Karen Baptist Convention

ၦၤကညီဘျၢထံခဝ့ၡၢၣ် ပိာ်ခွါၦၤနဲၣ်တၢ်သဃဲၤတဖၣ် ဟံးန့ၢ်သကိးတၢ်ဘါတၢ်ရဲၣ်တၢ်ကျဲၤ ဖဲမုၢ်ဆၣ်ဂီၤတၢ်ဘါ  (၁၅.၉.၂ဝ၂ ၅)အနံၤန့ၣ်လီၤ. ၦၤပၢၤလီၢ်ဆ့ၣ်နီၤ-သရၣ်ဒီးကထၢၣ်န့ၢ်လ့အီၣ်ႇ တၢ်ထုကဖၣ်-သရၣ်ဝါကပီၤစ့ႇ တၢ်ကစီၣ်- သရၣ်န့ၢ်ဘျုးႇ တၢ်သးဝံၣ်ဆဲးတိၤ -သရၣ်ဆၣ်ထူကီၢ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်သးခုကစီၣ်ဒီးမံးၡၢၣ်ဝဲၤကျိၤႇ ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤႇ တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ ခရံာ်ဖိတၢ်မၤဂ့ၤမၤစၢၤဒီးတၢ်ဂုၤထီၣ်ပသီထီၣ်ခိၣ်နၢ်ဝဲၤကျိၤႇ တၢ်ဘၣ်ထဲတွုၤအိၣ်လိာ်သးဝဲၤကျိၤ တဖၣ်ပာ်ဖှိၣ်ထီၣ်သးဒီး လဲၤဘူၣ်သကိးဘါသကိးရ့လိာ်မုာ်လိာ်သကိးဘၣ် သးဒီး ကိတဲစူးတၢ်မၢလီၢ် ဖဲလါစဲးပတ့ဘၢၣ်(၁၄)သီႇ ၂ဝ၂၅အနံၤန့ၣ်လီၤ. အိၣ်ဒီးတၢ်မၤလိလံာ်စီဆှံႇ တၢ်ဘူၣ်သကိးဘါသကိး တၢ်လၢမုၢ်ဆါတၢ်ဘါကတီၢ်စ့ၢ်ကီးန့ၣ်လီၤ.ဝဲၤကျိၤၦၤမၤသကိး တၢ်လဲၤသကိးဝဲ(၁၁)ဂၤန့ၣ်လီၤ.

ၦၤကညီဘျၢထံခဝ့ၡၢၣ် ဝဲၤလီၢ် အိၣ်ဒီးမုၢ်ဆၣ်ဂီၤတၢ်ဘူၣ်သကိးဘါသကိးတၢ် ကိးနွံဒဲးန့ၣ်လီၤ. ဖဲ(၈.၉.၂ဝ၂၅)အနံၤ ၦၤဟံးန့ၢ်တၢ်ဆၢကတီၢ်မ့ၢ်ဝဲ ပိာ်ခွါၦၤနဲၣ်တၢ်တဖၣ်န့ၣ်လီၤ.ၦၤပၢၤလီၢ်ဆ့ၣ်နီၤ-သရၣ်ဒိၣ်ဒီးကထၢၣ်မိစဲးသ့ႇ တၢ်ထုကဖၣ်-သရၣ်ဒီးကထၢၣ်တနၢ်ထူႇ တၢ်ကစီၣ်-သရၣ်ဝ့ဘံၣ်ႇ တၢ်သးဝံၣ်ဆဲတိၢ် -သရၣ်ဒိၣ်စၢ်ဟ့ၣ်ဂ့ၤႇ တၢ်ဆိၣ်ဂ့ၤပျၢ်-သရၣ်ဒိၣ်အဲးဒဝၢးတဖၣ်န့ၣ်လီၤ.

