Karen Baptist Convention

တလါညါအံၤ ခရံ၁်ဖိတၢ်မၤဂ့ၤမၤစၢၤဒီး တၢ်ဂုၤထီၣ်ပသီထီၣ်ဝဲၤကျိၤ အိၣ်ဒီး တၢ်မၤလိ(၂)ခါလၢအမ့ၢ် 
BCR တၢ်တိ၁်ကျဲၤ ဒီး WE&EJ and RODV တၢ်တိ၁်ကျဲၤ သ့ၣ်တဖၣ်အတၢ်မၤလိတဖၣ်န့ၣ်လီၤ. 
BCR တၢ်တိ၁်ကျဲၤမၤဝံၤဝဲဒၣ် တၢ်မၤလိလၢ အဘၣ်ထွဲ ဒီးတၢ်သူၣ်တၢ်ဖျး အတၢ်မၤလိ (Argo-Ecology Training) ဖဲ လါယူၤလံ  ၇သီ တုၤ ၁၈ သီႇ ၂ဝ၂၃နံၣ် န့ၣ်လီၤ. ၦၤမၤလိတၢ်ဖိ ခဲလၢ၁် အိၣ်ဝဲဒၣ် (၄၈) ဂၤ ဒီးၦၤမၤလိတၢ် ဖိတဖၣ် မ့ၢ်ဝဲတၢ် တိ၁်ကျဲၤဘၣ်ထွဲ သဝီဖိတဖၣ် ဒီးတၢ်တိ၁်ကျဲၤၦၤမၤတၢ်ဖိတဖၣ် န့ၣ်လီၤ. တၢ်မၤလိတဘျီအံၤ ၦၤလၢ အဟဲဟ့ၣ်ခီဟ့ၣ်နီၤတၢ်မ့ၢ်ဝဲ သရၣ်လးမၠ့းကၠီၣ် လၢ ဝ့ၢ်အီၣ်ဘါန့ၣ်လီၤ
WE&EJ and RODV တၢ်တိ၁်ကျဲၤ မၤဝဲဒၣ် တၢ်မၤလိ ဘၣ်ထွဲ  Climate Smart, Business Eye Opening, and Facilitation Skill  တၢ်မၤလိဖဲ လါယူၤလံ  ၂၁ တုၤ ၂၉သီႇ ၂ဝ၂၃နံၣ်န့ၣ်လီၤ. ၦၤမၤလိတၢ် ဖိခဲလၢ၁် အိၣ်ဝဲဒၣ် (၅ဝ)ဂၤ ဒီး ၦၤမၤလိ တၢ်ဖိတဖၣ် မ့ၢ်ဝဲ တၢ်တိ၁်ကျဲၤ ၦၤမၤတၢ်ဖိလၢ ကီၢ် အပတီၢ် တဖၣ် ဒီး တၢ်တိ၁်ကျဲၤဘၣ်ထွဲသဝီဖိ တဖၣ်န့ၣ်လီၤ. ၦၤလၢအဟ့ၣ် ခီဟ့ၣ်နီၤတၢ်တဖၣ်မ့ၢ်ဝဲဒၣ်- သရၣ်လးမဲအူ, သရၣ်တူၢ်ဒိၣ်ထူဝါ ဒီး သရၣ်မုၣ်လါဝါဖီ တဖၣ်န့ၣ်လီၤ.

ၦၤကညီဘျၢထံခဝ့ၡၢၣ်
တၢ်သးခုကစီၣ်ဒီးမံးၡၢၣ်ဝဲၤကျိၤ
တၢ်ပ၁်ဖျါ (တၢ်မၢဖိတၢ်မၤလိ-ခံဘျီတဘျီ) ၂ဝ၂၃နံၣ်

ပစံးဘျုးဘၣ်ကစၢ်ယွၤလၢ အစိ၁်ဆှၢခီဖျိၦၤဒီးဒုးမၤၦၤလၢ အတၢ်ဖံးတၢ်မၤအဃိန့ၣ်လီၤ.မ့ၢ်လၢယွၤအဘျုးအဖှိၣ်အဃိႇ ထံကီၢ်တၢ်မၤအသးတၢ်ဆူးတၢ်ဆါတဖၣ် မ့ၢ်မၤအသးဒ်လဲၣ်ဒ်လဲၣ်ဘၣ်ဆၣ်ႇ ယွၤဟ့ၣ်ခွဲးဟ့ၣ်ယၤၦၤအဃိ လါယူၤ ၂၆သီ တုၤလါယူၤလံ ၁၆သီ အတီၢ်ပူၤ ပဝဲတၢ်သးခုကစီၣ်ဒီးမံးၡၢၣ်ဝဲၤကျိၤ ပမၤဘၣ် အသီ(၂ဝ) တၢ်မၢဖိတၢ်မၤလိ ခံဘျီတဘျီ ဖဲခိခိၣ် တၢ်သးခုကစီၣ်တၢ်ဂုၤထီၣ်ပသီထီၣ်လီၢ်ခၢၣ်သးႇ မီၣ်ဘံၣ်ဝ့ၢ်ဆၣ်န့ၣ်လီၤ. 
