Karen Baptist Convention

ကယါဘျၢထံလံ၁်စီဆှံကၠိန့ၣ် မ့ၢ်ကၠိတဖျၢၣ်လၢ အသိၣ်လိဝဲထူဂ့ၢ်ယွၤကျိၤဒီး လုၢ်ဒုးဒိၣ်ထီၣ်ဝဲခိၣ်နၢ်လၢ အမၤယွၤအတၢ်မၤန့ၣ်လီၤ. ကၠိအံၤဘၣ်ထွဲဒီး ကီၢ်ကယါဘျၢထံခရံ၁်ဖိတၢ်အိၣ်ဖှိၣ်သကိးတၢ်အိၣ်ဖှိၣ်န့ၣ်လီၤ. ကၠိအံၤ စးထီၣ်သူၣ်လီၤအသးဖဲ ၂ဝဝ၅ နံၣ် ဒီးတၢ်လီၢ်န့ၣ် မ့ၢ်ဖဲဝ့ၢ်ဒံၣ်မီးဆိၣ်, ကီၢ်ကယါန့ၣ်လီၤ. ကၠိတစိၤသး တၢ်တိ၁်ထူ န့ၣ်မ့ၢ်ဝဲ ‘‘ဟီၣ်ခိၣ်ဒီဘ့ၣ်လၢ ခရံ၁်အဂီၢ်’’ (မၤတၢ် ၁း၈, မးသဲ ၂၈း၁၉-၂ဝ) န့ၣ်လီၤ. ကၠိအိၣ်ဒီးတနံၣ်အဂီၢ်တနံၣ်အဂီၢ် တၢ်တိ၁်ထူဒီး (၂ဝ၂၂-၂၃) တၢ်မၤလိနံၣ်အဂီၢ် ကၠိ တၢ်တိ၁်ထူန့ၣ်မ့ၢ်ဝဲ ‘‘တၢ်ခ့တၢ်ၦၤ လၢယွၤဃုထၢအီၤ’’ (ရှါ ၄၃း၁ဝ ယံး ၄-၅ ,ယိၤ ၁၂း၄၈) န့ၣ်လီၤ.
ကၠိအံၤ မ့ၢ်ကၠိသၢဖျၢၣ်တဖျၢၣ်လၢ ဘၣ်တၢ်အိးထီၣ်အီၤလၢ ကီၢ်ကယါဘျၢထံ ခရံ၁်ဖိတၢ်အိၣ်ဖှိၣ်သကိးတၢ်အိၣ်ဖှိၣ်အဂီၢ်န့ၣ်လီၤ. တချုးကၠိအံၤ အိၣ်ထီၣ်န့ၣ် ကၠိအိၣ် ထီၣ်တ့ၢ်ခံဖျၢၣ်န့ၣ်လီၤ. အခီၣ်ထံးတဖျၢၣ်န့ၣ် စးထီၣ်ဖဲ (၁၉၄၈) နံၣ် လါယူၤ(၁)သီ ဒီး ကၠိဖိလၢဟဲထီၣ်မၤလိတၢ်အိၣ်ဝဲ (၁၁) ဂၤန့ၣ်လီၤ. ကၠိအံၤအိးထီၣ်ဝံၤ ခံလါဒီးတၢ်ဒုးတၢ်ယၤအိၣ်ထီၣ်ဝဲလၢ ထံကီၢ်ပူၤအဃိ ဘၣ်ပ၁်ကတီၢ်ကွံ၁်အီၤန့ၣ်လီၤ. ကၠိခံဖျၢၣ် တဖျၢၣ်န့ၣ် စးထီၣ်ဖဲ (၁၉၈၄)နံၣ် လါယူၤ (၁၆)သီ ဒီးကၠိဖိဟဲထီၣ်မၤလိတၢ်အိၣ်ဝဲ (၁၁) ဂၤန့ၣ်လီၤ. ဘၣ်ဆၣ်ဒီး ကၠိအံၤဘၣ်တၢ်ပ၁်ကတီၢ်အီၤဖဲ (၁၉၈၈)နံၣ် ခီဖျိတၢ်ဂံၢ်စၢ်ဘါ စၢ်အိၣ်ဝဲလၢ ကျဲအါကလု၁်အဃိန့ၣ်လီၤ. စးထီၣ် (၂ဝဝ၁) နံၣ်န့ၣ် ကီၢ်ပၢဆှၢတၢ်ကမံး တံ၁်စံးကတိၤက့ၤ တၢ်ကအိးထီၣ်က့ၤ ကီၢ်လံ၁်စီဆှံကၠိအဂ့ၢ် ဒီး (၂ဝဝ၄) နံၣ်န့ၣ် ကတဲ၁် ကတီၤဝဲတၢ်လိၣ်တဖၣ်လၢ တၢ်ကအိးထီၣ်လံ၁်စီဆှံကၠိအဂီၢ်န့ၣ်လီၤ. အဃိသတးဒီး (၂ဝဝ၅) နံၣ် လါယူၤ(၁)သီန့ၣ် စးထီၣ်က့ၤ ကယါဘျၢထံလံ၁်စီဆှံကၠိ ဒီးမ့ၢ်ကၠိသၢဖျၢၣ် တဖျၢၣ်လၢ ဘၣ်တၢ်အိးထီၣ်အီၤလၢ ကီၢ်ကယါဘျၢထံခရံ၁်ဖိ တၢ်အိၣ်ဖှိၣ်သကိးတၢ် အိၣ်ဖှိၣ်အဂီၢ်န့ၣ်လီၤ. (၂ဝ၂၃) နံၣ်အံၤ ကၠိတၢ်လဲၤခီဖျိအိၣ်ဝဲဒၣ် (၁၈) နံၣ်လံ န့ၣ်လီၤ.
သရၣ်ဧ့စြၤ
ကၠိခိၣ်
ကယါဘျၢထံလံ၁်စီဆှံကၠိ