Karen Baptist Convention

ၦၤကညီဘျၢထံခဝဲၡၢၣ် တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ အိၣ်ဒီး တၢ်မၤလိတၢ်ရဲၣ်တၢ်ကျဲၤ လၢ ခဝ့ၡၢၣ်ၦၤမၤသကိးတၢ်ဖိအဂီၢ် လၢအမ့ၢ် ''Effective Leadership During the Crisis"  (၁) သီတၢ်မၤလိန့ၣ်လီၤ. တချုးပစးထီၣ်တၢ်မၤလိဘၣ်ဒီး ပအိၣ်ဒီးတၢ်ဘူၣ်တၢ်ဘါတၢ်ရဲၣ်တၢ်ကျဲၤန့ၣ်လီၤ. တၢ်ဘူၣ်တၢ်ဘါအဆၢကတီၢ် ၦၤပၢၤလီၢ်ဆ့ၣ်နီၤ မ့ၢ်ဝဲ သရၣ်မုၣ်မူယဲၢ်ဖီ( ၦၤနဲၣ်တၢ်)တၢ်ဟ့ၣ်ဂံၢ်ဘါခီဖျိ  သရၣ်မုၣ်ဒိၣ်ဒီးကထၢၣ်လ့ထူ(ခဝ့ၡၢၣ်နဲၣ်ရွဲၣ်သဃဲၤ) ဒီး တၢ်ထုကဖၣ်လၢ နီၢ်လ့လ့မၠ့းန့ၣ်လီၤ. တၢ်မၤလိအံၤ ဘၣ်တၢ်သိၣ်လိၦၤလၢ သရၣ်မုၣ်ဒိၣ်မၠီမၠးဖီ (ခဝ့ၡၢၣ်နဲၣ်ရွဲၣ်သဃဲၤ)   န့ၣ်လီၤ. တၢ်မၤလိအဆၢကတီၢ်မ့ၢ်ဝဲ ဂီၤ (၉း၃ဝ) တုၤ ဟါ (၃း၃ဝ)နၣ်ရံၣ် ဒီးဘၣ်တၢ်မၤအီၤဖဲ လါယူၤ ၂၄သီႇ ၂ဝ၂၆ အနံၤႇ လၢ (၃၉၆) တၢ်အိၣ်ဖှိၣ်ဒၢးန့ၣ်လီၤ. ၦၤကတိၤစံးဘျုး သရၣ်သိၣ်လိတၢ်မ့ၢ်ဝဲ သရၣ်မုၣ်စ့ဘှ့ၤဖီ ဒီး တၢ်ထုကဖၣ်ဆၢဂ့ၤလၢ သရၣ်မုၣ်တၢ်ဟ့ၣ်ဝါ န့ၣ်လီၤ. ၦၤဟဲထီၣ်တၢ်မၤလိခဲလၢ၁် အိၣ်ဝဲ (၂၆) ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ ဒီး ကီၢ်ချၢၣ်လွံၢ်ထူၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤ ပာ်ဖှိၣ်မၤသကိး  ''တၢ်အိၣ်ဖှိၣ်သရၣ်ဒီး တၢ်အိၣ်ဖှိၣ်ခိၣ်နၢ်'' တၢ်မၤလိ ဖဲ ကီၢ်ချၢၣ်လွံၢ်ထူၣ်ႇ ပဟံၣ်လူၢ်တၢ်အိၣ်ဖှိၣ်ႇ ဖဲ လါယူၤ(၁၆-၁၈)သီႇ ၂ဝ၂၆အနံၣ်န့ၣ်လီၤ.ဖဲ လါယူၤ(၁၆)သီႇ ဂီၤ(၈)နၣ်ရံၣ် အိၣ်ဒီးတၢ်အိးထီၣ်တၢ်မၤလိ ခီဖျိတၢ်ဘူၣ်သကိးဘါသကိးတၢ်န့ၣ်လီၤ. သရၣ်ဒိၣ်ဒီးကထၢၣ်မိစဲးသ့ ဟ့ၣ်တၢ်သိၣ်လိဘၣ်ထွဲ ''တၢ်အိၣ်ဖှိၣ်သရၣ်မူဒါဒီး ခိၣ်နၢ်မူဒါ''
သရၣ်မုၣ်ဒိၣ်ဒီးကထၢၣ်လ့ထူ  ''သူၣ်ဂ့ၢ်သးကျိၤအတၢ်ကဲခိၣ်ကဲနၢ်ဒီး တၢ်မၤယွၤအတၢ်မၤ'' ဒီး သရၣ်ဒိၣ်စၢ်ဟ့ၣ်ဂ့ၤ ''တၢ်အိၣ်ဖှိၣ်အမူးအရၤ''တဖၣ်န့ၣ်လီၤ.ပျၢ်က့ၤတၢ်မၤလိတဘျီအံၤဖဲ လါယူၤ(၁၈)သီႇ ဟါ(၄)နၣ်ရံၣ်န့ၣ်လီၤ. ၦၤဟဲထီၣ်တၢ်မၤလိခဲလၢာ်အိၣ်ဝဲ(၇၆)ဂၤန့ၣ်လီၤ.