တၢ်မၤလိအံၤဘၣ်တၢ်စးထီၣ်အီၤဖဲ ၂၆.၆.၂ဝ၂၃ နံၣ် ဟါ ၄း၃ ဝနၣ်ရံၣ်န့ၣ်လီၤ. ၦၤပၢၤလီၢ်ဆ့ၣ်နီၤမ့ၢ် သရၣ်ဒီးကထၢၣ် န့ၢ်လ့အီၣ်ႇ တၢ်ကစီၣ်ဟ့ၣ်ဂံၢ်ဟ့ၣ်ဘါလၢ သရၣ်မုၣ်ၡံထၣ်ဖီ(ၦၤပၢၤစ့ႇ ၦၤကညီဘျၢထံခဝ့ၡၢၣ်) တၢ်ထုကဖၣ်အလၢအၦဲၤလၢ သရၣ်လ့ၤဝံ (တၢ်သးခုကစီၣ်အၦၤနဲၣ်တၢ်ႇ ကီၢ်ပကိတကူၣ်) ဒီးတၢ်ဘိးဘၣ်သ့ၣ်ညါဒီးတၢ်ဆိၣ်ဂ့ၤပျၢ်လၢ သရၣ်ဒိၣ်အဲးဒဝၢး          (တၢ်သးခုကစီၣ်ဒီးမံးၡၢၣ်ဝဲၤကျိၤၦၤနဲၣ်တၢ်ႇ ၦၤကညီဘျၢထံခဝၡၢၣ်)တဖၣ်န့ၣ်လီၤ. 
သရၣ်သိၣ်လိတၢ်တဖၣ်မ့ၢ်ဝဲ သရၣ်ဒိၣ်ဖိထူ(တၢ်အုၣ်က့ၤခီၣ်က့ၤ)  သရၣ်မုၣ်အဲၣ်ခုၣ် (တၢ်ကဲခိၣ်ကဲနၢ် လၢတၢ်သးခုကစီၣ်တၢ်မၤ) သရၣ်ဒိၣ်လ့မီ (ကစၢ်ခရံ၁်ဒီးတၢ်သးခုကစီၣ်တၢ်မၤ)  သရၣ်ဒိၣ်လါလါ(တၢ်သူၣ်လီၤတၢ်အိၣ်ဖှိၣ်) သရၣ်မုၣ်ဒိၣ်ဒီးကထၢၣ်ထူထူ (တၢ်မၤတၢ်သးခုကစီၣ်တၢ်မၤလၢသးစီဆှံ)ႇ သရၣ်ဒိၣ်တ့ၣ်စီ (မုၢ်နံၤခံကတၢၢ် တၢ်ကမၤအသးတဖၣ်)တဖၣ်န့ၣ်လီၤ. မ့မ့ၢ်တၢ်မၤလိ လံ၁်စီဆှံန့ၣ် သရၣ်ဒိၣ်လးဖ့ၣ်ႇ သရၣ်မုၣ်သ့ၣ်ကံၣ်လးဒီးသရၣ်မုၣ်ခၠိၣ်သဲ တဖၣ်န့ၣ်လီၤ. ၦၤသိၣ်လိန့ၢ် တၢ်သးဝံၣ်တဖၣ်မ့ၢ် သရၣ်ကၠိဝ့ႇ သရၣ်သးဝါထူဒီး သရၣ်မုၣ်ဟဲဂ့ၤက့လ်တဖၣ်န့ၣ်လီၤ. ၦၤမၤလိတၢ်ဖိ ခဲလၢ၁်အိၣ်ဝဲ (၁၈) ဂၤဟဲခီဖျိလၢကီၢ် (၁၂) ဘ့ၣ်အခၢၣ်စးန့ၣ်လီၤ.
မုၢ်အိၣ်ဘှံးနံၤသၢနွံန့ၣ် ပလဲၤဒီးရ့လိ၁်မု၁်လိ၁်ဘၣ်လၢ တၢ်မၢလီၢ်လၢအကဲထီၣ်တၢ်အိၣ်ဖှိၣ်တဖၣ်န့ၣ်လီၤ. တၢ်အိၣ် ဖှိၣ်လၢပလဲၤရန့ၣ်လီၤ.လိ၁်သးတဖၣ်မ့ၢ်ဝဲ ပနၢ်ဂ့ၤနိၣ်တၢ်အိၣ်ဖှိၣ်ႇ ရွှ့ၣ်ကၠၣ်ဘၠဲးတၢ်အိၣ်ဖှိၣ်ဒီး စွဲၣ်တီၣ်ကူတၢ်အိၣ်ဖှိၣ်သ့ၣ်တဖၣ်န့ၣ်လီၤ. ပစံးဘျုး ကစၢ်ယွၤလၢ သၢနွံအတီၢ်ပူၤ ပမၤလိဘၣ်တၢ်ဂ့ၤဂ့ၤဘၣ်ၦဲၤဒီး တၢ်သူၣ်ခုသးခုအဃိစ့ၢ်ကီးလီၤ. ပန၁်သၦၢ်ကတၢၢ်လၢ တၢ်မၤလိတဘျီအံၤ ကဟဲစိ၁်န့ၢ်တၢ်ဘျုးတၢ်ဆိၣ်ဂ့ၤ အလၢအၦဲၤလၢ ၦၤတၢ်မၢဖိကိးဂၤအဂီၢ်န့ၣ်လီၤ.
