Karen Baptist Convention

ယွၤဂ့ၢ်ပီညါဝဲၤကျိၤ အိၣ်ဒီးခီဖရဲး (၂)နံၣ်တဘျီ လၢဘၣ်တၢ်မၤအီၤလၢ လံ၁်စီဆှံကၠိသ့ၣ်တဖၣ်လီၤ. ဘၣ်ဆၣ်မ့ၢ်လၢ ထံကီၢ်တၢ်အိၣ်သးသ့ၣ်တဖၣ်အဃိ ပတမၤဘၣ်ခီဖရဲးလၢ မဲ၁်သကိးမဲ၁်ဘၣ်ဆၣ် ကစၢ်ယွၤအိးဟိထီၣ်စ့ၢ်ကီးတၢ်ဆိၣ်ဂ့ၤအကျဲလၢ ပကမၤဘၣ်အီၤလၢ ဆဲးကျိၤန့ၢ်တီၤန့ၣ်လီၤ. တနံၣ်အံၤ ပမၤဘၣ် ခီဖရဲး (၁၄)ဘျီတဘျီဖဲ လါအီးကထိးဘၢၣ် ၂၃-၂၅သီႇ ၂ဝ၂၄ လၢ ဆဲးကျိၤန့ၢ်တီၤဒီး တၢ်တိ၁်ထူမ့ၢ်ဝဲ -လၢကသူၣ်ထီၣ်တၢ်လီၤပှီၢ် ယွၤခ့ၦၤကျဲးစၢးနီၣ်နီၣ် (ဧ့စြၤ ၇း၁ဝႇ နဃ့မယၤ ၂း၁၇-၁၈ႇ ၁ကရံၣ်သူး ၁၅း၅၈) န့ၣ်လီၤ. ဝဲၤကျိၤကၠိ (၁၆)ဖျၢၣ် ကၠိခိၣ်^ကၠိခိၣ်စၢၤဒီးကၠိသရၣ်^မုၣ်ဒီး ကၠိမၤတံၤမၤသကိး လၢအမ့ၢ် ဖုမ့ၢ်စံၣ်လံ၁်စီဆှံကၠိခိၣ်  ခဲလၢ၁် ပ၁်ဖှိၣ်(၈၆)ဂၤ ထီၣ်သကိးတၢ်ရဲၣ်တၢ်ကျဲၤတဘျီအံၤလီၤ. လၢတၢ်အိးထီၣ်တၢ်ရဲၣ်တၢ်ကျဲၤတၢ်ဘါ ကတီၢ် ကွဲမု၁်စ့ၢ်ကီး ခဝ့ၡၢၣ်ခိၣ်နၢ်အိၣ်မူအိၣ်ဒါသ့ၣ်တဖၣ်လၢ တၢ်ကတိၤဆၢဂ့ၤႇ တၢ်ကစီၣ်ႇ တၢ်ထုကဖၣ်ဒီး တၢ်ဆိၣ်ဂ့ၤပျၢ်တၢ်အဂီၢ်လီၤ. တနံၤဘၣ်တနံၤပအိၣ်ဒီး တၢ်မၤလိသကိးလံ၁်စီဆှံ လၢအဘၣ်ထွဲဒီးတၢ်တိ၁်ထူႇ အိၣ်ဒီး သရၣ်^မုၣ်တဖၣ်အတၢ်ဟ့ၣ်ထီၣ်
တၢ်ဂ့ၢ်သ့ၣ်တဖၣ်ဒီး ပအိၣ်စ့ၢ်ကီးဒီး ကၠိတဖျၢၣ်ဘၣ်တဖျၢၣ်အတၢ်ပ၁်ဖျါသ့ၣ်တဖၣ်န့ၣ်လီၤ. ခီဖရဲးတဘျီအံၤ ၦၤသိၣ်လိလံ၁်စီဆှံတဖၣ်မ့ၢ်ဝဲ သရၣ်ဒိၣ်ဒီးကထၢၣ်ဖျါစိႇ သရၣ်ဒိၣ်ယိၤသးထံဒီး သရၣ်မုၣ်လါဖီ ဒီးၦၤဟ့ၣ်ထီၣ်တၢ်ဂ့ၢ်တဖၣ်မ့ၢ်ဝဲ သရၣ်မုၣ်ဒိၣ်ဒီးကထၢၣ်စ့လွဲၢ်ဝါႇ သရၣ်ဒီးကထၢၣ်စံၣ်သူၣ်ထိႇ ဒီး သရၣ်မုၣ်မူခိၣ်ဖီ
န့ၣ်လီၤ. ခီဖရဲးတဘျီအံၤ ပပျၢ်က့ၤအီၤလၢ တၢ်ပ၁်စီဆှံသးတၢ်ဘါ ဒီးကီၢ်ဟီကတးလံ၁်စီဆှံကၠိမၤသကိးတၢ်လၢတၢ် ဘူၣ်တၢ်ဘါတဘျီအံၤန့ၣ်လီၤ.