မ့ၢ်လၢယွၤအဘျုးအဃိ ၦၤကညီဘျၢထံခဝ့ၡၢၣ် ဘှီဝံၤဘၣ် တၢ်ပာ်သိလ့ၣ်အလီၢ် ဒီး ပာ်စီဆှံဘၣ်အီၤဖဲ လါစဲးပတ့ဘၢၣ်(၂)သီႇ မုၢ်ဆါ (၁၂)နၣ်ရံၣ် အဆၢကတီၢ်န့ၣ်လီၤ. သရၣ်ဒိၣ်ယွၤဒုးမူ (ခဝ့ၡၢၣ်နဲၣ်ရွဲၣ်) တီခိၣ်ရိၣ်မဲတၢ်ရဲၣ်တၢ်ကျဲၤႇ တၢ်တဲဖျါတၢ်လၢာ်ဘူၣ်လၢာ်စ့လၢ သရၣ်မုၣ်ၡံထၣ်ဖီ(ၦၤပၢၤစ့)ႇ တၢ်ထုကဖၣ်လၢ -သရၣ်မုၣ်ဒိၣ်ဒီးကထၢၣ်လ့ထူ(နဲၣ်ရွဲၣ်သဃဲၤ-တၢ်ပၢတၢ်ဆှၢ)ႇ ဒီးတၢ်ဆိၣ်ဂ့ၤပျၢ်လၢ သရၣ်မုၣ်ဒိၣ်မၠီၠမၠးဖီ(နဲၣ်ရွဲၣ်သဃဲၤ-တၢ်ရ့လိာ်မၤသကိးဒီးတၢ်ဂုၤထီၣ်ပသီထီၣ်)န့ၣ်လီၤ. ဝဲၤကျိၤၦၤနဲၣ်တၢ်ဒီး ၦၤနဲၣ်တၢ်သဃဲၤတနီၤ ဟဲပာ်စီဆှံသကိးန့ၣ်လီၤ.

ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ်အိၣ်ဒီး တလါတဘျီသးစၢ်တၢ်ရ့လိာ်မုာ်လိာ်ဒီး တၢ်မၤလိလံာ်စီဆှံ လၢဆဲးကျိးန့ၢ်တီၤ ဖဲလါယူၤလံ(၁၉)သီ ဟါ(၇)နၣ်ရံၣ်ႇ ၂ဝ၂၅အနံၤန့ၣ်လီၤ. သရၣ်သိၣ်လိတၢ်မ့ၢ်ဝဲ-သရၣ်စၤလမိၣ်(ကၠိခိၣ်စၢၤ- ကီၢ်တကူၣ်လံာ်စီဆှံကၠိ)န့ၣ်လီၤ.တၢ်သိၣ်လိအခိၣ်တီမ့ၢ်ဝဲ- ''သးစၢ်ဒီးတၢ်သ့ၣ်ညါယွၤဒီး ကဲထီၣ်ယွၤအၦၤကညီ'' န့ၣ်လီၤ. သူၣ်စၢ်သးဘီၣ် ဒီး ၦၤဟဲထီၣ်တၢ်သိၣ်လိတဘျီအံၤ နီၣ်ဂံၢ် ခဲလၢာ်အိၣ်ဝဲ (၁ဝဝ)ဘျဲၣ် လၢ (devices) (၆၈)ခါန့ၣ်လီၤ.