ပမၤကတၢၢ်ဘၣ်တၢ်မၤလိအံၤဖဲ ၁၆.၇.၂ဝ၂၃ နံၣ်ႇ ဟါ ၄းဝဝနၣ်ရံၣ်န့ၣ်လီၤ. ၦၤပၢၤလီၢ်ဆ့ၣ်နီၤမ့ၢ် သရၣ်မုၣ်ခၠိၣ်သဲႇ  ၦၤဟ့ၣ်ဂံၢ်ဟ့ၣ်ဘါဆူတၢ်မၢဖိတဖၣ်အဂီၢ်မ့ၢ် သရၣ်ဒိၣ်ယွၤဒုးမူ (ၦၤကညီဘျၢထံခဝ့ၡၢၣ်နဲၣ်ရွဲၣ်ခိၣ်ကျၢၤ) န့ၣ်လီၤ. တၢ်ထုကဖၣ် ပ၁်စီဆှံက့ၤတၢ်မၢဖိတဖၣ်ဒီး တၢ်ရဲၣ်တၢ်ကျဲၤခဲလၢ၁်မ့ၢ်သရၣ်ဒိၣ်အဲၣ်ဒ့  (တၢ်သးခုကစီၣ်အၦၤနဲၣ်တၢ်ႇ ကီၢ်တကူၣ်) တၢ်ဘိးဘၣ်သ့ၣ်ညါဒီးတၢ်စံးဘျုးလၢ သရၣ်ဒီးကထၢၣ်န့ၢ်လ့အီၣ်(ၦၤနဲၣ်တၢ်သဃဲၤ) ဒီးတၢ်ဆိၣ်ဂ့ၤပျၢ်လၢသရၣ်ဒိၣ်ယွၤဒုးမူန့ၣ်လီၤ. တၢ်ရဲၣ်တၢ်ကျဲၤတဘျီအံၤ နၢ်ဟူဘၣ်စ့ၢ်ကီးတၢ်သးဝံၣ် လၢသရၣ်မုၣ်အဲးစထၢၣ်အဲၣ်ဒ့ဒီးသရၣ်ဃနိ၁် ဒီးၦၤမၤလိတၢ်ဖိတဖၣ် အအိၣ်န့ၣ်လီၤ. 
ပစံးဘျုးဘၣ်ကစၢ်ယွၤႇ သရၣ်သမါတဖၣ်လၢ အဟဲဒီးဟ့ၣ်ခီဟ့ၣ်နီန့ၢ်တၢ်ႇ ခိၣ်နၢ်လၢခဝ့ၡၢၣ်တဖၣ်ႇ ၦၤလၢအဆီၣ်ထွဲ မၤစၢၤၦၤခီဖျိတၢ်ထုကဖၣ်ႇ ဃှှီီ ၦၤနဲၣ်တၢ်သရၣ်မုၣ်ဒီးကထၢၣ်ကၠဲပလံ လၢအသုးကျဲၤန့ၢ်ၦၤတၢ်လီၢ်တၢ်ကျဲႇ သရၣ်ကံဒိၣ်ဒီး ဟံၣ်ဖိဃီဖိလၢအမၤစၢၤၦၤလၢ တၢ်အီၣ်တၢ်အီလၢတၢ်ရဲၣ်တၢ်ကျဲၤ တဘျီအံၤကိးဂၤဒဲးန့ၣ်လီၤ. မ်ယွၤလၢအမူဝဲ အဘျုးထူးဖှိၣ် တီၤအါ ကလီၤကဒုဘၣ်အမု၁်သုလိၤ ထူးထူးတီၤတီၤန့ၣ် မ့ၢ်ယတၢ်ဆၢဂ့ၤဆၢဝါဘၣ်သုန့ၣ်လီၤ.

       သရၣ်ဒိၣ်အဲးဒဝၢး
      ၦၤနဲၣ်တၢ်(တၢ်သးခုကစီၣ်ဒီးမံးၡၢၣ်ဝဲၤကျိၤ)

တၢ်သ့ကတီၤ PA System တၢ်မၤလိ
တၢ်မၤလိအံၤဘၣ်တၢ်သုးကျဲၤအီၤလၢ တၢ်ဘၣ်ထွဲတုၤအိၣ်လိ၁်သးဝဲၤကျိၤ ဖဲ ၂၁.၇.၂ဝ၂၃ နံၤႇ စးထီၣ်လၢ ဂီၤ ၈း၃ ဝန့ၣ်လီၤ. တၢ်မၤလိအံၤအတၢ်ပညိၣ်တၢ်ကွၢ်စိမ့ၢ်ဝဲ ၦၤကညီဘျၢထံခဝ့ၡၢၣ်ႇ ဝဲၤကျိၤၦၤမၤတၢ်ဖိသ့ၣ်တဖၣ်ကသ့ကတီၤတၢ်ပီးတၢ်လီႇ ကသ့ၣ်ညါအါထီၣ်တၢ်မၤဒိၣ်ကလုၢ်ႇ ကစူးကါက့ၤတၢ်မၤလိလၢအဒိးန့ၢ်တဖၣ်ဖဲ ဝဲၤကျိၤအတၢ်လိၣ်အကတီၢ်မ့ၢ်ဂ့ၤႇ ဝဲၤလီၢ်တၢ်ဘူၣ်တၢ်ဘါႇ တၢ်အိၣ်ဖှိၣ်ရိဖှိၣ်ႇ တၢ်မၤလိအကတီၢ်ႇ တကးဒံးဘၣ်ကသ့ဟ့ၣ်ခီဟ့ၣ်နီၤက့ၤဆူၦၤလၢအလိၣ်ဘၣ်သ့ၣ်တဖၣ်အအိၣ်အဂီၢ်န့ၣ်လီၤ.