ၦၤကညီဘျၢထံခဝ့ၡၢၣ် ပိာ်ခွါဝဲၤကျိၤအိၣ်ဒီး(၃)လါတဘျီ တၢ်ရ့လိာ်မုာ်လိာ်တၢ်ရဲၣ် တၢ်ကျဲၤ ဒီးဖဲလါယူၤ(၂ဝ)သီႇ ၂ဝ၂၆အနံၤ ဟါ(၇)နၣ်ရံၣ်အိၣ်စ့ၢ်ကီးဒီး တၢ်ကတိၤလီၤ ဆီဘၣ်ထွဲ ''တၢ်စူၢ်ကမၣ်နာ်ကမၣ် ဒီး တၢ်မူထွဲမၤထွဲ'' လၢဆဲးကျိးန့ၢ်တီၤန့ၣ်လီၤ. သရၣ်ဟ့ၣ်ခီဟ့ၣ်နီၤတၢ်မ့ၢ်ဝဲ-သရၣ်ဒိၣ်ဒီးကထၢၣ်သါစီၣ်မိ(PKTS ကၠိခိၣ်စၢၤ)န့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤခဲလၢာ် (devices) ၃၁ ခါန့ၣ်လီၤ.

ၦၤကညီဘျၢထံခဝ့ၡၢၣ်သုးကျဲၤမၤဝဲ ခိၣ်ဃၢၤန့ဆၢၣ်အမုၢ်နံၤ ဖဲ(၁၂.၆.၂ဝ၂၆)လၢ တၢ်ထံၣ်စိ ဟီၣ်ခိၣ်လီၢ်ႇ ဝနဲးခၠီန့ၣ်လီၤ.စးထီၣ်တၢ်ရဲၣ်တၢ်ကျဲၤလၢ တၢ်ဘူၣ်သကိးဘါသကိးယွၤ ဖဲ(၈)နၣ်ရံၣ်အဆၢကတီၢ်န့ၣ်လီၤ.ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်မုၣ်ဒီးကထၢၣ်ကၠဲပလံ(ၦၤနဲၣ်တၢ်ႇ ခရံာ်ဖိတၢ်မၤဂ့ၤမၤစၢၤဒီးတၢ်ဂုၤထီၣ်ပသီထီၣ်), တၢ်ကတိၤဆၢဂ့ၤဒီးတၢ်တဲဖျါထီၣ် ခိၣ်ဃၢၤန့ဆၢၣ်အမုၢ်နံၤ တၢ်ပညိၣ်လၢ -သရၣ်မုၣ်ဒိၣ်မၠီမၠးဖီ(ခဝ့ၡၢၣ်နဲၣ်ရွဲၣ်သဃဲၤႇ တၢ်ရ့လိာ်မၤသကိးဒီးတၢ်ဂုၤထီၣ်ပသီထီၣ်), တၢ်ထုကဖၣ်လၢ-သရၣ်မုၣ်ဒိၣ်ဒီးကထၢၣ်လ့ထူ(ခဝ့ၡၢၣ်နဲၣ်ရွဲၣ်သဃဲၤႇ တၢ်ပၢတၢ်ဆှၢ), တၢ်ရူးထါလၢ သရၣ်မုၣ်ဆၢန့ၢ်ဂ့ၤႇ တၢ်ဆိၣ်ဂ့ၤပျၢ်လၢ သရၣ်ဒိၣ်ယွၤဒုးမူ (ခဝ့ၡၢၣ်နဲၣ်ရွဲၣ်)န့ၣ်လီၤ.ဝံၤဒီးအိၣ်ဒီး တၢ်သူၣ်လီၤသကိး သ့ၣ်မုၢ်သ့ၣ်ဘိ ဒီး တၢ်သူၣ်တၢ်သၣ်အမုၢ်တဖၣ်န့ၣ်လီၤ. နီၣ်ဖးလီၤကရူၢ်(၃)ကရူၢ်လၢ တၢ်မၤသကိးတၢ်အဂီၢ်န့ၣ်လီၤ.ၦၤဟဲတၢ်ရဲၣ်တၢ်ကျဲၤခဲလၢာ်(၇၂)ဂၤန့ၣ်လီၤ.