ၦၤကညီဘျၢထံခဝ့ၡၢၣ် အိၣ်ဒီးခိၣ်ဃၢၤန့ဆၢၣ်မုၢ်နံၤဖဲ လါယူၤ(၁၃)သီႇ၂ဝ၂၅အနံၤ ဖဲ ခဝ့ၡၢၣ်ဟီၣ်ခိၣ်လီၤတၢ်ထံၣ်စိန့ၣ်လီၤ. အိၣ်ဒီးတၢ်ပာ်ဖှိၣ်ဘူၣ်သကိးဘါသကိးယွၤ အခါ တၢ်ကတိၤဆၢဂ့ၤဆၢဝါလၢ -သရၣ်ဒိၣ်ယွၤဒုးမူ(နဲၣ်ရွဲၣ်)ႇ တၢ်ထုကဖၣ်-သရၣ်မုၣ်ၡံထၣ်ဖီ(ၦၤပၢၤစ့)ႇ တၢ်သးဝံၣ်ပာ်ဖှိၣ်-သရၣ်မုၣ်ဒီးကထၢၣ်မူမုၢ်ဝါ(ယွၤဂ့ၢ်ပီညါဝဲၤကျိၤႇ ၦၤနဲၣ်တၢ်)ႇ တၢ်ဆိၣ်ဂ့ၤပျၢ်-သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤႇ တၢ်ရ့လိာ်မၤသကိးဒီး တၢ်ဂုၤထီၣ်ပသီထီၣ်)န့ၣ်လီၤ. ပိာ်ထဲထွီၣ်အခံလၢ တၢ်တဲနၢ်ပၢၢ်တၢ်ဖံးသကိးမၤသကိး တၢ်သူၣ်တၢ်ဖျးအဂီၢ်လၢ သရၣ်ကၠီၣ်စ့ၣ်န့ၣ်လီၤ. ဝဲၤလီၢ်ၦၤမၤသကိးတၢ်တဖၣ် ပာ်ဖှိၣ်မၤသကိးတၢ်ခီဖျိ ကတီၢ် မၤဂ့ၤထီၣ်တၢ်မုၢ်တၢ်ဘိလၢ ဘၣ်တၢ်သူၣ်လီၤတ့ၢ်တဖၣ်ႇ ဖျးဟီၣ်ခိၣ် မၤကဆှဲကဆှီခၠီၣ်ကရၢသ့ၣ်တဖၣ်န့ၣ်လီၤ. ဝဲၤလီၢ်ၦၤမၤသကိးတၢ် ခဲလၢာ်ပာ်ဖှိၣ်အိၣ်ဝဲ(၆ဝ)ဂၤန့ၣ်လီၤ

မ့ၢ်ကစၢ်ယွၤအဘျုးအဖှိၣ်အဃိ လဲၤတုၤအိၣ်ဟ့ၣ်ဂံၢ်ဟ့ၣ်ဘါ ဆူ ကီၢ်ဆီထံး ဖျံၣ်ထၣ်ဒီးခ့ၣ်ကၠံ သဝီန့ၣ်လီၤ. တၢ်လဲၤတဘျီအံၤၦၤလဲၤသကိး တၢ်တဖၣ်မ့ၢ်ဝဲ (၁)သရၣ်ဒိၣ်စီၤလးဖ့ၣ်(၂)သရၣ်မုၣ် Dr. ကၠဲဘလံ (၃)သရၣ်စီၤယိၤသး (၄)သရၣ်အဲၣ်ဒိၣ်စိ (၅)သရၣ်ဒိၣ်ဟူဆၢ (၆)သရၣ်မုၣ်မၢစံၣ် (၇)သရၣ်ယွဲၢ်တီန့ၣ်လီၤ. ဖဲ ၂၂.၅.၂ဝ၂၅ သီန့ၣ် ထံၣ်လိ၁်သးဒီး ဒူသဝီ(၁၇)သဝီ လၢဟဲသုးအလီၢ်ဆူ ဖျံၣ်ထၣ် ဒီး ၂၃.၅.၂ဝ၂၅ သီန့ၣ် ထံၣ်လိ၁်သးဒီး ဒူသဝီ (၁၃)သဝီ ခၢၣ်စး တဖၣ် ပထံၣ်လိ၁်အိၣ်ဖှိၣ် ဘူၣ်သကိးဘါသကိးယွၤႇ တၢ်သိၣ်လိလံ၁်စီဆှံႇ တၢ်ကတိၤဟ့ၣ်ဂံၢ်ဟ့ၣ်ဘါ ဒီး တၢ်ထုကဖၣ် ဆၢဂ့ၤဆၢဝါ တဖၣ် အိၣ်ဃု၁်ဒီး တၢ်မၤသူၣ်ခုသးခုႇတၢ်ရဲၣ်တၢ်ကျဲၤ ဒီးတၢ်စံးကတိၤ ဒုးနၢ်ဟူဘၣ် တၢ်အိၣ်သးဒီးတၢ်သုးကျဲၤလၢ လီၢ်ကဝီၤ တၢ်ဖံးတၢ်မၤ အဂီၢ်န့ၣ်လီၤ. ခီဖျိတုၤအိၣ်ဘၣ်ထဲလွိ၁်သး ဒ်သိးအံၤအဃိ မ့ၢ် တၢ်ဟ့ၣ်ဂံၢ်ဟ့ၣ်ဘါဒီးတၢ်ဟ့ၣ်ခီဟ့ၣ်နီၤတဖၣ်လၢဒိးနန့ၣ်လီၤ.ၢ်ဘၣ်တၢ်သူၣ်ခုသးခုႇဟ့ၣ်အါထီၣ် သးအတၢ်ဂံၢ်တၢ်ဘါ လၢ တၢ်လဲၤခီဖျိ ကွၢ်ဆၢၣ်မဲ၁် အကတီၢ်န့ၣ်လီၤ.