တၢ်မၤလိအဘျီအံၤဘၣ်တၢ်စးထီၣ်အီၤလၢ သရၣ်မုၣ်ၡံထၣ်ဖီ(ကျိၣ်စ့ဒီးတၢ်စုလီၢ်ခီၣ်ခိၣ်ဝဲၤကျိၤႇ ၦၤနဲၣ်တၢ်) အတၢ်ကတိၤတူၢ်လိ၁်ဒီး တၢ်ထုကဖၣ်ဆၢဂ့ၤဆၢဝါန့ၣ်လီၤ. ၦၤလၢအဟ့ၣ်ခီ ဟ့ၣ်နီၤတၢ်မၤလိတဘျီအံၤမ့ၢ်ဝဲ -သရၣ်န့ၢ်ဘျုး (ၦၤပၢၤစ့)န့ၣ်လီၤ. တၢ်မၤလိတဘျီအံၤၦၤလၢအဟဲထီၣ်မ့ၢ် ၦၤကညီဘျၢထံခဝ့ၡၢၣ် ဝဲၤကျိၤ(၁၄)ကျိၤ ခၢၣ်စးတနီၤန့ၣ်လီၤ.ဝဲၤကျိၤလၢအဟဲထီၣ်တဖၣ်မ့ၢ်ဝဲ- ပိ၁်ခွါဝဲၤကျိၤႇ သရၣ်သမါဝဲၤကျိၤႇ လံ၁်လဲၢ်ဒီးတၢ်ဆဲးတၢ်လၤဝဲၤကျိၤႇ တၢ်သးခုကစီၣ်ဒီးမံးၡၢၣ်ဝဲၤကျိၤႇ ခရံ၁်ဖိတၢ်ကူၣ်ဘၣ်ကူၣ်သ့ဝဲၤကျိၤႇ တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤဒီး နဲၣ်ရွဲၣ်ဝဲၤဒၢးၦၤမၤသကိးတၢ်တဖၣ်န့ၣ်လီၤ. ၦၤဟဲထီၣ်တၢ်မၤလိအိၣ်ဝဲဒၣ် (၁ဝ)ဂၤန့ၣ်လီၤ.

ၦၤကညီဘျၢထံခဝ့ၡၢၣ် တၢ်ကတဲာ်ကတီၤဒုးဒိၣ်ထီၣ်ထီထီၣ်ခိၣ်နၢ်
ဝဲၤကျိၤအိၣ်ဒီး "တၢ်ကဲခိၣ်ကဲနၢ်ဒီး တၢ်ပၢတၢ်ဆှၢ" တၢ်မၤလိဖဲ ခဝ့ၡၢၣ်နံၣ်တကယၤတၢ်စံးဘျုးတၢ်သူၣ်ထီၣ် တၢ်အိၣ်ဖှိၣ်ဒၢးန့ၣ်လီၤ. တၢ်မၤလိအံၤစးထီၣ်ဖဲ လါယူၤလံ(၁၁)သီႇ ဒီးတုၤဖဲလါယူၤလံ(၁၄)ႇ
၂ဝ၂၃နံၣ်န့ၣ်လီၤ. တၢ်မၤလိတဘျီအံၤ ၦၤသိၣ်လိတၢ်သရၣ်တဖၣ်
မ့ၢ်ဝဲ-ဒီးကထၢၣ်အၤဘၢၣ် ဒီးသရၣ်န့ၤသၣ်တဖၣ်န့ၣ်လီၤ. 
ကီၢ်(၁၆)ဘ့ၣ်ခၢၣ်စး ၦၤဟဲထီၣ်တၢ်မၤလိအိၣ်ဝဲ(၃၁)ဂၤန့ၣ်လီၤ.

ၦၤကညီဘျၢထံခဝ့၇ှၢၣ်တၢ်ကဟုကယ၁်ဒီးတၢ်ကူၣ်လိ၁်တၢ်ဝဲၤကျိၤအိၣ်ဒီး တၢ်မၤအါထီၣ်ၦၤမၤ လိတၢ်ဖိအဂီၢ် ကံၢ်စီတၢ်မၤလိ(TOT) ဘၣ်ဃးတၢ်ဆီၣ်ထွဲၦၤတဆှိၣ်သးမး ဖဲလါယူၤ (၂၆)သီတုၤ(၃ဝ)သီႇ၂ဝ၂၃နံၣ် န့ၣ်လီၤ. တၢ်မၤလိအံၤဘၣ်တၢ်မၤအီၤဖဲ (၁၂၁)ဃႇ မ့ယဲကၠီၣ်စွၣ်ကျဲႇ အလူၣ်ႇ ဝ့ၢ်တကူၣ်/ တၢ်မၤလိတၢ်အိးထီၣ် မူးအံၤဘၣ်တၢ်မၤအီၤဖဲ (၂၆.၆.၂ဝ၂၃)အနံၤဂီၤ (၈းဝဝ)နၣ်ရံၣ်, ဒီးဘၣ်တၢ်စးထီၣ်အီၤလၢတၢ်ဘူၣ်သကိးဘါသကိး တၢ် လီၤ. ဝံၤပိ၁်ထွဲထီၣ်အခံလၢတၢ်မၤလိတၢ်ရဲၣ်တၢ်ကျဲၤတဖၣ်ဒီး တၢ်သိၣ်လိတဘျီအံၤ ဘၣ်တၢ်ဟဲဟ့ၣ်ခီဟ့ၣ်နီၤၦၤလၢ (The Leprosy Mission Myanmar) န့ၣ်လီၤ. 
    တၢ်မၤလိတဘျီအံၤ အတၢ်ပညိၣ်ကွၢ်စိမ့ၢ်ဝဲ တၢ်က၇ၢက၇ိဒီး တၢ်အိၣ်ဖှိၣ်တဖၣ်ကသ့ပ၁်သူၣ်ပ၁် သးဆိကမိၣ်န့ၢ်တၢ်လၢတၢ်အိၣ်ဖှိၣ်အပူၤ ၦၤတဆှိၣ်သးမးတဖၣ်အဂီၢ်ဒီး ပကသူၣ်ထီၣ်သကိးႇ သဆၣ်ထီၣ်သကိး ဒ်ခ၇ံ၁်ဖိ အတၢ်ဒိဂ့ၤတဲ၁်ဘၣ် လၢပဘၢၣ်ကဝီၤအပူၤန့ၣ်လီၤ.
    ၦၤဟဲထီၣ်တၢ်မၤလိအိၣ်ဝဲ (၁၁)ဂၤ ဒီးသရၣ်ႇ သရၣ်မုၣ်သိၣ်လိတၢ်အိၣ်ဝဲ (၃)ဂၤန့ၣ်လီၤ. တၢ်မၤ လိ အံၤဘၣ်တၢ်ပျၢ်က့ၤအီၤဖဲ (၃ဝ.၆.၂ဝ၂၃)အနံၤႇ ဟါ (၃း၃ဝ)နၣ်ရံၣ်ခီဖျိလၢတၢ်ဘူၣ်တၢ်ဘါဒီး ၦၤကညီဘျၢထံ ခဝ့၇ှၢၣ် နဲၣ်၇ွဲၣ်သဃဲၤ(တၢ်ပၢတၢ်ဆှၢ)ဟဲ, ဟ့ၣ်ဂံၢ်ဟ့ၣ်ဘါ ထုကဖၣ်တၢ်လၢ ၦၤမၤလိတၢ်ဖိတဖၣ်ဒီးသရၣ်ႇ သရၣ်မုၣ်သိၣ်လိတၢ် တဖၣ်အဂီၢ်လီၤ.

ၦၤကညီဘျၢထံခဝ့ၡၢၣ် အိၣ်ဒီး တၢ်ရဲၣ်တၢ်ကျဲၤခံမံၤလၢ အမ့ၢ် တၢ်ဒုးသ့ၣ်ညါ တၢ်ဒီတဒၢ ပၢဆှၢသုးကျဲၤတၢ် တတၢးတနါ တၢ်ရဲၣ်တၢ်ကျဲၤ ဒီးနံၣ်ကယၤ(၂၁)မံးၡၢၣ်တၢ်တိာ်ကျဲၤ သၢပတီၢ်တပတီၢ် တၢ်ကတိၤခီလဲအတၢ်ရဲၣ်တၢ်ကျဲၤ  သ့ၣ်တဖၣ်န့ၣ်လီၤ. တၢ်ရဲၣ်တၢ်ကျဲၤသ့ၣ်တဖၣ်အံၤ ဘၣ်တၢ်မၤအီၤဖဲ လါယူၤ (၂၁)သီ ဂီၤ(၈း၃ဝ)တုၤ(၂၄)သီႇ မုၢ်ဆါ (၁၂)နၣ်ရံၣ်ႇ ၂ဝ၂၃နံၣ် ဖဲဝဲးသ့ၣ်တၢ်အိၣ်ဖှိၣ်ႇ ကီၢ်ပသံၣ်မၠီမၠးန့ၣ်လီၤ. ၦၤဟဲထီၣ်တၢ်ရဲၣ်တၢ်ကျဲၤသ့ၣ်တဖၣ်မ့ၢ်ဝဲ ၦၤကညီဘျၢထံခဝ့ၡၢၣ်ကမံးတံာ်မၤတၢ်ခိၣ်နၢ်တဖၣ် ခဲလၢာ်အိၣ်ဝဲ(၄၆)ဂၤန့ၣ်လီၤ.

ၦၤကညီဘျၢထံခဝ့ရှၢၣ် တၢ်ကဟုကယာ်ဒီးတၢ်ကူၣ်လိာ်တၢ်ဝဲၤကျိၤတီခိၣ်ရိၣ်မဲဒီး သုးကျဲၤတၢ်ကတိၤလီၤဆီ ဘၣ်ထွဲဒီးတၢ်အိၣ်ဆူၣ်အိၣ်ချ့ Cervical Cancer လၢ ဒီးကထၢၣ်ခ့ၣ်ထူစီၣ် ဖဲလါမ့ၤ(၁၅)သီႇ ၂ဝ၂၃နံၣ်ႇ ဖဲခိလ်ကညီဘျၢထံတၢ်ဘါယွၤသရိာ်, မုၢ်ဆါ(၁၂)နၣ်ရံၣ်န့ၣ်လီၤ. တၢ်ကတိၤလီၤဆီဝံၤ အိၣ်ဒီးတၢ်သံကွၢ်စံးဆၢလၢ ၦၤဟဲဒိကနၢ်တၢ်တဖၣ်န့ၣ်လီၤ. ၦၤဟဲထီၣ်တၢ်ကတိၤ လီၤဆီခဲလၢာ်အိၣ်ဝဲ(၄၃)ဂၤန့ၣ်လီၤ.