ကီၢ်ဘျံးၦၤကညီဘျၢထံခရံာ်ဖိလံာ်စီဆှံကၠိအိးထီၣ်ကၠိလၢ (၂ဝ၂၆-၂ဝ၂၇)တၢ်မၤလိနံၣ်အဂီၢ်ဖဲ လါယူၤ(၇)သီန့ၣ်လီၤ. ကီၢ် ဘျံးလံာ်စီဆှံကၠိခိၣ်မ့ၢ်ဝဲ သရၣ်မုၣ်ဒီးကထၢၣ်ယူကံၣ်ဒီး ကၠိသရၣ်/မုၣ်ဒီးၦၤမၤသကိးတၢ်ခဲလၢာ်အိၣ်ဝဲ(၉)ဂၤန့ၣ်လီၤ.ကၠိအိး ထီၣ်တၢ်ရဲၣ်တၢ်ကျဲၤတဘျီအံၤအိၣ်ဃုာ်ဒီး တၢ်ဟ့ၣ်လီၤလံာ်အုၣ်သးဆူ ၦၤမၤလိလံာ်စီဆှံခီဖျိတၢ်ကွဲးတၢ်ဖၣ် တၢ်ရဲၣ်တၢ်ကျဲၤ စ့ၢ်ကီးန့ၣ်လီၤ. ကၠိအိးထီၣ်တၢ်ရဲၣ်တၢ်ကျဲၤတၢ်ဘူၣ်တၢ်ဘါမ့ၢ်ဝဲ ဂီၤ ၁ဝးဝဝနၣ်ရံၣ် ဒီးၦၤဟ့ၣ်တၢ်စီၣ်မ့ၢ် သရၣ်မုၣ် ဒီးကထၢၣ် မူမုၢ်ဝါ(ၦၤကညီဘျၢထံခဝၡၢၣ်ယွၤဂ့ၢ်ပီညါဝဲၤကျိၤ)န့ၣ်လီၤ. တနံၣ်အံၤကၠိဖိတၢတနံၣ်အိၣ်ဝဲ (၃၅)ဂၤဒီး ကၠိဖိခံနံၣ်တနံၣ် အိၣ် ဝဲ (၆၉)ဂၤန့ၣ်လီၤ. လၢတၢ်ရဲၣ်တၢ်ကျဲၤတဘျီအံၤပထံၣ်ဘၣ် ကီၢ်ခိၣ်ကီၢ်နၢ်တဖၣ်ႇ ကီၢ်ဝဲၤကျိၤခိၣ်နၢ်တဖၣ်ႇ ကီၢ်ကမံးတံာ်မၤ တၢ်တဖၣ်ႇ ကၠိထြၢးစတံကမံးတံ၁်တဖၣ်ႇ ကီၢ်ဘီဒၢၣ်ကၠိဖိတဖၣ်ႇ ဒီးကီၢ်ဘျံးဝ့ၢ်မုၢ်တၢ်အိၣ်ဖှိၣ်ဖိတဖၣ်ဟဲ ဘူၣ်သကိးဘါ သကိး ယွၤန့ၣ်လီၤ. ကၠိတဖျၢၣ်အံၤအတၢ်လဲၤတရံးအသးအိၣ်ဒံးဒၣ်ထဲတနံၣ်ႇ ဒီးခဲအံၤနုာ်လီၤလၢခံနံၣ်တနံၣ် န့ၣ်လီၤ. ပထံၣ်ဘၣ် လၢ ၦၤသးအိၣ်ဟဲမၤလိတၢ်တဖၣ်အိၣ်အါမးအဃိမ့ၢ်တၢ်သးခုဖးဒိၣ်လီၤ. မ့ၢ်ဒၣ်ကၠိလၢအစးထီၣ်အသး