ၦၤကညီဘျၢထံခဝ့ၡၢၣ်အိၣ်ဒီး ကမံးတံာ်မၤတၢ် တၢ်အိၣ်ဖှိၣ်(၆၅)ဘျီတဘျီ ဖဲလါမ့ၤ(၁၄-၁၆)သီႇ ၂ဝ၂၅နံၣ်လၢ ခဝ့ၡၢၣ်နံၣ် (၁ဝဝ)တၢ်စံးဘျုးတၢ်သူၣ်ထီၣ်ႇ ၁၂၁(ဃ), မ့ယဲကၠီၣ်စွၣ်ကျဲႇ အလူၣ်ႇ ဝ့ၢ်တကူၣ်န့ၣ်လီၤ. တၢ်အိၣ်ဖှိၣ်ကတီၢ်အိၣ်ဒီး တၢ်ဘူၣ်တၢ်ဘါဖဲ ဂီၤ(၇း၃ဝ-၈းဝဝ)နၣ်ရံၣ်ကိးဂီၢ်ဒဲးန့ၣ်လီၤ. တၢ်ဖံးတၢ်မၤကတီၢ် ၦၤပၢၤလီၢ်ဆ့ၣ်နီၤတဖၣ် မ့ၢ်ဝဲ-သရၣ်ဒိၣ်ဒီးကထၢၣ်စဲမစၢၣ်(ကရၢခိၣ်), သရၣ်မုၣ်ဒိၣ်ဒီးကထၢၣ်ဖီဂီၤ (ကရၢခိၣ်စၢၤ), သရၣ်ဒိၣ်ဘံးထၢၣ်မီၣ်မီၣ်(ကရၢခိၣ် စၢၤ) တဖၣ်န့ၣ်လီၤ. ၦၤဟဲထီၣ်တၢ်အိၣ်ဖှိၣ်တဘျီအံၤ မ့ၢ်ဝဲ ကရၢခိၣ်ႇ ကရၢခိၣ်စၢၤတဖၣ်ႇ ၦၤဟ့ၣ်ကူၣ်တၢ်တဖၣ်ႇ ခဝ့ၡၢၣ်နဲၣ်ရွဲၣ်ႇ နဲၣ်ရွဲၣ်သဃဲၤတဖၣ်ႇ ကီၢ်နဲၣ်ရွဲၣ်တဖၣ်ႇ ဝဲၤကျိၤၦၤနဲၣ်တၢ်တဖၣ် ဒီးပၢဆှၢတၢ်ခၢၣ်စးတဖၣ်န့ၣ်လီၤ. ၦၤကညီဘျၢထံခဝ့ၡၢၣ် လံာ်လဲၢ်ဒီးတၢ်ဆဲးတၢ်လၤဝဲၤကျိၤအိၣ်ဒီး မူဖးဖျါ(၆)ဘျီတဘျီ ဖဲလါမ့ၤ(၁၃)သီႇ ၂ဝ၂၅နံၣ် ဂီၤ(၁ဝးဝဝ)နၣ်ရံၣ်တုၤ ဟါ(၃းဝဝ)နၣ်ရံၣ်ဖဲ ခဝ့ၡၢၣ်နံၣ်(၁ဝဝ)တၢ်စံးဘျုးတၢ်သူၣ်ထီၣ်န့ၣ်လီၤ.အိၣ်ဒီးတၢ်ဖးဖျါ ''ကတီၢ်အတၢ်ဆီတလဲ ဒီးကညီကလုာ်အတၢ်ကွၢ်ဆၢၣ်မဲာ်'' လၢသရၣ်ဒိၣ်စိဒီးကထၢၣ်ထိၣ်လွံၢ်ထူန့ၣ်လီၤ. အိၣ်ဒီးတၢ်ကတိၤခီဆၢ တၢ်သံကွၢ်စံးဆၢတဖၣ်န့ၣ်လီၤ. ၦဲၤဟဲထီၣ်တၢ်ရဲၣ်တၢ်ကျဲၤခဲလၢာ်အိၣ်ဝဲ(၅၅)န့ၣ်လီၤ.