ၦၤကညီဘျၢထံခဝ့ၡၢၣ်ႇ တၢ်တတၢာ်တနါကမံးတံာ်ႇ မုာ်သးမၤကလီကမံးတံာ်ဆၣ်ႇ အိၣ်ဒီးတၢ်မၤလိအခီၣ်ထံးတဘျီလၢ အမ့ၢ် ''မုာ်သးမၤကလီတၢ်မၤလိ" ဖဲ(၂၇-၃ဝ.၈.၂ဝ၂၄)အနံၤန့ၣ်လီၤ. တၢ်မၤလိအံၤ ဘၣ်တၢ်မၤအီၤဖဲ ခဝ့ၡၢၣ်နံၣ် တယၤတၢ်စံးဘျုး တၢ်သူၣ်ထီၣ်ယဲၢ်ကထၢႇ ၁၂၁(ဃ)ကညီကရၢၢ်ႇ မ့ယဲကၠီၣ်စွၣ်ကျဲႇ အလူၣ်ႇ ဝ့ၢ်တကူၣ်န့ၣ်လီၤ.အိၣ် ဒီးတၢ်ပညိၣ်လၢအမ့ၢ်-မ့ၢ်ဒ်သိး ၦၤမုာ်သးမၤကလီတဖၣ် ကသ့ၣ်ညါအတၢ်မ့ၢ်တၢ်ႇ ဒီးကဒိးန့ၢ်တၢ်သ့တၢ်ဘၣ်လၢ ကသ့မၤစၢၤဆီၣ်ထွဲသကိးလိာ်သးလၢ ၦၤကညီဘျၢထံခဝ့ၡၢၣ်အပူၤ ဖဲကီၢ်သ့ၣ်တဖၣ်ဘၣ်ကွၢ်ဆၢၣ်မဲာ်တၢ် တတၢာ် တနါတၢ်လိၣ်အကတီၢ်န့ၣ်လီၤ. တၢ်မၤလိတဘျီအံၤ ၦၤသိၣ်လိလံာ်စီဆှံမ့ၢ်ဝဲ သရၣ်ဒိၣ်ဒီးကထၢၣ်ကၠိစဲး(MIT), ၦၤသိၣ်လိ Disaster Management -သရၣ်သဲးပဲၣ်ဖၠိ(Tear Fund), Volunteer Spirit လၢ သရၣ်ဒိၣ်ခၢးဘၢၣ်ဝ့ႇ သရၣ်ရံးခၠဲးႇ Volunteer Ethic & Duty လၢ သရၣ်ဒိၣ်ဒီးကထၢၣ်သီတူၢ်ထူ ဒီး ၦၤကွၢ်ထဲတွၢ်ကွၢ်ကဒါက့ၤမ့ၢ်ဝဲ သရၣ်လဲမယၢၣ်န့ၣ်လီၤ.ၦၤဟဲထီၣ်တၢ်မၤလိလၢ ကီၢ်ဒီး ဝဲၤလီၢ်ဝဲၤကျိၤခၢၣ်စး အိၣ်ဝဲ(၅၂)ဂၤန့ၣ်လီၤ. 
ကမံးတံာ်ဆၣ်အံၤ အိၣ်ဒီးမုာ်သးမၤကလီဘျးစဲတဖု လၢအမ့ၢ် ကီၢ်ခၢၣ်စးဒီး ဝဲၤလီၢ်ဝဲၤကျိၤခၢၣ်စးတဖၣ်ပာ်ဖှိၣ် န့ၣ်လီၤ. ခီဖျိလၢ ဝ့ၢ်တီအူကီၢ်သၢဘ့ၣ်လၢအမ့ၢ် ကီၢ်တီအူပကူႇ ကီၢ်တီအူသၣ်တီၣ်ဘှဲမိၤၦၤႇ တီအူကီၢ်ကဲၤခၢၣ်ကဲၤဘါ သ့ၣ်တဖၣ်ဘၣ်လဲၤခီဖျိန့ဆၢၣ်တၢ်ဘၣ်ဒိဘၣ်ထံးလၢအမ့ၢ် ထံဒိၣ်နိယွၤအဃိ မုာ်သးမၤကလီဘျးစဲတဖုအံၤ လဲၤမၤဂ့ၤ မၤစၢၤဘၣ်တၢ်ဆူကီၢ်တဖၣ်စ့ၢ်ကီးန့ၣ်လီၤ.

ကီၢ်ပကိတကူၣ်အိၣ်ဒီးတၢ်မၤလိ Photoshop, Video Editing ဖဲ ၅-၆.၉.၂ဝ၂၄နံၣ် (၂)သီတၢ်မၤလိန့ၣ်လီၤ. တၢ်မၤလိအံၤဘၣ်တၢ်မၤအီၤဖဲ ကီၢ်ပကိတကူၣ်လံ၁်စီဆှံဒီး ၦၤဟဲထီၣ်တၢ်မၤလိတဖၣ်အိၣ်ဝဲ (၂၂)ဂၤန့ၣ်လီၤ. ၦၤသိၣ်လိတၢ်မ့ၢ်ဝဲ သရၣ်ကၠဲးစၢၣ်ကၠါ(ၦၤကညီဘျၢထံခဝ့ၡၢၣ်) တၢ်ဘၣ်ထွဲတုၤအိၣ်လိ၁်သးဝဲၤကျိၤ? ၦၤနဲၣ်တၢ်သဃဲၤ) န့ၣ်လီၤ.