၂ဝ၂၃နံၣ် ကီၢ်မၠီမၠးကမျၢၢ်ခၢၣ်စးတၢ်အိၣ်ဖှိၣ်(၁)တဘျီ ဘၣ်တၢ်မၤအီၤဖဲလါအ့ဖြ့ၣ် ၂၂-၂၃သီအနံၤ ဖဲတၢ်လူၢ်ဖးဒိၣ်ခရံ၁်တၢ်အိၣ်ဖှိၣ်ႇ ကဝီၤ(၅), ကီၢ်မၠီမၠးန့ၣ်လီၤ. ဒီးတၢ်တိ၁်ထူမ့ၢ်ဝဲ - မုၢ်လၢ်တၢ်လၢယွၤ (စံး၂၇း၁၄ႇ ယၡါ၄ဝး၃ဝ-၃၁) န့ၣ်လီၤ. ဖဲ ၂၂သီဂီၤ ၁ဝးဝဝနၣ်ရံၣ်တၢ်အိၣ်ဖှိၣ်ရိဖှိၣ်ဘၣ်တၢ်စးထီၣ်အီၤလၢတၢ်ဘါဖုၣ်ကိ၁်ႇ ၦၤဟ့ၣ်တၢ်ကစီၣ်လၢ ဖုသရၣ်ဒိၣ်ကဲလဲးစ် (ကမါဒိၣ်တၢ်အိၣ်ဖှိၣ်သရၣ်, ကဝီၤလွံၢ်)န့ၣ်လီၤ. ဝံၤပိ၁်ထွဲထီၣ်အခံဆူ ကီၢ်တၢ်ဖံးတၢ်မၤအဂ့ၢ် အကျိၤသ့ၣ်တဖၣ်န့ၣ်လီၤ. ဒီးလၢဟါ ၇းဝဝနၣ်ရံၣ်အိၣ်ဒီး မူးသးဖှံအတၢ်ရဲၣ်တၢ်ကျဲၤကတီၢ်န့ၣ်လီၤ.
လါအ့ဖြ့ၣ်၂၃သီအိၣ်ဘှံးနံၤဂီၤ ၇းဝဝနၣ်ရံၣ်တၢ်ဘါ သရၣ်သမါအကရၢဟံးန့ၢ်တၢ်ရဲၣ်တၢ်ကျဲၤ ၦၤပၢၤလီၢ်ဆ့ၣ်နီၤ သရၣ်ဒိၣ်ဆၣ်အဲၣ်ဆိ(ကီၢ်သရၣ်သမါကရၢနဲၣ်ရွဲၣ်) မၤသကိးဒီးကဝီၤယဲၢ်ကဝီၤယဲၢ်ကဝီၤသရၣ်သမါတဖၣ် တၢ်ကစီၣ်တခီမ့ၢ် သရၣ်ဒိၣ်ကွၢ်လၢ်(စခါကၠံတၢ်အိၣ်ဖှိၣ်သရၣ်, ကဝီၤခံ)န့ၣ်လီၤ.၁ဝး၃ဝနၣ်ရံၣ်မုၢ်ဆါတၢ်ဘါ ၦၤပၢၤလီၢ်ဆ့ၣ်နီၤ ကီၢ်ခိၣ်သရၣ်ဒိၣ်ဘၤနါဘၤဆၢ (ဖီထူကျိတၢ်အိၣ်ဖှိၣ်သရၣ်) န့ၣ်လီၤ. ကီၢ်နဲၣ်ရွဲၣ်သရၣ်လီၢ်ဒိၣ်ထူ ဒုးသ့ၣ်ညါကီၢ်ဝဲၤလီၢ် ၦၤမၤသကိးတၢ်တဖၣ်ဝံၤ လဲၤဆူတၢ်ဘၣ်တၢ်ဘါအတၢ်ရဲၣ်တၢ်ကျဲၤန့ၣ်လီၤ. တၢ်ဘူၣ်တၢ်ဘါဘၣ်တၢ်မၤသကိးအီၤလၢ ဝဲၤကျိၤခိၣ်နၢ်သရၣ်သမါ သ့ၣ်တဖၣ်ဒီးလၢကမျၢၢ်ခၢၣ်စးတၢ်အိၣ်ဖှိၣ်တၢ်ဘါဖးဒိၣ်တဘျီအံၤ အိၣ်ဒီးတၢ်လုၢ်ထီၣ်ပ၁်စီဆှံက့ၤကီၢ်မၠီမၠးမီထိၣ်လၢ ကဘၣ်တၢ်စိ၁်မူအီၤတပယူ၁်ဃီလၢအမ့ၢ် - လဲၤလၢညါတုၤလၢတၢ်လၢတၢ်ၦဲၤ(ဧ့ၤ၆း၁-၂ႇ အ့း၃း၁၉)န့ၣ်လီၤ. တၢ်လုၢ်ထီၣ်ပ၁်စီဆှံ အဂီၢ်သရၣ်ဒိၣ်လၢအယၢ်ထီၣ်အစုမ့ၢ်ဝဲ သရၣ်ဒိၣ်ကွၢ်လၢ်ႇ သရၣ်ဒိၣ်မု၁်သးႇ သရၣ်ဒိၣ်ဖြီမံးစ်ဒီး သရၣ်ဒိၣ်အိၣ်ခ့ၣ်ဝါတဖၣ်ဒီးၦၤလၢအဘါထုကဖၣ်မ့ၢ်သရၣ်ဒိၣ်ဆၣ်အဲၣ်ဆိန့ၣ်လီၤ. ၦၤလၢဟ့ၣ်ၦၤတၢ်ကစီၣ်လၢတၢ်ဘါဖးဒိၣ်တဘျီအံၤမ့ၢ်ၦၤကညီဘျၢထံခဝ့ၡၢၣ်နဲၣ်ရွဲၣ်ခိၣ်ကျၢၢ် သရၣ်ဒိၣ်ယွၤဒုးမူန့ၣ်လီၤ. တၢ်ဘါကတီၢ်တၢ်ထၢဖှိၣ်အိၣ်ဝဲဒၣ်ခံဘျီဒီးၦၤသခူထီၣ်တၢ်မၤဘူၣ်မ့ၢ် သရၣ်ဒိၣ်မု၁်သး(ကၠီကရၢတၢ်အိၣ်ဖှိၣ်သရၣ်?ကဝီၤခိၣ်ယဲၢ်)န့ၣ်လီၤ.တၢ်ကတိၤစံးဘျုးက့ၤတၢ်အိၣ်ဖှိၣ်လၢအတူၢ်လိ၁်တၢ်ႇ ခၢၣ်စးလၢအဟဲသ့ၣ်တဖၣ်ဒီးခဝ့ၡၢၣ်ၦၤဘၣ်မူဘၣ်ဒါသ့ၣ်တဖၣ်လၢ ကီၢ်ခၢၣ်စးမ့ၢ်ဝဲ သရၣ်ဒိၣ်ကျၢၤထူ(သၣ်လ့လူၢ်တၢ်အိၣ်ဖှိၣ်သရၣ်? ကဝီၤသၢ)န့ၣ်လီၤ. တၢ်ရဲၣ်တၢ်ကျဲၤတဘျီအံၤ ပအိၣ်ဒီးတၢ်ဒ့ဆှၢနု၁်လၢပဟံၣ်လူၢ်ႇ ပဟံၣ်ၦၢ်ႇ တၢ်လူၢ်ဖးဒိၣ်ပ၁်ဖှိၣ်ပၢ်အတၢ်ဒ့ဒီးကမါဖိႇ တၢ်လူၢ်ဖးဒိၣ်ပ၁်ဖှိၣ်သီတူ၁်တၢ်ဒ့သ့ၣ်တဖၣ်န့ၣ်လီၤ. ဒီးလၢကမျၢၢ်ခၢၣ်စးတၢ်အိၣ်ဖှိၣ်တဘျီအံၤတၢ်ဆဲးလီၤမံၤခဲလၢ၁်အိၣ်ဝဲ(၁၄၁)ဂၤန့ၣ်လီၤ.

ကီၢ်တီအူသၣ်တီၣ်ဘှဲမိၤၦၤႇ ပအိၣ်ဒီး - တၢ်ရ့လိ၁်မု၁်လိ၁်အတၢ်ရဲၣ်တၢ်ကျဲၤ ဆူကရူၢ်တဖၣ်အအိၣ်ဒီး ဖဲ(၃ဝ.၁၂.၂ဝ၂၂) မ့ၢ်ဝဲဖဲပြဲးကဝီၤႇ လူၢ်ဒ့တၢ်အိၣ်ဖှိၣ်န့ၣ်လီၤ. ပအိၣ်ဒီးကီၢ်ပၢဆှၢတၢ်ကမံးတံ၁်တၢ်အိၣ်ဖှိၣ်ဖဲ (၂၅.၃.၂ဝ၂၃)အနံၤဒီး ဘၣ်တၢ်တူၢ်လိ၁်ၦၤလၢ ကရူၢ်(၄)ဖဲ စံယိၣ်ပဟံၣ်လူၢ်တၢ်အိၣ်ဖှိၣ်န့ၣ်လီၤ. ဖဲ(၂၆.၃.၂ဝ၂၃)နံၤန့ၣ်အိၣ်ဒီး တၢ်ပ၁်စုသရၣ်လ့မူ(ကီၢ်တၢ်ဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤၦၤနဲၣ်တၢ်) ဖဲ စံယိၣ်ပဟံၣ်လူၢ်တၢ်အိၣ်ဖှိၣ်န့ၣ်လီၤ.