နံၤတဝ၁်တၢ်ဒုၣ်တၢ်အီၣ်လၢခဝ့ၡၢၣ်ၦၤမၤတၢ်ဖိ
၂ဝ၂၅နံၣ်ႇ လါမ့ၤ ၁သီ န့ၣ်ၦၤကညီဘျၢထံခဝ့ၡၢၣ်အိၣ်ဒီး နံၤတဝ၁်တၢ်ဒုၣ်တၢ်အီၣ်တၢ်ထု ကဖၣ်လၢ ခဝ့ၡၢၣ်ၦၤမၤတၢ်ဖိသ့ၣ်တဖၣ်အဂီၢ်န့ၣ်လီၤ. လၢတၢ်ရဲၣ်တၢ်ကျဲၤတဘျီအံၤ ပၢၤလီၢ်ဆ့ၣ်နီၤ- သရၣ်မုၣ်ဒီးကထၢၣ်ဂ့ၤဂ့ၤထူႇ ၦၤကွၢ်တၢ်ဆၢကတီၢ်-သရၣ်မုၣ်ဒီးကထၢၣ်မုမုၣ်ဝါႇ ၦၤမၤသကိးတၢ်လၢ ဆၢကတီၢ်တတီၤဘၣ်တတီၤန့ၣ် မ့ၢ်ဝဲၤကျိၤ(၁၄)ကျိၤႇ ၦၤနဲၣ်တၢ်/ၦၤနဲၣ်တၢ်သဃဲၤသ့ၣ်တဖၣ်န့ၣ်လီၤ. ၦၤလၢအဟဲမၤသကိးတၢ်တဖၣ်အိၣ်ဝဲအဂၤ (၆ဝ)ဘျဲၣ်န့ၣ်လီၤ. တၢ်ရဲၣ်တၢ်ကျဲၤအံၤအိၣ်ဒီး တၢ်ထုကဖၣ် ဆၢဂ့ၤဆၢဝါႇ သ့ၣ်နီၣ်ထုကဖၣ်သကိးလၢ ကီၢ်/လံ၁်စီဆှံကၠိသ့ၣ်တဖၣ်အဂီၢ်ႇ တၢ်အိၣ်ဖှိၣ် ဖိလံၤပျဲၢ်ဘီၣ်သ့ၣ်တဖၣ်အဂီၢ်အဃိ ပထံၣ်ဘၣ်လၢအမ့ၢ်တၢ်ရဲၣ်တၢ်ကျဲၤအံၤ ကဲထီၣ်တၢ်ဘျုးတၢ်ဖှိၣ် လၢအအိၣ်ဒီး အထုးအစီလၢပမၤသကိးဘၣ်တၢ်န့ၣ်လီၤ. လၢခံကတၢၢ်န့ၣ်အိၣ်ဒီး တၢ်ပ၁်စီဆှံသး တၢ်ဘါအဃိ ပနၢ်ဟူဘၣ်တၢ်ကစီၣ်အမု၁်လၢ သရၣ်မုၣ်ၡံထၣ်ဖီ(ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤႇ ၦၤနဲၣ်တၢ်)န့ၣ်လီၤ.