ၦၤကညီဘျၢထံခဝ့ၡၢၣ်အိၣ်ဒီးတၢ်တုၤအိၣ်ႇလဲၤဟ့ၣ်ဂံၢ်ဟ့ၣ်ဘါဆူ ကီၢ်ဒီးတၢ်အိၣ်ဖှိၣ်လၢ ဘၣ်သုးလီၢ်ကျဲ 
အဂီၢ်  ဖဲ လါအီကူ၁် (၃၁)သီ တုၤ လါစဲးပထ့ဘၢၣ် ၄သီႇ ၂ဝ၂၄ နံၣ်န့ၣ်လီၤ.ပအိၣ်ဒီး တၢ်ပညိၣ်ကွၢ်စိ လၢ 
(၁)တၢ်အိၣ်ဖှိၣ်ဖိလံၤသုးလီၢ်ကျဲတဖၣ်ကအိၣ်လၢၦဲၤအါထီၣ်လၢယွၤအကလုၢ်ကထါအပူၤအဂီၢ်ခီဖျိတၢ်မၤလိသကိးလံာ်စီဆှံ 
(၂)ခီဖျိတၢ်ကတိၤဟ့ၣ်ဂံၢ်ဟ့ၣ်ဘါဒီးတၢ်ဟ့ၣ်ခီဟ့ၣ်နီၤတဖၣ်အဃိကအိၣ်ဒီးသးအတၢ်ဂံၢ်တၢ်ဘါလၢတၢ်လဲၤခီဖျိ ကွၢ်ဆၢၣ်မဲ၁်အဂီၢ်
(၃)တၢ်ရ့လိာ်ဘၣ်ထွဲ(Social Gathering) တၢ်ရဲၣ်တၢ်ကျဲၤအဃိၦၤသုးလီၢ်ကျဲတဖၣ်ကဒိးန့ၢ်ဘၣ် တၢ်ကဟုကယာ်ဒီး သးအတၢ်သူၣ်ခုသးခု အဂီၢ်န့ၣ်လီၤ. တၢ်လဲၤတဘျီအံၤၦၤလၢကလဲၤသကိးတဖၣ် - ခဲလၢာ်   (၆) ဂၤ လၢအမ့ၢ်ဝဲ ခဝၡၢၣ်ခိၣ်နၢ်အိၣ်မူအိၣ်ဒါႇ ကီၢ်နဲၣ်ရွဲၣ်ဘၣ်ထွဲႇ ခဝ့ၡၢၣ်CSSDD ဝဲၤကျိၤၦၤမၤတၢ်ဖိႇ ကီၢ် 
CSSDD ဝဲၤကျိၤ ၦၤနဲၣ်တၢ် ဒီး ဝဲၤကျိၤ ကမံးတံာ်တဖၣ်န့ၣ်လီၤ. လဲၤတုၤအိၣ်ဆူ ကီၢ်ဖၣ်အၣ်မီၣ်လမၠဲၣ် ကီးတရံး    
ၦၤဟဲသုး လီၢ်ကမှံ ဆူ ကြူၢ်တုခံႇ ဘါသကိးယွၤလၢ တၢ်အိၣ်ဖှိၣ် (ကြူၢ်တုခံႇ ကြူၢ်တု) ဖဲ မုၢ်နံၤဒိၣ် တၢ်ဘူၣ်တၢ်ဘါ 
န့ၣ်လီၤ. တုၤအိၣ်ဆူ ကီၢ်ကၠးအ့ၦၤသုးလီၢ်ကျဲ ဖဲ ကွံချၢၣ် ဒီး လ့ဝာ်ဖျိႇ လ့ဘိၣ်ဖျိႇ ဃိာ်သၢဖျၢၣ် တဖၣ် န့ၣ်လီၤ.          
တၢ်ရဲၣ်တၢ်ကျဲၤ လၢပမၤသကိးမ့ၢ် တၢ်မၤလိသကိးလံာ်စီဆှံႇ  တၢ်ကတိၤ ဟ့ၣ်ဂံၢ်ဟ့ၣ်ဘါႇ တၢ်ကတိၤ ဟ့ၣ်ကူၣ်ဟ့ၣ်ဖး လိာ်သးလၢ တၢ်ကွၢ်ဆၢၣ်မဲာ်အပူၤႇတၢ်ထုကဖၣ် လၢ ၦၤသုးလီၢ်ကျဲၤအဂီၢ် Social Gathering Game တဖၣ် 
ဃုာ်ဒီးတၢ်ဟ့ၣ်န့ၣ်လီၤ.

