Karen Baptist Convention

ၦၤကညီဘျၢထံခဝ့ၡၢၣ် တၢ်ဘၣ်ထွဲတုၤအိၣ်လိာ်သးဝဲၤကျိၤ ဒီး ထုးထီၣ်ရၤလီၤလံာ်လဲၢ်ဝဲၤကျိၤအိၣ်ဒီး တၢ်သ့ပၢဆှၢတၢ်ကစီၣ်ဒီး စံၣ်စိၤနုာ်တၢ်ဆဲးကျိးတၢ်မၤလိ(၁ဝ)ဘျီတဘျီ ဘၣ်တၢ်မၤအီၤဖဲ  ခဝ့ၡၢၣ် နံၣ်(၁ဝဝ)တၢ်စံးဘျုးတၢ်သူၣ်ထီၣ်ႇ ၁၂၁(ဃ), အလူၣ်န့ၣ်လီၤ. တၢ်မၤလိအံၤ ဘၣ်တၢ်စးထီၣ်အီၤလၢ တၢ်ဘူၣ်သကိးဘါသကိးဖဲ လါယူၤလံ(၁၄)သီႇ ဟါ(၃)နၣ်ရံၣ်န့ၣ်လီၤ. ၦၤပၢၤလီၢ်ဆ့ၣ်နီၤမ့ၢ်ဝဲ-သရၣ်ဒီးကထၢၣ်တနၢ်ထူ (ထုးထီၣ်ရၤလီၤလံာ်လဲၢ်ဝဲၤကျိၤ ၦၤနဲၣ်တၢ်), တၢ်ကစီၣ်-သရၣ်မုၣ်ဒိၣ်ဒီးကထၢၣ်လ့ထူႇ တၢ်ထုကဖၣ်-သရၣ်မုၣ်အဲၣ်မုၢ်သး( ထုးထီၣ်ရၤလီၤလံာ်လဲၢ်ဝဲၤကျိၤ ၦၤနဲၣ်တၢ်သဃဲၤ)န့ၣ်လီၤ. တၢ်သိၣ်လိဘၣ်တၢ်စးထီၣ်အီၤဖဲ တၢ်သ့ဒိတၢ်ဂီၤဒီး တၢ်ဂီၤမူလၢ သရၣ်မၠိကၠံၣ် ဖဲလါယူၤလံ(၁၅)သီဂီၤ(၈း၃ဝ)တုၤ ဟါ(၄းဝဝ)နၣ်ရံၣ်န့ၣ်လီၤ. တၢ်သ့ဆူးကါ (AI) တၢ်သိၣ်လိလၢ သရၣ်မ့လဲး ဖဲ(၁၆)သီ ဂီၤ (၈း၃ဝ)တုၤ ဟါ(၄းဝဝ)နၣ်ရံၣ်န့ၣ်လီၤ.Logo Design တၢ်ဟ့ၣ်ခီဟ့ၣ်နီၤလၢ သရၣ်ယီဟၣ်ဖဲ လါယူၤလံ(၁၇)သီႇ ဂီၤ(၈း၃ဝ-၁၂)နၣ်ရံၣ် ဒီး သရၣ်အဲၣ်ဒံၢ်မူ သိၣ်လိဘၣ်ထွဲJournalism ဖဲဟါ(၁-၄)နၣ်ရံၣ်န့ၣ်လီၤ. ကိးဂီၤဒဲးအိၣ်ဒီး တၢ်ဘူၣ်သကိးဘါသကိးတၢ် ဒီး ကိးဟါဒဲး(၆-၈)နၣ်ရံၣ်အိၣ်ဒီး တၢ်မၤလ့ၤက့ၤတၢ်သိၣ်လိလၢ သရၣ်သိၣ်လိတၢ်တဖၣ်န့ၣ်လိၤ. တၢ်ပျၢ်တၢ်မၤလိ ဒီးတၢ်ဟ့ၣ်လီၤလံာ်အုၣ်သး ဘၣ်တၢ်မၤအီၤဖဲ လါယူၤလံ(၁၈)သီႇ ဂီၤ(၈းဝဝ)နၣ်ရံၣ်န့ၣ်လီၤ. ၦၤပၢၤလီၢ်ဆ့ၣ်နီၤ-သရၣ်မုၣ်ဒီးကထၢၣ်ဂ့ၤဂ့ၤထူ(ၦၤနဲၣ်တၢ်ႇ တၢ်ဘၣ်ထဲတွုၤအိၣ်လိာ်သးဝဲၤကျိၤ), တၢ်ပာ်ဖျါတၢ်မၤလ့ၤ တၢ်ဟူးတၢ်ဂဲၤတဖၣ်ႇ တၢ်ထုကဖၣ်ဒီးတၢ်ဟ့ၣ်လီၤအသးလၢ သရၣ်ဒိၣ်ယွၤဒုးမူ(ခဝ့ၡၢၣ်နဲၣ်ရွဲၣ်)န့ၣ်လီၤ. လၢ ကီၢ်(၁၅)ဘ့ၣ်ခၢၣ်စး ၦၤဟဲထီၣ်အိၣ်ဝဲ(၂၂)ဂၤန့ၣ်လီၤ.