သီသံၣ်ဘှဲအဃိ တၢ် လိၣ်ဘၣ်လၢ တၢ်သူၣ်ထီၣ်ဘှီထီၣ်မ့ၢ်ဂ့ၤႇ လံာ်လဲၢ်လၢလံာ်ဖှိၣ်ဒၢးအဂီၢ်မ့ၢ်ဂ့ၤႇ တၢ်ပိးတၢ်လီတၢ်တဖၣ်န့ၣ်လီၤ. ကွဲမုာ်ဘၣ် ကီၢ် ဖိကီၢ်လံၤႇ ၦၤသူၣ်အိၣ်သးအိၣ်တၢ်တဖၣ်လၢ ကဆီၣ်ထွဲသကိးလၢကၠိတဖျၢၣ်အံၤ အတၢ်လဲၤတရံးသးဆူညါအဂီၢ်လီၤ. ကီၢ် ဘျံးၦၤကညီဘျၢထံခရံာ်ဖိလံာ်စီဆှံကၠိမ့ၢ်ကီၢ်အတၢ်န့ၢ်သါအဃံအလၤအဃိ ပဝဲကိးဂၤပကဆီၣ်ထွဲ သကိးကၠိအံၤလၢ တၢ်ထု ကဖၣ်ဒီးတၢ်ဟ့ၣ်မၤဘူၣ်မၤတီၢ်န့ၣ်တက့ၢ်.

ၦၤကညီဘျၢထံခဝ့ၡၢၣ် တၢ်သးခုကစီၣ်ဒီးမံးၡၢၣ်ဝဲၤကျိၤ သုးကျဲမၤဘၣ်တၢ်အိၣ်ဖှိၣ်ဆီၣ်ထွဲတၢ်မၢလီၢ်တဖၣ်တၢ်ထံၣ်လိာ်သး သၢသီတၢ်မၤလိ ဖဲဖြဲးဘျီၣ်ရိဖှိၣ်ႇ ကီၢ်တကူၣ်ဝဲၤ လီၢ်န့ၣ်လီၤ. တၢ်အိးထီၣ်တၢ်မၤလိတၢ်ရဲၣ်တၢ်ကျဲၤဖဲ ၉.၆.၂ဝ၂၆ နံၣ် ဟါ ၆းဝဝနၣ်ရံၣ်လီၤ. တၢ်ရဲၣ်တၢ်ကျဲၤအပူၤ  သရၣ်မုၣ်ၡံထၣ်ဖီ (ၦၤကညီဘျၢထံ ခဝ့ၡၢၣ်ၣ်ၦၤပၢၤစ့) ဟ့ၣ်ဂံၢ် ဟ့ၣ်ဘါၦၤလၢ တၢ်ကစီၣ်ဒီး သရၣ်မုၣ်ဒီးကထၢၣ်ဂ့ၤဂ့ၤထူ (တၢ်ဘၣ်ထွဲတုၤအိၣ်လိ၁်သးဝဲၤကျိၤၦၤနဲၣ်တၢ်) လၢတၢ်ထုကဖၣ်အလၢအၦဲၤ ဒီးသရၣ်ဒိၣ်အဲၣ်ဒ့ (ကီၢ်တကူၣ်တၢ်သးခုကစီၣ် ဝဲၤကျိၤၦၤနဲၣ်တၢ်) ဆိၣ်ဂ့ၤပျၢ်တၢ်န့ၣ်လီၤ. 
တၢ်ရဲၣ်တၢ်ကျဲၤ တဘျီအံၤ ဘၣ်တၢ်စးထီၣ်မၤအီၤဖဲ ၁ဝ.၆.၂ဝ၂၆ တုၤ ၁၂.၆.၂ဝ၂၆ နံၣ်န့ၣ်လီၤ.