မ့ၢ်လၢကစၢ်ယွၤအဘျုးအဖှိၣ်အဃိ ၦၤကညီဘျၢထံခဝ့ၡၢၣ်နံၣ်ကယၤ(၂၁) သၢပတီၢ်တပတီၢ် အတၢ်ဖံးတၢ်မၤတဖၣ်ဘၣ်တၢ်စးထီၣ်အီၤလၢ တၢ်ဂံၢ်ဆူၣ်ဘါဆူၣ်အပူၤန့ၣ်လီၤ. ပဝဲကရူၢ်ခံအပူၤ ၦၤမၤသကိးတၢ်တဖၣ်မ့ၢ်ဝဲ- တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ သရၣ်သမါဝဲၤကျိၤႇ ယွၤဂ့ၢ်ပီညါဝဲၤကျိၤႇ ထုးထီၣ်ရၤလီၤလံ၁်လဲၢ်ဝဲၤကျိၤဒီး ဝဲၤကျိၤလၢသးစၢ်တၢ်မၤဂီၢ်တဖၣ်န့ၣ်လီၤ.
ပဝဲကရူၢ်ခံအံၤပအိၣ်ဒီးတၢ်ရဲၣ်တၢ်ကျဲၤလၢအမ့ၢ် တၢ်သ့ကွဲးဒုးအိၣ်ထီၣ်တၢ်အိၣ်ဖှိၣ်အတၢ်သိၣ်တၢ်သီ (Church Constitution By Law) ဒီးပစးထီၣ်မၤဘၣ်တၢ်မၤလိ(၃)သီဖဲ လါအီကူာ် ၇-၉ႇ ၂ဝ၂၄အနံၤန့ၣ်လီၤ. တၢ်မၤလိအံၤဘၣ်တၢ်မၤအီၤဖဲ ခဝ့ၡၢၣ်နံၣ်(၁ဝဝ)တၢ်စံးဘျုးတၢ်သူၣ်ထီၣ် ၁၂၁(ဃ)အလူၣ်န့ၣ်လီၤ.ၦၤဟဲထီၣ်တၢ်မၤလိတဖၣ်မ့ၢ်ဝဲကီၢ်အဘ့ၣ်(၂ဝ) အခၢၣ်စးလၢအမ့ၢ်တကီၢ်(၂)ဂၤဒီး ကီၢ်လၢအဟဲထီၣ်တၢ်မၤလိတဘျီအံၤအိၣ်ဝဲ ကီၢ်(၁၈)ဘ့ၣ်ဒီး ၦၤမၤလိတၢ်ဖိအိၣ်ဝဲ (၃၆)ဂၤန့ၣ်လီၤ.
ၦၤလၢအသိၣ်လိတၢ်တဖၣ်မ့ၢ်ဝဲ ဒ်လ၁်အံၤအသိးန့ၣ်လီၤ.
၁. ဘၣ်မနုၤတၢ်အိၣ်ဖှိၣ်တဖၣ်ကကွဲးဒုးအိၣ်ထီၣ်တၢ်အိၣ်ဖှိၣ်အတၢ်သိၣ်တၢ်သီ
(Church Constitution By Law) အံၤအကါဒိၣ်ဝဲန့ၣ်လဲၣ်
ၦၤသိၣ်လိတၢ်-သရၣ်ဒိၣ်အဲၣ်ခဲလၢာ်(ကၠူၣ်တီကညီဘျၢထံတၢ်အိၣ်ဖှိၣ်)
၂. တၢ်ကွဲးသကိးတၢ်အိၣ်ဖှိၣ်အတၢ်သိၣ်တၢ်သီ (Workshop)
ၦၤတီခိၣ်ရိၣ်မဲတၢ်-သရၣ်ဒိၣ်ဆၣ်ဟ့ၣ်ဂ့ၤကဖၣ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်ကူၣ်ဘၣ်ကူၣ်သ့အတၢ်ရဲၣ်တၢ်ကျဲၤ အကျါလံ၁်ညိၣ်သိၣ်ဒိၣ်ကမံးတံ၁်ဒီး ကရူၢ်ဖိတဖၣ်အိၣ်ဒီး တၢ်ထံၣ်လိ၁်အိၣ်ဖှိၣ်သကိးဖဲ လါယူၤ(၆)သီႇ ၂ဝ၂၄နံၣ် (ဂီၤ ၈း၃ ဝတုၤ ဟါ၄းဝဝ)နၣ်ရံၣ် ဖဲ ၦၤကညီဘျၢထံယွၤဂ့ၢ်ပီညါ ဖၠၣ်စိမိၤႇ ဖုခၠံးမီၣ်တၢ်သူၣ်ထီၣ်ႇ တၢ်အိၣ်ဖှိၣ်ဒၢးႇ အ့စ့ၣ်န့ၣ်လီၤ. တၢ်အိးထီၣ်တၢ်ရဲၣ်တၢ်ကျဲၤကတီၢ် ၦၤပၢၤလီၢ်ဆ့ၣ်နီၤမ့ၢ်ဝဲ သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤႇ ကမံးတံ၁်ပၢဆှၢတၢ်ရ့လိ၁်မၤသကိးတၢ်သးခုကစီၣ်)ႇ သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်)ႇ ကတိၤဆၢဂ့ၤဆၢဝါတၢ်ဝံၤ တၢ်ထုကဖၣ်လၢ သရၣ်ဒိၣ်ဒီးကထၢၣ်စ့စီ န့ၣ်လီၤ. အိၣ်ဒီးတၢ်ဒုးသ့ၣ်ညါလိ၁်သးဒီး လဲၤဆူ ကရူၢ်ဖိတဖၣ်အတၢ်ဟ့ၣ်ထီၣ် န့ၣ်လီၤ. ကညီကျိ၁်ႇ Music, တၢ်မၤလိလံ၁်စီဆှံႇIT ဒီး Fine Art အကရူၢ်ခိၣ်တဖၣ် ဟ့ၣ်ထီၣ်တၢ်ဝံၤ ပိ၁်ထွဲထီၣ်အခံလၢ တၢ်သ့ကွၢ် တၢ်ဟ့ၣ်ကူၣ်တဖၣ်လၢ ကရူၢ်ဖိတဖၣ်န့ၣ်လီၤ. ၦၤပၢၤလီၢ်ဆ့ၣ်နီၤ တီခိၣ်ရိၣ်မဲလၢ တၢ်ကတိၤသကိးဒီး ဆူညါတၢ်သုးတၢ်ကျဲၤအဂီၢ်န့ၣ်လီၤ. ကရူၢ်ဖိလၢဟဲထီၣ်တၢ်ရဲၣ်တၢ်ကျဲၤအံၤ ခဲလၢ၁် အိၣ်ဝဲ(၁၇) ဂၤန့ၣ်လီၤ.

                 တနံၣ်တလါအံၤ မ့ၢ်လၢ မူခိၣ်စူၤဒိၣ်ႇ ထံကျိမိၢ်ၦၢ် အထံတဖၣ်ႇ ကစၢၢ်ခိၣ်ကလိကျါ ထံ တဖၣ် ယွၤလီၤ အါမး ဒီး ကီၢ် တနီၤဘၣ်လဲၤခီဖျိ ထံဒိၣ်နိယွၤ ဒီး ဒူသဝီ တနီၤ အိၣ်လၢ အဒူသဝီ ပူၤ အိၣ်ဝဲသ့ႇတနီၤ ဘၣ်သုးအလီၢ် ဆူ တၢ်လီၢ်လၢ အထီႇ တၢ်လီၢ်လၢ တၢ်အိၣ်ကဒု တစိၤတလီၢ် အဂီၢ်န့ၣ်လီၤ.
 ၦၤကညီဘျၢထံခဝ့ရှၢၣ်ခိၣ်နၢ်ႇဝဲၤကျိၤခိၣ်နၢ်တနီၤလဲၤတုၤအိၣ်ကီၢ်ပၠံၣ်သၣ်ယၣ်ဝတံၣ်ႇအၣ်မလီး သဝီဖိ လၢ ဟဲအိၣ်ကဒုလၢ ဝ့ၢ်သၣ်ယၣ်ဝတံၣ်ႇ တၢ်အိၣ်ဖှိၣ်ဘျီၣ်ရိဖှိၣ်တၢ်သူၣ်ထီၣ်(၁၃၈)ဂၤ အအိၣ် ဖဲ ၂ဝ၂၄နံၣ်ႇ လါယူၤလံ (၂၉)သီ န့ၣ်လီၤ. ၦၤဟဲအိၣ်ကဒု အါတက့ၢ် မ့ၢ်ဝဲ မိၢ် ဒီးဖိဆံးတဖၣ် န့ၣ်လီၤ. တနီၤအိၣ်ကဒု လၢ အဲယွၣ်တၢ်အိၣ်ဖှိၣ် အပူၤ (၂၂ဝ)ဂၤ ဒီး ဘၣ်တၢ်အံးထွဲကွၢ်ထွဲႇသုးကျဲၤမၤစၢၤ ခီဖျိ ကီၢ်ဒီးတၢ်အိၣ်ဖှိၣ် / အိၣ်ဒီးတၢ်သုးကျဲၤပ၁်လီၤ န့ၢ် တၢ်အိၣ်တၢ်ဆိးအလီၢ်ႇ ကတဲ၁်ကတီၤန့ၢ် တၢ်အီၣ်တၢ်အီႇ တၢ်ကူတၢ်သိး, တၢ်အိၣ် ဆူၣ်အိၣ်ချန့ၣ်လီၤ. အဂီၢ် န့ၣ်လီၤ. 