အဆိကတၢၢ်န့ၣ် စံးဘျုးဘၣ်ကစၢ်ယွၤအဘျုးအဖှိၣ်ဒိၣ်မးလၢ အဒုးမူၦၤဒီးဟ့ၣ်ဖံးဟ့ၣ်မၤၦၤလၢအတၢ်မၤဖးဒိၣ် အပူၤအဃိန့ၣ်လီၤ. (၂ဝ၂၂-၂ဝ၂၃)နံၣ် တၢ်ဖံးတၢ်မၤအပူၤအိၣ်ဒီးတၢ်လဲၤခီဖျိႇ တၢ်ကွၢ်ဆၢၣ်မဲ၁်အါကလု၁်ဘၣ်ဆၣ်ဒီး ကစၢ်ယွၤန့ၣ်တလီၤစၢ်လၢ ပကီၢ်အဂီၢ်ဘၣ်. လၢဆၢကတီၢ်တခါဘၣ်တခါအပူၤန့ၣ်ကစၢ်ယွၤမၤတီအကလုၢ်ဒီးၦၤအဃိ န့ၣ်လီၤ. ထံကီၢ်ဂံၢ်တၢ်ဟူးတၢ်ဂဲၤအဃိဒီး ပကီၢ်ချၢၣ်လွံၣ်ထူၣ်အပူၤ လီၤဆီဒၣ်တၢ်ကဝီၤနီၣ်ဂံၢ်(၄)အပူၤႇ မိၢ်တၢ်အိၣ်ဖှိၣ် (၁၃)ဖှိၣ်ဒီး တၢ်မၢလီၢ်(၄)တီၢ်အပူၤ တၢ်အိၣ်ဖှိၣ်ဖိတဖၣ်ဘၣ်သုးလီၢ်သုးကျဲန့ၣ်လီၤ. စံးဘျုး ဘၣ်ၦၤကညီဘျၢထံခဝ့ၡၢၣ် အပူၤစးထီၣ်လၢ နဲၣ်ရွဲၣ်ခိၣ်ကျၢၤဒီး ခိၣ်နၢ်သရၣ်သမါ ၦၤဘၣ်မူဘၣ်ဒါတဖၣ်လၢ အသ့ၣ်နီၣ်ၦၤလၢတၢ်ထုကဖၣ်ဒီးဆီၣ် ထွဲမၤစၢၤၦၤဃု၁်ဒီး ဒီပုၢ်ဝဲၢ်တံၤသကိးၦၤတဂၤဘၣ်တဂၤန့ၣ်လီၤ.တနံၣ်အံၤတၢ်ကီတၢ်ခဲအိၣ်ဝဲဘၣ်ဆၣ်ဒီး ပကီၢ်ချၢၣ်လွံၢ်ထူၣ်အံၤ ပမၤဘၣ်ကီၢ် ကမျၢၢ်ခၢၣ်စးတၢ်အိၣ်ဖှိၣ်ဖဲလါမၢ်ၡး (၁)သီႇ ၂ဝ၂၃နံၣ်လၢ ဝ့ၢ်ချၢၣ်လွံၢ်ထူၣ်ႇ ကီၢ်တၢ်ဘါယွၤသရိ၁်န့ၣ်လီၤ. ဒီးတၢ်တိ၁်ထူမ့ၢ်ဝဲ -ဟံးန့ၢ်မူဒါဒီးဂဲၤလိ၁်အါထီၣ် (ကလီး ၃း၂၃ႇ ကတိၤ ၁၂း၁၁ႇ ဧ့စြၤ ၁ဝး၄ႇ ၁ကရံၣ် ၁၄း၁၂) န့ၣ်လီၤ.ဒီးပအိၣ်ဒီးတနံၣ်တဘျီတၢ်ဘူၣ်တၢ်ဘါ ဖးဒိၣ်ဒီး လၢတၢ်ဘူၣ်တၢ်ဘါတဘျီအံၤ ၦၤဟ့ၣ်တၢ်ကစီၣ်မ့ၢ်ဝဲဒၣ် သရၣ်ဒိၣ်ကပီၤမူ(လံ၁်စီဆှံကၠိခိၣ်)န့ၣ်လီၤ. ဒီးခၢၣ်စးခဲလၢ၁်ဟဲ ထီၣ်ဝဲဒၣ် (၁၂၄)ဂၤန့ၣ်လီၤ.ပအိၣ်ဒီးတၢ်စံးဘျုးတၢ်ဘူၣ်တၢ်ဘါ အတၢ်ရဲၣ်တၢ်ကျဲၤ လၢအမ့ၢ် နံၣ်(၁ဝဝ)ယူဘလံၤ တၢ်စံးဘျုးတၢ်ဘူၣ်တၢ်ဘါအတၢ်ရဲၣ် တၢ်ကျဲၤ ဖဲလါမၢ်ၡး(၁)သီႇ ၂ဝ၂၃နံၣ် လၢဝ့ၢ်ချၢၣ်လွံၢ်ထူၣ် ကီၢ်တၢ်သးခု ကစီၣ်ကၠိကရၢၣ်အပူၤန့ၣ်လီၤ. တနံၣ်အံၤပအိၣ်စ့ၢ်ကီးဒီး တၢ်ဆီသလဲခိၣ်နၢ်သီတဖၣ်မ့ၢ်ဒ်လ၁်အံၤအသိးန့ၣ်လီၤ.

(၁)သရၣ်ဒိၣ်အ့ဖြ့ၣ်ထူ - ကီၢ်ခိၣ်              (၂)သရၣ်ဒိၣ်ကျၢၤတီ - ကီၢ်ခိၣ်စၢၤ
(၃)သရၣ်အဲၣ်ဝါ - ကီၢ်နဲၣ်ရွဲၣ်              (၄)သရၣ်ဒီးကထၢၣ်ကၠ့ၣ်စဲခ့ၣ် - ကီၢ်နဲၣ်ရွဲၣ်သဃဲၤ
(၅)သရၣ်မုၣ်သယုၢ်ဖီ - ကီၢ်ၦၤပၢၤစ့             (၆)တၢ်ကတဲ၁်ကတီၤဒုးဒိၣ်ထီၣ်ထီထီၣ်ခိၣ်နၢ်ဝဲၤကျိၤၦၤနဲၣ်တၢ် - သရၣ်မုသဖီစူးဒါ
(ရ)တၢ်ကဟုကယ၁်ဒီးကူၣ်လိ၁်တၢ်ဝဲၤကျိၤၦၤနဲၣ်တၢ် - သရၣ်လီၤတံၢ် 
(၈)ခရံ၁်ဖိတၢ်ကူၣ်ဘၣ်ကူၣ်သ့ဝဲၤကျိၤၦၤနဲၣ်တၢ် - သရၣ်မုၣ်အ့နူးယံၣ်