ၦၤသိၣ်လိတၢ်သ့ၣ်တဖၣ်မ့ၢ်ဝဲ - သရၣ်ဒိၣ်ဒီးကထၢၣ်ခွါဂ့ၤ (တၢ်မၤလိလံာ်စီဆှံ)ႇ သရၣ်ဒိၣ်ဖိထူ (တၢ်အိၣ်ဖှိၣ်ဒီးတၢ်သးခုကစီၣ်တၢ်မၤ), သရၣ်ဒိၣ်အဲၣ်လီၤလး (တၢ်အိၣ်ဖှိၣ် သူၣ်ဂ့ၢ်သးကျိၤဒီးတၢ်သးခုကစီၣ်တၢ်မၤ) ဟဲဒီးမၤသကိးတၢ်ဃု၁်ဒီးၦၤမၤသကိးတၢ် ၉ ဂၤႇ သရၣ်ဒိၣ်ဒီးကထၢၣ်ဘျုးဖှိၣ် (တၢ်မၢလီၢ်ဒီးအတၢ်တၤ) သ့ၣ်တဖၣ်န့ၣ်လီၤ. 
တၢ်မၤလိအံၤ ဘၣ်တၢ်ပျၢ်က့ၤအီၤဖဲ  ၁၂.၆.၂ဝ၂၆ နံၣ် ဟါ ၄းဝ ဝနၣ်ရံၣ်န့ၣ်လီၤ. ၦၤဟ့ၣ်တၢ်ကစီၣ်မ့ၢ်ဝဲ သရၣ်ဒိၣ်စၢ်ဟ့ၣ်ဂ့ၤ (ခဝ့ၡၢၣ်သရၣ်သမါဝဲၤကျိၤၦၤနဲၣ်တၢ်),  သရၣ်မုၣ်ဒီးကထၢၣ်မူမုၢ်ဝါ (ခဝ့ၡၢၣ်ယွၤဂ့ၢ်ပီညါဝဲၤကျိၤၦၤနဲၣ်တၢ်) ဘါတၢ်ထုကဖၣ် တၢ်လၢလၢၦဲၤပှဲဲၤဒီးတၢ်ဆိၣ်ဂ့ၤပျၢ်လၢ သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်ခိၣ်ကျၢၤ) န့ၣ်လီၤ. 
တၢ်ရဲၣ်တၢ်ကျဲၤတဘျီအံၤ ခၢၣ်စးလၢအဟဲထီၣ် နီၣ်ဂံၢ်အိၣ်ဝဲ (၅၅) ဂၤ လၢကီၢ် (၁ဝ) ဘ့ၣ်ခၢၣ်စးတဖၣ်န့ၣ်လီၤ.

ၦၤကညီဘျၢထံခဝ့ၡၢၣ် တၢ်ကဟုကယာ်ဒီးတၢ်ကူၣ်လိာ်တၢ်ဝဲၤကျိၤ တီခိၣ်ရိၣ်မဲသုးကျဲၤန့ၣ် ခဝ့ၡၢၣ် ဝဲၤလီၢ်ၦၤမၤတၢ်ဖိတဖၣ်အဂီၢ် Medical Checkup ဖဲ ၃.၆.၂ဝ၂၆ အနံၤဖဲ နံၣ်(၁ဝဝ)တၢ်စံးဘျုးတၢ်သူၣ်ထီၣ် တၢ်အိၣ်ဖှိၣ်ဒၢးႇ ၁၂၁ဃႇ အလူၣ် န့ၣ်လီၤ.KBC တၢ်ဆါဟံၣ် သရၣ်သရၣ်မုၣ် ၦၤဘၣ်မူဘၣ်ဒါတဖၣ်လၢတၢ်အဲၣ်တၢ်သးအိၣ်ပူၤ အံးကွၢ်န့ၢ်ဝဲၤလီၢ်ဝဲၤကျိၤ ၦၤမၤတၢ်ဖိ တဖၣ် အတၢ်အိၣ်ဆူၣ်အိၣ်ချ့န့ၣ်လီၤ.

ၦၤကညီဘျၢထံခဝ့ၡၢၣ် ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤ သုးကျဲၤMicrosoft Excel တၢ်မၤလိ လၢ ဝဲၤလီၢ်ၦၤမၤတၢ်ဖိတဖၣ်အဂီၢ် စးထီၣ်ဖဲ ၅.၆.၂ဝ၂၆ ဟါ(၁-၄)နၣ်ရံၣ်န့ၣ်လီၤ.တၢ်မၤလိအံၤ သရၣ်မုၣ်သိၣ်လိတၢ်တဖၣ်မ့ၢ်ဝဲ-သရၣ်မုၣ်ၡံထၣ်ဖီ(ၦၤနဲၣ်တၢ်ႇ ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤ) ဒီး သရၣ်မုၣ်နံၤလၣ်ခၠံး(ၦၤနဲၣ်တၢ်သဃဲၤႇ ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤ)န့ၣ်လီၤ.တၢ်မၤလိအံၤမ့ၢ် တလါတၢ်မၤလိန့ၣ်လီၤ. ၦၤဟဲထီၣ်တၢ်မၤလိခဲလၢာ်အိၣ်ဝဲ(၂၂)ဂၤ လၢဝဲၤလီၢ်ဝဲၤကျိၤတဖၣ်န့ၣ်လီၤ.

ကီၢ်ပသံၣ်မၠီမၠးတၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤႇ ၦၤကညီဘျၢထံခဝ့ၡၢၣ် ဝဲၤကျိၤလၢသးစၢ်တၢ်မၤဂီၢ် ဒီးၦၤကညီဘျၢထံခဝ့ၡၢၣ်တၢ်ဘၣ်ထဲတွုၤအိၣ်လိာ်သးဝဲၤကျိၤအိၣ်ဒီး တၢ်ပာ်ဖှိၣ်မၤသကိးတၢ်ခီဖျိ တၢ်ထံၣ်လိာ်သး တၢ်ဟ့ၣ်ခီဟ့ၣ်နီၤ တၢ်ဟ့ၣ်ဂံၢ်ဟ့ၣ်ဘါ သူၣ်ဘီၣ် သးစၢ်ဖိဒံဖိသၣ်တဖၣ်တၢ်ရဲၣ်တၢ်ကျဲၤန့ၣ်လီၤ.ၦၤဟ့ၣ်ခီဟ့ၣ်နီၤတၢ်မ့ၢ်ဝဲ- ၦၤသးဝံၣ်တၢ်စဲးနီၤ စီၤရ့ှ ဒီးဘၣ်တၢ်မၤအီၤဖဲလါယူၤ(၃)သီဟါ(၇)နၣ်ရံၣ်ႇ ၂ဝ၂၆အနံၤလၢ ဆဲးကျိးန့ၢ်တီၤန့ၣ်လီၤ. တၢ်ရဲၣ်တၢ်ကျဲၤတဘျီအံၤ ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်မုၣ်ဒီးကထၢၣ်ဂ့ၤဂ့ၤထူႇ တၢ်ကတိၤဆၢဂ့ၤလၢ -သရၣ်မုၣ်သးဝါႇ အိးထီၣ်တၢ်ထုကဖၣ်လၢ-သရၣ်တီလိၤမူႇ တၢ်ထုကဖၣ်လၢခံကတၢၢ်လၢ -သရၣ်မုၣ်အိၣ်ဒံလၢ်ႇ တၢ်ဆိၣ်ဂ့ၤပျၢ်လၢ-သရၣ်ဒိၣ်မူလၢၢ်ဂ့ၤ(ကီၢ်ပသံၣ်မၠီမၠးနဲၣ်ရွဲၣ်)န့ၣ်လီၤ.ဖိသၣ်ဒီး သးစၢ်တဖၣ်ဟဲနုာ်လီၤဒိကနၣ် သံကွၢ်သံဒိတၢ်လၢတၢ်သးစဲအပူၤန့ၣ်လီၤ. ၦၤဟဲထီၣ် ခဲလၢာ်အိၣ်ဝဲ devices ၈၁ ခါန့ၣ်လီၤ.

ကီၢ်တီအူသၣ်တီၣ်ဘှဲမိၤၦၤ တၢ်အိၣ်ဖှိၣ်သကိးတၢ်အိၣ်ဖှိၣ် အိၣ်ဒီး(၂ဝ၂၅-၂ဝ၂၆)နံၣ် နံၣ်ကတၢၢ်ပၢဆှၢတၢ်ကမံးတံာ်တၢ်အိၣ်ဖှိၣ် ဖဲလါမၢ်ၡး (၂၃ တုၤ၂၅)သီႇ လၢကဲဒိၣ်လူၢ်ကညီဘျၢထံခရံာ်တၢ်အိၣ်ဖှိၣ်ႇ ကရူၢ်(၇)အတၢ်တူၢ်လိာ်မၤသကိးတၢ်န့ၣ်လီၤ.အိၣ်ဒီး တၢ်တိာ်ထူမ့ၢ်ဝဲ- ''ယိာ်ထီၣ်လၢတၢ်နာ် ဆူၣ်ထီၣ်လၢတၢ်မၤ'' န့ၣ်လီၤ. ဒီတနံၣ်ကီၢ်တၢ်သးခုကစီၣ်အတၢ်ဖံးတၢ်မၤတဖၣ်ႇ ဝဲၤကျိၤႇ ကရၢအတၢ်ဖံးတၢ်မၤတဖၣ်ႇ တၢ်တၤတၢ်မ့ၢ်အိၣ်ဝဲဘၣ်ဆၣ် မၤဘၣ်အီၤဂ့ၤဂ့ၤဘၣ်ဘၣ်စ့ၢ်ကီးန့ၣ်လီၤ. ကီၢ်ပၢဆှၢတၢ်ကမံးတံာ်တဖၣ် သူၣ်ဆူၣ်သးဂဲၤႇ ဆီၣ်ထွဲမၤသကိးတၢ်ဒီး ကီၢ်တၢ်သးခုကစီၣ်တၢ်ဖံးတၢ်မၤတဖၣ် ဒ်အလီၢ်အိၣ်အသိး ကဲထီၣ်မးတၢ်ဘျုးတၢ်ဖှိၣ်လၢ တၢ်လဲၤထီၣ်လဲၤထီကဂ့ၤထီၣ်အဂီၢ်န့ၣ်လီၤ. ၂၃.၃.၂ဝ၂၆ နံၤ တူၢ်ဖှိၣ်ဟါ(၆းဝဝ)နၣ်ရံၣ် ဒီးတၢ်အိးထီၣ်တၢ်ရဲၣ်တၢ်ကျဲၤဝံၤ ပိာ်ထွဲထီၣ်အခံလၢ ဝဲၤကျိၤႇ ကရၢတဖၣ်တၢ်ဟ့ၣ်လီၤက့ၤႇ လံာ်တၢ်မၤလၤကပီၤ လၢၦၤဖျိထီၣ်လံာ်စီဆှံကၠိတဖၣ်ႇ ၦၤမၤတၢ်သးခုကစီၣ်ၦဲၤထီၣ်(၂၅)နံၣ်ဆူအဖီခိၣ်တဖၣ်ႇ ဃုာ်ဒီးသရၣ်ဒိၣ် သရၣ်မုၣ်ဒိၣ်လၢဒိးန့ၢ်ဘၣ်(MOCS)တဖၣ်ႇ ၦၤလၢမၤဝံၤတၢ်မၤလိလံာ်စီဆှံခီဖျိတၢ်ကွဲးတဖၣ်ႇ ခိၣ်ဖးတဖၣ်လၢ ၦၤနုာ်လီၤသတြီၤ ကီၢ်ဒီးခဝ့ၡၢၣ်သုးကျဲၤမၤဝဲတဖၣ်ႇ တၢ်တူၢ်လိာ်ပိာ်ခွါကရၢအသီ လၢနုာ်လီၤဘျးစဲအသးဆူ ကိၢ်ပိာ်ခွါဝဲၤကျိၤ တၢ်ရဲၣ်တၢ်ကျဲၤတဖၣ်န့ၣ်လီၤ.၂၄.၃.၂ဝ၂၆ နံၤ အိၣ်ဒီးတၢ်ကတဲာ်ကတီၤဘှီဘၣ်မၤဂ့ၤထီၣ် တၢ်သိၣ်တၢ်ဘျၢဒီး တၢ်သိၣ်တၢ်သီ အလံာ်ပူၤတၢ်ဂ့ၢ်လၢအလိၣ်တဖၣ်လၢ ပၢဆှၢတၢ်ကမံးတံာ်အပတီၢ်န့ၣ်လီၤ.(၂၅.၃.၂ဝ၂၆)နံၤ အိၣ်ဒီးတၢ်အိၣ်ဖှိၣ်ဒီးတၢ်ပာ်ဂၢၢ်ပာ်ကျၢၤတၢ်ဂ့ၢ်တၢ်ကျိၤ တၢ်စံၣ်ညီၣ်အၢၣ်လီၤတဖၣ်န့ၣ်လီၤ.