ဒ်န့ၢ်အသိးႇၦၤကညီဘျၢထံခဝ့ရှၢၣ်ခိၣ်နၢ်ႇဝဲၤကျိၤခိၣ်နၢ်တနီၤ လဲၤတုၤအိၣ်  ကီၢ်ပသံၣ်မၠီမၠးႇ သၣ်ပိကဝီၤႇ တၢ်အိၣ်ဖှိၣ် လၢဘၣ်ကွၢ်ဆၢၣ်မဲ၁်ဒီးထံဒိၣ်နိယွၤတၢ်ဘၣ်ကီဘၣ်ခဲႇ(၂ရ)ဖှိၣ်ႇတၢ်မၢလီၢ်(၃) တီၤ ဖဲလါအီကူ၁်(၁)သီႇ၂ဝ၂၄ နံၣ် န့ၣ်လီၤ. ၦၤကညီဘျၢထံခဝ့ရှၢၣ်ခိၣ်နၢ်ႇကီၢ်ခိၣ်ကီၢ်နၢ်ႇတၢ်အိၣ်ဖှိၣ်ခိၣ်နၢ် တဖၣ် နီၤဖးလီၤသကိးသး ကရူၢ်(၃)ဖု လၢ တၢ်လဲၤ ဟ့ၣ်ဂံၢ်ဟ့ၣ်ဘါႇတုၤအိၣ် ဒီး ဘါထုကဖၣ်ႇ ဆီၣ်ထွဲမၤစၢၤ တၢ်အဲၣ်တၢ်မၤဘူၣ် တဖၣ် ဒီး ကဲထီၣ်မး တၢ်သးခု လၢ တၢ်အိၣ်ဖှိၣ်အဂီၢ် န့ၣ်လီၤ.
ပစံးဘျုးဘၣ် တၢ်အိၣ်ဖှိၣ်ဖိလံၤႇကီၢ်ဖိကီၢ်လံၤႇခဝ့ရှၢၣ်ဖိလံၤ ကိးဂၤ လၢ ဆီၣ်ထွဲမၤစၢၤ ထံဒိၣ်တၢ်ဘၣ်ကီဘၣ်ခဲ လၢ တၢ်အီၣ်တၢ်အီႇတၢ်ဟ့ၣ်မၤဘူၣ်မၤတီၢ် ဒီး တၢ်ထုကဖၣ် အဃိ န့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ အိၣ်ဒီး "Leadership and Management"  တၢ်မၤလိ လၢ ဝဲၤလီၢ်ခိၣ်နၢ်တဖၣ်အဂီၢ်ဖဲ လ့အ့ၣ်စူးယွၣ်မးတၢ်အိၣ်ဖှိၣ် ဖဲလါယူၤလံ(၂၇)သီႇ ၂ဝ၂၄နံၣ် ဂီၤ(၉းဝဝ)နၣ်ရံၣ်တုၤ ဟါ(၄းဝဝ)နၣ်ရံၣ်န့ၣ်လီၤ. တၢ်အိးထီၣ်တၢ်မၤလိတၢ်ရဲၣ်တၢ်ကျဲၤ ၦၤပၢၤလီၢ်ဆ့ၣ်နီၤ မ့ၢ်ဝဲ- သရၣ်ဒိၣ်ဒီးကထၢၣ်မိစဲးသ့(တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ ၦၤနဲၣ်တၢ်), တၢ်ကတိၤဆၢဂ့ၤဆၢဝါလၢ-သရၣ်ဒိၣ်ယွၤဒုးမူ(နဲၣ်ရွဲၣ်), တၢ်ထုကဖၣ်-သရၣ်ဒိၣ်ပ့ၢ်ချ့(လ့အ့ၣ်စူးယွၣ်မး တၢ်အိၣ်ဖှိၣ်သရၣ်) ဒီး တၢ်ဆိၣ်ဂ့ၤပျၢ်လၢ သရၣ်မုၣ်ဒိၣ်ဒီးကထၢၣ်လ့ထူ(နဲၣ်ရွဲၣ်သဃဲၤႇ တၢ်ပၢတၢ်ဆှၢ) န့ၣ်လီၤ. သရၣ်သိၣ်လိတၢ်တဖၣ်မ့ၢ်ဝဲ-သရၣ်ဒီးကထၢၣ်IVan ယသရၣ်စးန့ၢ်သါတဖၣ်န့ၣ်လီၤ.အိၣ်ဒီးတၢ်မၤလၤကပီၤက့ၤ သရၣ်သိၣ်လိတၢ်တဖၣ်တၢ်ရဲၣ်တၢ်ကျဲၤ ဒီး ၦၤကတိၤဒိၣ်သရၣ်တဖၣ်လၢ -သရၣ်မုၣ်နံထၣ်(တၢ်ကဟုကယာ်ဒီး တၢ်ကူၣ်လိာ်တၢ် ဝဲၤကျိၤၦၤနဲၣ်တၢ်) ဒီး တၢ်ဟ့ၣ်လီၤတၢ်မၤလၤကပီၤတၢ်ဟ့ၣ်လၢ- သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤႇ တၢ်ရ့လိာ်မၤသကိးဒီးတၢ်ဂုၤထီၣ်ပသီထီၣ်)န့ၣ်လီၤ.