ၦၤကညီဘျၢထံခဝ့ၡၢၣ်ႇ တၢ်ဒီတဒၢပၢဆှၢသုးကျဲၤတၢ်တတၢာ်တနါကမံးတံာ်အိၣ်ဒီး တၢ်သုးကျဲၤမၤဂ့ၤမၤစၢၤဆီၣ်ထွဲဆူကီၢ်ဒီး တၢ်အိၣ်ဖှိၣ်လၢ ဘၣ်ကွၢ်ဆၢၣ်မဲာ်ဒီး တၢ်သုးလီၢ်ကျဲတစိၤတလီၢ်ခီဖျိ ထံကီၢ်တၢ်ဒုးတၢ်ယၤတဖၣ်ဒီး ယုၢ်တၢ်မၤဟးဂီၤႇ ထံဒိၣ်နိယွၤတၢ်ဘၣ်ကီဘၣ်ခဲအဂီၢ် ဟ့ၣ်လီၤမၤစၢၤစ့ ခွံကယၤနွံဆံကလီၤလွံၢ်ကလးသၢကထိသၢကယၤတဆံနွံဘး)ဖဲ၂ဝ၂၄နံၣ်အပူၤန့ၣ်လီၤ. ဖဲ၂ဝ၂၅နံၣ်ႇ နံၣ်ခီၣ်ထံးတုၤလါအ့ဖြ့ၣ်(၂၃)သီစ့စရီအိၣ်ဝဲအသိး သုးကျဲၤဆှၢလီၤမၤစၢၤဘၣ်တၢ်မၤဂ့ၤမၤစၢၤဆူ ကီၢ်ဒီးတၢ် အိၣ်ဖှိၣ်လၢစ့ သၢကယၤခံကလီၤလွံၢ်ကလီၤဃိးကလးယဲၢ်ကယၤဘး န့ၣ်လီၤ. ဒ်န့ၣ်အသိး မၤစၢၤဆီၣ်ထဲတွၢ်ကူတၢ်သိးႇ တၢ်အီၣ် တၢ်အီဆူ ကီၢ်လၢဘၣ်ကွၢ်ဆၢၣ်မဲာ်တၢ်တတၢးတနါတဖၣ်စ့ၢ်ကီးန့ၣ်လီၤ. ဝဲၤလီၢ်ခိၣ်နၢ်တနီၤ တုၤအိၣ်ဆူန့ၢ်ပၠံၣ်တီၣ် တၢ်ရ့လိာ်မုာ်လိာ်ကမံးတံာ်ဖဲ လါအ့ဖြ့ၣ်(၁၂-၁၃)သီႇ ၂ဝ၂၅နံၣ်ႇ ဆူဝ့ၢ်မါတလ့ဒီး နစၤရံးတၢ်အိၣ်ဖှိၣ်ဖဲ လါအ့ဖြ့ၣ်(၁၇-၁၈)သီႇ ၂ဝ၂၅နံၣ်န့ၣ်ထံၣ်လိာ် ဒီးတၢ်အိၣ်ဖှိၣ်ဖိဟံၣ်ဒူၣ်တနီၤလၢအိၣ်ဆိးလီၢ်ဟးဂီၤႇ တၢ်ပီးတၢ်လီလီၤမၣ်ႇ ဟ့ၣ်ဖိဃီဖိလီၤမၣ်အဂီၢ် ပာ်ဖျါတၢ်အဲၣ်တၢ်သးအိၣ်ဆီၣ်ထဲမွၤစၢၤတၢ်ပီးတၢ်လီဒီးတၢ်မၤဘူၣ်န့ၣ်လီၤ. ဘူၣ်သကိးဘါသကိးယွၤႇ အိၣ်ဒီးတၢ်ကတိၤဟ့ၣ်ဂံၢ်ဟ့ၣ်ဘါႇ တၢ်ကတိၤဟ့ၣ်ကူၣ်ဟ့ၣ်ဖးလိာ်သးႇ ထုကဖၣ်ဆၢဂ့ၤလိာ်သးန့ၣ်လီၤ. အိၣ်စ့ၢ်ကီးဒီး မုာ်သးမၤကလီကရူၢ်သုးကျဲၤမၤဂ့ၤမၤစၢၤ ဟီၣ်ခိၣ်ဟူးတၢ်ဘၣ်ဒိဘၣ်ထံးအဂီၢ် မၤစၢၤကီၢ်ထးခီတၢ်အိၣ်ဖှီၣ်တနီၤ တၢတဘျီဖဲ လါအ့့ဖြ့ၣ်(၄-၁၂)သီႇ ခံဘျီတဘျီဖဲလါအ့ဖြ့ၣ်(၁၁-၂၅) ၂ဝ၂၅နံၣ်န့ၣ်လီၤ.