သရၣ်ဒိၣ်ဒီးကထၢၣ်မီၣ်မီၣ်(ကီၢ်နဲၣ်ရွဲၣ်) ကတိၤလီၤတၢ်၀ံၤဟ့ၣ်လီၤက့ၤမူဒါဒီး တၢ်မၤဆူ သရၣ်လီၢ်ဒိၣ်ထူ(ကီၢ်နဲၣ်ရွဲၣ်သီ)အစုပူၤ, သရၣ်လီၢ်ဒိၣ်ထူ(သးစၢ်ၦၤနဲၣ်တၢ်)ကတိၤလီၤတၢ်၀ံၤ ဟ့ၣ်လီၤက့ၤမူဒါဒီးတၢ်မၤဆူ သရၣ်အဲဖရဲး(သးစၢ်ၦၤနဲၣ်တၢ်သီ)အစုပူၤ, သရၣ်မုၣ်ကဲဘျုးဖီ(ခ.တၦၤနဲၣ်တၢ်)ဟ့ၣ်လီၤက့ၤမူဒါဒီး တၢ်မၤဆူ သရၣ်မုၣ်ဟဲးပ့ၣ်(ၦၤနဲၣ်တၢ်သီ)အစုပူၤ, သရၣ်ဒိၣ်ဘၤနါဘၤဆၢ(ပိာ်ခွါၦၤနဲၣ်တၢ်)ဟ့ၣ်လီၤက့ၤမူဒါဒီး တၢ်မၤဆူ သရၣ်အီၣ်သဲးထူ(ၦၤနဲၣ်တၢ်သီ)အစုပူၤ ဒီး သရၣ်မုၣ်ဒီးကထၢၣ်လီရၣ်မိ(ဖုစီၤဘူးလံာ်စီဆှံကၠိခိၣ်)ဟ့ၣ်လီၤက့ၤမူဒါဒီး တၢ်မၤဆူ သရၣ်ထူခုၣ်(ကၠိခိၣ်သီ)အစုပူၤန့ၣ်လီၤ. ခိၣ်နၢ်အသီတဖၣ်အဂီၢ် ၦၤလၢဘါထုကဖၣ်တၢ်မ့ၢ်၀ဲဖုသရၣ်ဒိၣ်၀ါဒိၣ်န့ၣ်လီၤ.

ၦၤကညီဘျၢထံခဝ့ၡၢၣ် လံာ်လဲၢ်ဒီးတၢ်ဆဲးတၢ်လၤဝဲၤကျိၤအိၣ်ဒီး ‘‘တၢ်သ့နၢ်ပၢၢ်တၢ်သိၣ်လိကညီစှီၤလံာ်ခီၣ်ထံး အကျိၤအကျဲဒီး တၢ်သ့ဆးလံာ်ဖးဒိၣ်တၢ်မၤလိ’’ ဖဲခဝ့ၡၢၣ်တၢ်သူၣ်ထီၣ်ဃုကထၢႇ တၢ်အိၣ်ဖှိၣ်ဒၢးႇ ၃၉၆ႇဘိၣ်ခၠူးကျဲႇ လါမတီၣ်ႇဝ့ၢ်တကူၣ်န့ၣ်လီၤ. တၢ်သိၣ်လိအံၤစးထီၣ်ဖဲ လါအီကူာ်(၉)သီ တုၤ(၁၂)သီန့ၣ်လီၤ. သရၣ်သိၣ်လိတၢ်တဖၣ် မ့ၢ်ဝဲ-သရၣ်ဒိၣ်ဒီးကထၢၣ်စ့စီႇ သရၣ်မုၣ်ဒီးကထၢၣ်ခုၣ်ၡံႇ သရၣ်မုၣ်စ့ဒံၢ်ဖီ ဒီးသရၣ်ရိၣ်နၢၣ်တဖၣ်န့ၣ်လီၤ.လၢတီအူကီၢ် ကဲၤခၢၣ်ကဲၤဘါႇ ကီၢ်တီအူသၣ်တီၣ်ဘှဲမိၤၦၤႇ ကီၢ်ပသံၣ်မၠီမၠးႇ ကီၢ်မၠီမၠးႇ ကီၢ်တကူၣ်ႇ ကီၢ်ပကိတကူၣ်ႇ ကီၢ်ချၢၣ်လွံၢ်ထူၣ် ဒီး ကီၢ်ပၠံၣ်-သၣ်ယၣ်ဝတံၣ်အခၢၣ်စး ၦၤဟဲထီၣ်တၢ်မၤလိအိၣ်ဝဲ(၁၉)ဂၤန့ၣ်လီၤ.

တၢ်ထံၣ်စိ-   ၦၤကညီဘျၢထံခဝ့ရှၢၣ်အတၢ်ထံၣ်စိ မ့ၢ်ဒ်သိးၦၤကညီဘျၢထံတၢ် အိၣ်ဖှိၣ်တဖၣ်လၢကီၢ်ပံၤယီၤအပူၤကဘၣ်ထွဲတုၤအိၣ်လိ၁်အသး ဒီးမၤသကိး တၢ်သးခုကစီၣ် လၢၦဲၤကိးကပၤဒဲးအဂီၢ်န့ၣ်လီၤ.
မံးရှၢၣ်  -  ၦၤကညီဘျၢထံခဝ့ရှၢၣ် မ့ၢ်ၦၤကညီဘျၢထံအတၢ်အိၣ်ဖှိၣ်တဖၣ် လၢကီၢ် ပံၤယီၤ အပူၤအတၢ်ကရၢကရိထီၣ်အသးဒီး မၤသကိးတၢ်န့ၣ်လီၤ. ၦၤကညီ ဘျၢထံခဝ့ရှၢၣ်ဂဲၤလိ၁်ဟ့ၣ်လီၤအသးလၢ ၦၤကညီဘျၢထံတၢ်အိၣ်ဖှိၣ် တဖၣ်ကအိၣ်ဒီး တၢ်သးတဖျၢၣ်ဃီဒီးမၤသကိးတၢ်လၢ တၢ်သူၣ် လီၤအါထီၣ် တၢ်အိၣ်ဖှိၣ်အဂီၢ်ႇ တၢ်မၤဂုၤထီၣ်ပသီထီၣ်တၢ်အိၣ်ဖှိၣ်ႇ တၢ်အိၣ်ဖှိၣ်ခိၣ်နၢ်  ဒီးတၢ်အိၣ်ဖှိၣ် ဖိတဖၣ်လၢ နီၢ်သးဒီးနီၢ်ခိတုၤဃီၤ ဆူတၢ်အိၣ်ဒီးသူးသ့ၣ် အတီၤခီဖျိ တၢ်ဘူၣ်ထီၣ်ဘါထီၣ်ယွၤႇ တၢ်အိၣ်ဖှိၣ်ရိဖှိၣ်သကိးႇ တၢ်သိၣ်လိ မၤယုၤႇ တၢ်ထုးထီၣ်ရၤလီၤလံ၁်လဲၢ် ဒီးတၢ်မၤသကိးတၢ်ဒီးခရံ၁်ဖိတၢ် အိၣ်ဖှိၣ်တဖၣ်ဒီးတၢ်ကရၢကရိတဖၣ်လၢ ထံလီၢ်ကီၢ် ပူၤဒီးထံဂၤ ကီၢ်ဂၤန့ၣ်လီၤ.

For more information please right click on photo and open image in new tab.