ၦၤကညီဘျၢထံခဝ့ၡၢၣ်အိၣ် တၢ်ဒီတဒၢတၢ်တတၢးတနါကမံးတံာ်အိၣ်ဒီး တၢ်လဲၤအိၣ်သကိး ၦၤဘၣ်ကီဘၣ်ခဲလၢ ထံဒိၣ်နိယွၤတဖၣ် ဖဲ ကီၢ်ပၠံၣ်-သၣ်ယၣ်ဝတံၣ်န့ၣ်လီၤ. ၦၤဘၣ်ကီဘၣ်ခဲလၢ ထံဒိၣ်နိယွၤတဖၣ် ပာ်ဖှိၣ်ထီၣ်သကိး အသးဖဲ ကီၢ်ပၠံၣ်-သၣ်ယၣ်ဝတံၣ်ဘျီၣ်ရိဖှိၣ်န့ၣ်လီၤ. အိၣ်ဒီးတၢ်ဒုးသ့ၣ်ညါလိာ်သးလၢ သရၣ်ဒိၣ်ခ့ရ့ၣ်(ကီၢ်ပၠံၣ်-သၣ်ယၣ်ဝတံၣ် နဲၣ်ရွဲၣ်) ဒီးတၢ်ကတိၤဟ့ၣ်ဂံၢ်ဟ့ၣ်ဘါလၢ-သရၣ်ဒိၣ်ယွၤဒုးမူ(ပှၤကညီဘျၢထံခဝ့ၡၢၣ် နဲၣ်ရွဲၣ်) ဒီး တၢ်ဆၢဂ့ၤထုကဖၣ်လၢ -သရၣ်မုၣ်ဒိၣ်မၠီမၠးဖီ(နဲၣ်ရွဲၣ်သဃဲၤႇ တၢ်ရ့လိာ်မၤသကိးဒီးတၢ်ဂုၤထီၣ်ပသီထီၣ်)တဖၣ်န့ၣ်လီၤ. ကီၢ်နဲၣ်ရွၣ်ဒီး ကီၢ်ခိၣ်နၢ်တဖၣ်သုးကျဲၤပၢဆှၢတၢ်လၢ ၦၤဘၣ်ကီဘၣ်ခဲတဖၣ် အဂီၢ်အဂ့ၤကတၢၢ်န့ၣ်လီၤ. ဟံၣ်ဒူၣ်(၅ဝ)ဘျဲၣ် ဟဲအိၣ်ကဒုဘၣ်လၢ ကီၢ်ဝဲၤလီၢ်တၢ်သူၣ်ထီၣ် ဒီးတနီၤ အိၣ်လၢ တၢ်အိၣ်ဖှိၣ်တဖၣ် အတၢ်ဒိစၢၤမၤစၢၤလိာ်အသး လၢတၢ်ကီတၢ်ခဲအဆၢကတီၢ်န့ၣ်လီၤ.လၢတၢ်လဲၤတဘျီအံၤ အိၣ်စ့ၢ်ကီးဒီး တၢ်ရ့လိာ်သကိးသးဒီး ကီၢ်ပၠံၣ်-သၣ်ယၣ်ဝတံၣ် ကီၢ်ခိၣ်နၢ်တဖၣ်စ့ၢ်ကီးန့ၣ်လီၤ.

တၢ်သးခုကစီၣ်ဒီးမံးရှၢၣ်ဝဲၤကျိၤ
တၢ်မၢဖိတၢ်မၤလိ (၃) ဘျီတဘျီ 
မ့ၢ်လၢယွၤအဘျုးအဃိ ပမၤဘၣ်ပဝဲတၢ်မၢဖိတၢ်မၤလိ (၃) ဘျီတဘျီၦဲၤဒီးယွၤအတၢ်ဆိၣ်ဂ့ၤန့ၣ်လီၤ. တၢ်မၤလိ အံၤဘၣ်တၢ်စးထီၣ်ဖဲ ၁၁သီႇ လါယူၤ ၂ဝ၂၄ နံၣ် ဂီၤ ၈းဝ ဝနၣ်ရံၣ်န့ၣ်လီၤ. ၦၤပၢၤလီၢ်ဆ့ၣ်နီၤမ့ၢ် သရၣ်ဒီးကထၢၣ်န့ၢ်လ့အီၣ်ႇ တၢ်ထုကဖၣ်အိးထီၣ်လၢ သရၣ်မုၣ်ရံနၣ်ဖီႇ တၢ်ကတိၤဆၢဂ့ၤလၢ သရၣ်မုၣ်ဒိၣ်ဒီးကထၢၣ် လ့ထူႇ တၢ်စံၣ်တဲၤတဲလီၤခီဖျိလၢ သရၣ်ဒီးကထၢၣ်ဘျုးဖှိၣ် (ကီၢ်ပသံၣ်မၠီမၠးတၢ်သးခုကစီၣ်ၦၤနဲၣ်တၢ်) တၢ်ကတိၤ စံးဘျုးဒီးတၢ်ဘိးဘၣ်သ့ၣ်ညါလၢ ဝဲၤကျိၤၦၤနဲၣ်တၢ်သရၣ်ဒိၣ်အဲးဒဝၢးႇ တၢ်ထုကဖၣ်ကျၢၤတံၢ်လၢ သရၣ်မုၣ်ဖီဒံနၣ် (ကီၢ်ဖၣ်အၣ်မီၣ်လမၠဲၣ်တၢ်သးခုကစီၣ်ၦၤနဲၣ်တၢ်) ဒီးတၢ်ဆိၣ်ဂ့ၤပျၢ်ခီဖျိလၢသရၣ်မုၣ်ဒိၣ်ဒီးကထၢၣ်လ့ထူ (ၦၤကညီဘျၢထံ ခဝ့ရှၢၣ်နဲၣ်ရွဲၣ်သဃဲၤ) န့ၣ်လီၤ. တၢ်မၤလိတၢရဲၣ်တၢ်ကျဲၤဒီး သရၣ်သိၣ်လိတၢ်တဖၣ် မ့ၢ်ဒ်လ၁်အသိး န့ၣ်လီၤ.
(၁) သရၣ်မုၣ်ရံကိၣ်ဖီ  - တၢ်မၤလိလံ၁်စီဆှံ
(၂) သရၣ်ဒီးကထၢၣ်ဃနိ၁် - တၢ်မၤလိလံ၁်စီဆှံ
(၃) သရၣ်ဒိၣ်လးဖ့ၣ်  - CCMP
(၄) သရၣ်ဒိၣ်ဖိထူ  - တၢ်အုၣ်က့ၤခီၣ်က့ၤ
(၅) သရၣ်မုၣ်အဲၣ်ခုၣ်  - တၢ်သးခုကစီၣ်တၢ်မၤဒီး သးစီဆှံအစိကမီၤ
(၆) သရၣ်ဒိၣ်တ့ၣ်စီ  - မုၢ်နံၤခံကတၢၢ်တၢ်ကမၤသးတဖၣ်
( ၇) သရၣ်ဒိၣ်ရိၣ်စါ  - ကစၢ်ခရံ၁်ဒီးတၢ်သးခုကစီၣ်တၢ်မၤ
(၈) သရၣ်ဒိၣ်ဒီးကထၢၣ်အီနၢၣ်ညိၣ် - တၢ်သးခုကစီၣ်ကျဲကူၣ်နၢၤ
(၉) သရၣ်ဒိၣ်ဒီးကထၢၣ်ကျၢၤတီ - တၢ်ကဲခိၣ်ကဲနၢ်လၢတၢ်သးခုကစီၣ်တၢ်မၤ
(၁ဝ) သရၣ်မုၣ်ဒီးကထၢၣ်တ့ၣ်စံၣ်မိ - နံၣ်ကယၤ (၂၁) အတၢ်တၤဒီးတၢ်မၤတၢ်သးခုကစီၣ်တၢ်မၤ
ပကလၢၢ်ဘၣ်တၢ်မၤလိအံၤ ကဲထီၣ်မးတၢ်ဆိၣ်ဂ့ၤဒီး တၢ်ဘျုးတၢ်ဖှိၣ်ဒိၣ်မးလၢ ၦၤလၢအဟဲထီၣ်မၤလိ တဖၣ်အဂီၢ်န့ၣ်လီၤ. ကီၢ် (၁၅) ဘ့ၣ်အခၢၣ်စးၦၤဟဲထီၣ် တၢ်မၤလိပ၁်ဖှိၣ်ခဲလၢ၁် (၄၅) ဂၤန့ၣ်လီၤ. ပစံးဘျုး ဘၣ်သရၣ်သမါတဖၣ် လၢအဟဲသိၣ်လိန့ၢ်ၦၤတၢ်လၢ တၢ်မၤလိတဘျီအံၤ ဃု၁်ဒီးကီၢ်ခၢၣ်စးတဖၣ်န့ၣ်လီၤ.
တၢ်မၤလိအံၤဘၣ်တၢ်ပျၢ်က့ၤအီၤဖဲ ၂၁.၆.၂ဝ၂၄ ဖဲတၢ်မၤလိဝံၤန့ၣ်လီၤ. ၦၤပၢၤလီၢ်ဆ့ၣ်နီၤမ့ၢ် သရၣ်မုၣ်ခၠိၣ်သဲႇ သရၣ်မုၣ်မံကၣ်အိးထီၣ်တၢ်ဘါႇ သရၣ်မုၣ်၇ှံထၣ်ဖီ (ၦၤကညီဘျၢထံခဝ့ရှၢၣ်ၦၤပၢၤစ့) စံၣ်တဲၤတဲလီၤ ဟ့ၣ်ဂံၢ်ဟ့ၢ်ဘါဆူ တၢ်မၢဖိတဖၣ်ဝံၤ ၦၤလၢအဃ့ဘါထုကတဖၣ်ဒီးဆိၣ်ဂ့ၤပျၢ်က့ၤတၢ်မ့ၢ်သရၣ်ဒိၣ်ဆၣ်မုၢ်နၤ (ကီၢ်ဒဝဲၢ်ဘျံးတၢ်သးခုကစီၣ် ၦၤနဲၣ်တၢ်) န့ၣ်လီၤ.